Yehovah taigi Samuel: ’Go na a oso fu Isai. Wan fu den manpkin fu en o tron a nyun kownu fu Israel.’ Sobun, Samuel go na a oso fu Isai. Di a si a moro owru manpkin, a prakseri: ’A musu de taki na a yonguman disi Gado teki.’ Ma Yehovah taigi Samuel taki a no en a teki. Yehovah taki: ’Libisma e si soso san na ai e si. Ma mi e si fa na ati de.’

Isai tyari ete siksi fu den manpkin fu en kon gi Samuel. Ma Samuel taki: ’Yehovah no teki nowan fu den. Yu abi tra manpkin?’ Isai taki: ’Mi abi ete wan, a moro yonguwan, David. A de na dorosei e luku den skapu.’ Di David kon na insei, Yehovah taigi Samuel: ’Na en mi teki!’ Samuel kanti oli na tapu David ede èn na so a salfu en leki a nyun kownu fu Israel.

Baka wan pisi ten den Israelsma ben o go feti nanga den Filisteasma. Den Filisteasma ben abi wan bigi tranga srudati di ben e feti gi den. A man disi ben nen Goliat. Ibri dei Goliat ben e spotu den Israelsma. A ben e bari: ’Seni wan man fu kon feti nanga mi. Efu a wini, dan wi o de unu srafu. Ma efu mi wini, dan unu o de wi srafu.’

David kon na a kampu fu den Israelsma fu di a ben tyari n’nyan kon gi den brada fu en di ben de srudati. Di a yere fa Goliat ben e spotu den, a taki: ’Mi o feti nanga en!’ Kownu Saul taigi en: ’Ma yu na wan boi ete.’ David piki en: ’Yehovah o yepi mi.’

 Saul ben wani taki David gebroiki den fetsani fu en, ma David taki: ’Mi no man feti nanga den sani disi.’ David teki en slinger, dan a go na a liba na ini a lagipresi. A teki feifi grati ston èn a poti den na ini en pkin tas. Ne David lon go miti Goliat. Goliat bari: ’Kon dya yu pkin boi. Mi o meki den fowru na loktu èn den busmeti nyan a meti fu yu.’ Ma David no ben frede. A bari: ’Yu e kon na mi tapu nanga wan fet’owru nanga wan lansri, ma mi e kon na ini a nen fu Yehovah. A no nanga wi yu e feti. Yu e feti nanga Gado. Ala sma dyaso o si taki Yehovah tranga moro wan fet’owru noso wan lansri. A o meki wi wini unu.’

David poti wan ston na ini en slinger, dan a fringi en bun tranga go teki Goliat. Yehovah meki taki a ston kisi Goliat na en fes’ede. A bigi man fadon dede na gron. Di den Filisteasma si disi, den lon gwe. Yu e fertrow na tapu Yehovah neleki David?