Baka di Yesus dopu, a santa yeye meki a go na ini a sabana. Fu di a no nyan nowan sani 40 dei langa, meki angri ben e kiri en. Didibri kon na Yesus fu kori en. A taki: ’Efu yu na Gado Manpkin, dan taigi den ston disi fu tron brede.’ Ma Yesus sori en san skrifi na ini den Santa Buku fu Bijbel: ’Gado buku taki dati a no n’nyan w’wan yu abi fanowdu fu tan na libi. Yu musu arki ibri wortu di Yehovah taki.’

Baka dati Didibri taigi Yesus: ’Efu yu na Gado Manpkin trutru, dan dyompo fu a moro hei pisi fu a tempel go na gron bika a skrifi taki Gado o seni den engel fu en fu fanga yu.’ Ma Yesus sori en baka san skrifi na ini den Santa Buku fu Bijbel: ’Gado buku taki dati yu no musu tesi Yehovah.’

Baka dati Satan sori Yesus ala den kownukondre fu grontapu. A sori en sortu gudu den abi èn fa den moi. Dan a taki: ’Mi o gi yu ala den kownukondre disi nanga a moi fu den efu yu anbegi mi wán leisi nomo.’ Ma Yesus piki en: ’Gwe fu dya, Satan! Gado Buku taki dati yu musu anbegi Yehovah w’wan.’

Baka dati Didibri gwe èn den engel tyari n’nyan gi Yesus. Sensi a ten dati, Yesus bigin preiki a bun nyunsu fu a Kownukondre. Na fu a sani disi Yehovah seni en kon na grontapu. Sma ben lobi san Yesus ben e leri den èn ala sei pe a ben e go den ben e waka na en baka.