Den Israelsma gwe libi Yehovah baka èn den bigin anbegi falsi gado. Di den Amonsma kon feti nanga den, den falsi gado no ben man yepi den. Den Israelsma pina omeni yari langa. Te fu kba, den taigi Yehovah: ’Wi sondu teige yu. Grantangi, ferlusu unu fu den feanti fu wi.’ Den Israelsma puru den falsi gado na den mindri èn den go dini Yehovah baka. Yehovah no ben wani si moro fa den e pina.

A pipel teki wan tranga fetman di nen Yefta fu tron legre-edeman te den ben o go feti nanga den Amonsma. Yefta taigi Yehovah: ’Efu yu yepi mi fu wini a feti disi, mi e pramisi yu taki te mi drai go na oso baka mi o gi yu a fosi  sma di o kmoto na ini mi oso kon miti mi.’ Yehovah arki a begi fu Yefta èn a yepi en fu wini a feti.

Di Yefta drai go baka na oso, a fosi sma di kon miti en na en umapkin, en wan-enkri pkin. A ben e dansi kon miti en nanga tyengretyengre na ini en anu. San Yefta ben o du? A memre san a ben pramisi èn a taki: ’Ke mi umapkin. Luku fa yu e meki yu p’pa sari. Mi pramisi Yehovah wan sani. Èn efu mi wani du san mi pramisi, dan mi musu seni yu go na a tabernakel na Silo fu dini Yehovah.’ Ma na umapkin fu en taigi en: ’Mi p’pa, efu yu pramisi Yehovah wan sani, dan yu musu du san yu pramisi. Mi e begi yu nomo fu gi mi tu mun so taki mi kan go nanga den mati fu mi na den bergi. Baka dati mi o go.’ Na umapkin fu Yefta tan dini Yehovah en heri libi langa na a tabernakel. Ibri yari den mati fu en ben e go luku en na Silo.