Bakaten sma ben kon lai na grontapu. Furu fu den ben e du ogri. Srefi wan tu engel na hemel ben kon ogri. Den ben gwe libi hemel èn den kon na grontapu. Yu sabi fu san ede den du dati? Den ben wani teki libisma skin fu kan trow nanga umasma.

Den engel kisi manpkin nanga den umasma. Di den manpkin dati kon bigi, den ben tranga srefsrefi èn den ben e du ogri. Den ben e pina tra sma. Yehovah no ben o libi a sani disi so. Dati meki a besroiti fu kiri den ogrisma na ini wan frudu.

Ma wan man ben de di no ben e du ogri. A ben lobi Yehovah. En nen na Noa. A ben abi wan frow nanga dri boi: Sem, Kam nanga Yafet. Ibriwan fu den boi ben abi wan frow. Yehovah ben taigi Noa fu meki wan bigi ark, so taki en nanga en osofamiri ben o tan na libi te a Frudu kon. Wan ark na wan bigi udu dosu di man tan na tapu watra. Yehovah ben taigi Noa tu fu tyari furu meti go na ini na ark, so taki den no dede ini a Frudu.

Wantewante Noa bigin bow na ark. A teki sowan 50 yari, fosi Noa nanga en osofamiri kba bow na ark. Den bow na ark precies leki fa Yehovah taigi den. Na a ten dati Noa ben warskow den sma tu taki wan frudu ben o kon. Ma nowan sma arki en.

Now a ten ben doro fu go na ini na ark. Meki wi go luku san psa baka dati.