Yosef nanga Maria ben e libi na Nasaret makandra nanga Yesus nanga den tra manpkin nanga umapkin fu den. Yosef ben e du temrewroko fu sorgu gi en osofamiri èn a ben leri den fu Yehovah nanga a Wet fu en. Na osofamiri ben abi a gwenti fu go na a snoga fu anbegi Gado. Ibri yari den ben e go tu na Yerusalem fu hori a Paskafesa.

Di Yesus ben abi 12 yari, en osofamiri teki a langa pasi go na Yerusalem, soleki fa den ben gwenti du kba. A foto ben lai nanga sma di ben kon fu hori a Paskafesa. Di a fesa ben kba, Yosef nanga Maria teki a pasi baka go na oso èn den ben denki taki Yesus ben de na ini a grupu fu den. Ma di den go suku en na den famiriman fu den, den no ben man feni en.

Den drai go baka na Yerusalem pe den suku a boi fu den dri dei langa. Te fu kba den go na a tempel. Yesus ben de drape e sdon na mindri den leriman. A ben e arki den bun èn a ben e poti bun aksi gi  den. Den leriman ben ferwondru so te, taki den bigin poti aksi gi Yesus. Èn den no ben man bribi taki so wan yongu boi e gi so bun piki. Den ben si taki a ben e ferstan a Wet fu Yehovah.

Yosef nanga Maria ben e broko den ede srefsrefi. Maria aksi Yesus: ’Mi pkin, wi suku yu na ala sei! Pe yu ben de?’ Yesus taki: ’Unu no ben sabi taki mi musu de na ini na oso fu mi P’pa?’

Yesus nanga en p’pa nanga m’ma go na den oso na Nasaret. Yosef leri Yesus a temrewroko. Fa yu denki taki Yesus ben de di a ben yongu? O moro Yesus ben kon bigi, o moro koni a ben kon abi èn Gado nanga tra sma ben lobi en.