Yesus ben kon na grontapu fu preiki a bun nyunsu fu Gado Kownukondre. Fu di Yehovah ben gi Yesus santa yeye, meki a ben man du wondru. Na so Yesus sori san a o du te a o tiri leki Kownu. A ben man dresi ala sortu siki. Ala sei pe a ben e go, sikisma ben e kon suku yepi na en èn a ben e dresi den alamala. Den brenisma ben e si baka, dofusma ben e yere baka, sma di lan ben e waka baka èn a ben e puru ogri yeye na sma tapu. Efu sma ben fasi a franya fu en dyakti srefi, den ben e kon betre baka. Awinsi pe Yesus ben e go, den sma ben e go na en baka. Srefi te Yesus ben wani de en w’wan, a no ben e yagi den sma gwe.

Wan leisi, sma tyari wan lanman go na a oso pe Yesus ben de. Ma na oso ben furu so te taki den no ben man go na insei. Dati meki den sma puru wan pisi fu a daki, dan den saka a man go leti fesi Yesus. Yesus taigi en: ’Opo tnapu èn waka.’ Di a man bigin waka, den sma skreki.

Wan tra leisi baka, di Yesus go na ini wan dorpu, tin man di ben abi gwasi ben tnapu bun fara e bari: ’Yesus yepi wi!’ Na ini a ten dati, sma di ben abi gwasi no ben mag kon krosbei fu tra sma. Yesus taigi den man fu go na a tempel. Na dati a Wet fu Yehovah ben taki dati sma di abi gwasi musu du baka te den kon betre. Di den man ben de na pasi, den kon betre. Di wan fu den man si taki a kon betre, a drai go baka na Yesus fu taki  en tangi èn fu prèise Gado. Fu ala den tin man, na a man disi w’wan go taki Yesus tangi.

Wan uma ben siki 12 yari langa èn na omeni langa kba a ben suku fu kon betre. Na uma disi waka safri psa na mindri den furu sma di ben de lontu Yesus, dan a go na baka Yesus èn a fasi a franya fu en krosi. Wantewante a kon betre. Ne Yesus aksi: ’Suma fasi mi?’ Na uma ben frede, ma tòg a kon na Yesus, dan a ferteri en ala sani. Yesus trowstu en. A taigi en: ’Mi umapkin, meki sani waka bun gi yu.’

Wan fesiman fu a snoga di nen Yairus, kon na Yesus èn a begi en: ’Kon na mi oso! A meisje fu mi siki te fu dede.’ Ma fosi Yesus doro Yairus oso, a meisje dede. Di Yesus doro drape, a si taki a famiri nanga furu tra sma ben e krei. Yesus taigi den: ’Un no krei, a meisje e sribi.’ Ne a hori a meisje na en anu, dan a taki: ’Meisje, opo!’ Wantewante a meisje opo èn Yesus taigi en p’pa nanga m’ma fu gi en wan sani fu nyan. Prakseri fa a p’pa nanga a m’ma ben breiti!