Na ini Filipi wan umasrafu ben de di ben abi wan ogri yeye na en tapu. Na ogri yeye ben e meki taki a meisje ben man taigi sma na fesi san o psa na ini den libi. Den basi fu a meisje ben e meki furu moni na a fasi disi. Di Paulus nanga Silas kon na Filipi, a meisje ben e waka na den baka omeni dei. Na ogri yeye meki a bari: ’Den man disi na srafu fu a Moro Hei Gado.’ Te fu kba Paulus taigi na ogri yeye: ’Mi e taigi yu na ini a nen fu Yesus Krestes fu kmoto na en tapu!’ Na ogri yeye kmoto na a meisje tapu.

Di den basi fu a meisje kon si taki den no ben man meki moni moro nanga a meisje, den ati bron srefsrefi. Den tyari Paulus nanga Silas go na den hei lantiman. Den taki: ’Den man disi no e hori densrefi na a wet èn den e bruya a heri foto!’ Den lantiman taigi sma fu fon Paulus nanga Silas èn fu poti den na straf’oso. A waktiman poti den te na bakasei fu a straf’oso pe a ben dungru srefsrefi èn a fasi den futu na ini wan udu.

Paulus nanga Silas bigin singi gi Yehovah aladi den tra straf’man ben e arki. Ne wan sani psa na mindrineti. Wan tranga gronseki kon èn a heri straf’oso ben seki. Den doro fu a straf’oso opo, den bui lusu èn den futu no ben fasi moro na ini udu. Di a waktiman lon go na ini a straf’oso, a si taki den doro ben opo. Fu di a ben denki taki ala den straf’man lowe gwe, a ben wani kiri ensrefi.

Na a momenti dati Paulus bari: ’No kiri yusrefi! Wi alamala de dya!’ A waktiman lon go na insei, dan a fadon na fesi Paulus nanga Silas. A aksi den: ’San mi musu du fu kisi ferlusu?’ Den taigi en: ’Yu nanga yu osofamiri musu bribi na ini Yesus.’ Baka dati Paulus nanga Silas leri den a wortu fu Yehovah. A waktiman nanga en heri osofamiri dopu.