Ese muri Bibiliya nabonamo amagambo yampumuriza?
Icyo Bibiliya ibivugaho
Yego (Abaroma 15:4). Reka dusuzume ingero z’imirongo yo muri Bibiliya yagiye ifasha abantu bahanganye n’ibibazo bitandukanye cyangwa bihebye.
Muri iyi ngingo turasuzuma:
Ibibazo bitandukanye
Zaburi 23:4: “Nubwo nanyura mu gikombe cy’umwijima w’icuraburindi, sinzatinya ikibi, kuko uri kumwe nanjye.”
Icyo usobanura: Iyo ufite ibibazo bitandukanye maze ugasenga Imana kandi ugashakira ubuyobozi mu Ijambo ryayo Bibiliya, ushobora kugira ubutwari bwo guhangana na byo.
Abafilipi 4:13: “Mu bintu byose, ngira imbaraga binyuze ku umpa imbaraga.”
Icyo usobanura: Imana ishobora kuguha imbaraga zo guhangana n’ikibazo icyo ari cyo cyose wahura na cyo.
Gupfusha uwo wakundaga
Umubwiriza 9:10: “Kuko mu mva aho ujya nta mirimo cyangwa imigambi cyangwa ubumenyi cyangwa ubwenge bihaba.”
Icyo usobanura: Abapfuye ntibababara cyangwa ngo babe batugirira nabi. Nta kintu na kimwe bazi.
Ibyakozwe 24:15: “Hazabaho umuzuko.”
Icyo usobanura: Imana ifite ubushobozi bwo kugarura abantu bacu twakundaga bapfuye, bakongera kuba bazima.
Kwicira urubanza bikabije
Zaburi 86:5: “Yehova, a uri mwiza kandi witeguye kubabarira. Ineza yuje urukundo ugaragariza abakwambaza bose ni nyinshi.”
Icyo usobanura: Imana ibabarira abantu bababazwa n’ibyo bakoze mu gihe cyashize kandi bakiyemeza kutazabisubira.
Zaburi 103:12: “Nk’uko aho izuba rirasira hitaruye aho rirengera, ni ko yashyize kure yacu ibicumuro byacu.”
Icyo usobanura: Iyo Imana itubabariye, ishyira kure cyane amakosa yacu. Ntiyongera kuyatwibutsa kugira ngo iduhane cyangwa ngo idushinje ibyaha.
Agahinda
Zaburi 31:7: “Kubera ko wabonye akababaro kanjye, ukamenya agahinda k’ubugingo bwanjye.”
Icyo usobanura: Imana izi neza ibintu byose bikubabaza. Isobanukiwe neza uko wiyumva ndetse n’igihe abandi batiyumvisha uko umerewe.
Zaburi 34:18: “Yehova aba hafi y’abafite umutima umenetse; akiza abafite umutima ushenjaguwe.”
Icyo usobanura: Imana igusezeranya ko izakwitaho mu gihe ubabaye. Ishobora kuguha imbaraga zo guhangana n’agahinda.
Uburwayi
Zaburi 41:3: “Yehova azamwiyegamiza ari ku buriri arwariyeho.”
Icyo usobanura: Imana ishobora kugufasha guhangana n’uburwayi bukomeye, iguha amahoro yo mu mutima hamwe n’imbaraga, kwihangana n’ubwenge bwagufasha gufata imyanzuro myiza.
Yesaya 33:24: “Nta muturage waho uzavuga ati ‘ndarwaye.’”
Icyo usobanura: Imana idusezeranya ko hari igihe abantu bose bazaba bafite ubuzima bwiza.
Imihangayiko
Zaburi 94:19: “Igihe ibitekerezo bimpagarika umutima byambagamo byinshi, ihumure riguturukaho ryatangiye gukuyakuya ubugingo bwanjye.”
Icyo usobanura: Iyo duhangayitse maze tugasenga, Imana idufasha gukomeza gutuza.
1 Petero 5:7: “Muyikoreze imihangayiko yanyu yose kuko ibitaho.”
Icyo usobanura: Imana yita ku mihangayiko yacu. Idusaba kuyibwira ibiduhangayikishije mu isengesho.
Intambara
Zaburi 46:9: “Akuraho intambara kugeza ku mpera z’isi.”
Icyo usobanura: Vuba aha Ubwami bw’Imana buzavanaho intambara zose.
Zaburi 37:11, 29: “Abicisha bugufi bo bazaragwa isi, kandi bazishimira amahoro menshi. . . . Abakiranutsi bazaragwa isi, kandi bazayituraho iteka ryose.”
Icyo usobanura: Abantu beza bazishimira amahoro iteka ryose ku isi.
Guhangayikira iby’ejo hazaza
Yeremiya 29:11: “‘Kuko nzi neza ibyo ntekereza kubagirira,’ ni ko Yehova avuga. ‘Ni amahoro si ibyago, kugira ngo muzagire imibereho myiza mu gihe kizaza, n’ibyiringiro.
Icyo usobanura: Imana yizeza abantu bayo ko bashobora kuzagira ubuzima bwiza mu gihe kiri imbere.
Ibyahishuwe 21:4: “Izahanagura amarira yose ku maso yabo, kandi urupfu ntiruzabaho ukundi, kandi kuboroga cyangwa gutaka cyangwa kubabara ntibizabaho ukundi. Ibya kera byavuyeho.”
Icyo usobanura: Imana isezeranya ko izavanaho ibintu bibi byose ubona bibaho muri iki gihe.
a Yehova ni izina bwite ry’Imana (Yeremiya 16:21). Reba ingingo ivuga ngo “Yehova ni nde?”
Ibindi wamenya
UMUNARA W’UMURINZI
Kumenya ko Imana ikwitaho bigufitiye akamaro
Ibyanditswe bituma twizera amasezerano y’Imana y’uko izakuraho ibibi byose.
IBIBAZO BISHINGIYE KURI BIBILIYA
Ni he nakura ibyiringiro?
Gushakira inama ahantu hizewe bishobora kugufasha kugira ubuzima bwiza muri iki gihe kandi ukagira ibyiringiro.
IZINDI NGINGO
Ihumure ku bapfushije
Iyo twapfushije, hari igihe twumva ko nta muntu wakwiyumvisha uko tumerewe. Icyakora Imana irabizi kandi ishobora kugufasha.
UMUNARA W’UMURINZI
Mu gihe wumva ubuzima bukurambiye
Ushobora kwishimira ubuzima nubwo waba uhanganye n’ibibazo.
INYIGISHO Z'IBANZE ZO MURI BIBILIYA
Kuki Imana ireka imibabaro ikabaho?
Abantu benshi bibabaza impamvu isi yuzuyemo imibabaro. Bibiliya itanga igisubizo k’icyo kibazo.
