Yonatan, a moro owru manpkin fu Kownu Saul, ben de wan dek’ati fetiman. David taki dati Yonatan ben gaw moro wan aka èn a ben tranga moro wan lew. Wan dei Yonatan si wan tu Filistea srudati na tapu wan bergi. A taigi a man di ben e tyari den fetsani fu en: ’Wi o go feti nanga den soso te Yehovah sori wi taki a o yepi wi. Efu den Filisteasma taigi wi fu kren go na den, dan wi o sabi taki wi musu go feti nanga den.’ Den Filisteasma bari: ’Un kren kon feti nanga wi!’ Dati meki den tu man kren a bergi èn den kiri sowan 20 srudati.

Fu di Yonatan ben de a moro owru manpkin fu Saul, meki en ben o tron kownu baka Saul. Ma Yonatan ben sabi taki Yehovah ben teki David fu tron a nyun kownu fu Israel. Tòg a no ben dyarusu na en  tapu. Yonatan nanga David tron bun mati. Den pramisi taki den ben o yepi makandra ala ten. Yonatan gi David en dyakti, en fet’owru, en bo nanga en riem fu sori en taki den na mati.

Di David ben e lowe gi Saul, Yonatan go na en èn a taigi en: ’No frede, abi dek’ati. Yehovah poti yu leki kownu. Srefi mi p’pa sabi dati.’ Yu ben o wani abi wan bun mati leki Yonatan?

Moro leki wán leisi Yonatan yepi en mati aladi a ben kan lasi en libi. A ben sabi taki Kownu Saul ben wani kiri David. Dati meki a taigi en p’pa: ’Yu ben o du wan sondu efu yu kiri David. A no du nowan ogri.’ Saul ati bron tapu Yonatan. Wan tu yari baka dati Saul nanga Yonatan dede na ini wan feti.

Baka di Yonatan dede, David suku Mefiboset, a manpkin fu Yonatan. Di David feni en, a taigi en: ’Yu p’pa ben de wan bun mati fu mi. Dati meki mi o sorgu gi yu solanga yu de na libi. Yu o tan na ini mi kownu-oso èn yu o nyan na mi tafra.’ Noiti David fergiti en mati Yonatan.