Ibri dei wan malengriman ben e sdon na wan fu den portu fu a tempel e begi sma moni. Wan bakadina a si taki Petrus nanga Yohanes ben e go na ini a tempel. A taigi den: ’Grantangi gi mi wan moni.’ Petrus taki: ’Mi abi wan moro bun sani fu gi yu. Na ini a nen fu Yesus mi e taigi yu fu opo, dan yu waka!’ Petrus yepi en fu opo tnapu èn a man bigin waka! Di den sma di ben drape si a wondru disi den ben prisiri èn moro furu sma tron bribiman.

Ma den priester nanga den Saduseiman ben mandi. Den grabu den apostel, den tyari den go na krutu èn den taki: ’Suma gi yu a krakti fu man dresi a man disi?’ Petrus piki: ’Wi kisi a krakti fu Yesus Krestes di unu kiri.’ Den kerki fesiman bari: ’No taki fu Yesus moro!’ Ma den apostel piki: ’Wi musu fu taki fu en. Wi no o tapu.’

Di Petrus nanga Yohanes kmoto na a krutu, den go na den tra disipel fu ferteri den san psa. Den begi Yehovah makandra èn den aksi en: ’Grantangi gi wi dek’ati fu man tan du a wroko fu yu.’ Yehovah gi den a santa yeye fu en. Den tan preiki go doro èn den ben e meki sikisma kon betre baka. Moro nanga moro sma ben tron bribiman. Den Saduseiman ben dyarusu so te, taki den grabu den apostel poti na straf’oso. Ma na neti, Yehovah seni wan engel èn a opo den doro fu a straf’oso. A taigi den apostel: ’Go baka na a tempel èn preiki drape.’

A tra m’manten sma taigi a Grankrutu fu den Dyu: ’A straf’oso tapu, ma den man di un tyari go sroto no de insei! Den de na ini a tempel e gi sma leri!’ Den grabu den apostel tyari go baka na fesi a Grankrutu. A granpriester taki: ’Wi taigi unu fu no taki fu Yesus!’ Ma Petrus piki: „Gado na wi tiriman. Dati meki wi musu arki en moro leki libisma.”

 Den kerki fesiman ati bron so te, taki den ben wani kiri den apostel. Ma wan Fariseiman di ben nen Gamaliyel, opo tnapu èn a taki: ’Un luku bun! Kande Gado de nanga den sma disi. Un musu luku bun taki unu no e feti nanga Gado.’ A Grankrutu arki en. Baka di den fon den apostel, den taigi den fu no preiki moro, dan den seni den gwe. Ma a sani dati no tapu den apostel. Den tan preiki a bun nyunsu nanga dek’ati na ini a tempel èn oso fu oso.