Zaburi 94:1-23

  • Isengesho ry’umuntu usaba ko Imana ihana ababi

    • “Ababi bazageza ryari?” (3)

    • Uwo Yah akosora agira ibyishimo (12)

    • Imana ntizareka abantu bayo (14)

    • “Bacura imigambi yo guteza ibibazo bitwaje amategeko” (20)

94  Yehova Mana, wowe wishyura abantu babi ibyo bakoze,Wowe uhana ababi ubahora ibyaha byabo, igaragaze!   Haguruka wowe Mucamanza w’isi, Ukorere abishyira hejuru ibihwanye n’ibyo bakoze.   Yehova, ababi bazageza ryari?Koko ababi bazishyira hejuru bageze ryari?   Bakomeza gusukiranya amagambo, bagakomeza kuvuga biruka.Inkozi z’ibibi zose zikomeza kwirarira.   Yehova, bakomeza kugirira nabi abantu bawe,Kandi bakomeza kubabaza abo wagize umurage wawe.   Bica umupfakazi n’umunyamahanga,Bakica n’imfubyi.   Baravuga bati: “Yah ntabireba,Kandi Imana ya Yakobo ntibibona.”   Mwebwe bantu mudatekereza nimusobanukirwe ibi,Mwa bantu batagira ubwenge mwe, muzagira ubushishozi ryari?   Ese uwashyizeho ugutwi ntashobora kumva? Cyangwa uwaremye ijisho ntashobora kureba? 10  Ese ukosora abantu bo ku isi ntashobora gucyaha? Ni na we wigisha abantu ubwenge. 11  Yehova azi ibyo abantu batekereza,Azi ko ari umwuka gusa. 12  Yah, umuntu ugira ibyishimo ni uwo ukosora,Kandi ukamwigisha amategeko yawe, 13  Kugira ngo umuhe gutuza igihe azaba ahanganye n’ibibazo,Kugeza igihe ababi bazagwira mu mwobo. 14  Yehova ntazareka abantu be,Kandi ntazigera atererana abo yagize umurage we. 15  Imanza zizongera kuba imanza zikiranuka,Kandi abakiranutsi bazazishyigikira. 16  Ni nde uzamfasha kurwanya ababi? Ni nde uzahaguruka akamfasha kurwanya inkozi z’ibibi? 17  Iyo Yehova atantabara,Mba narapfuye mu kanya gato! 18  Yehova, ubwo navugaga ngo: “Ndi kunyerera,” Wakomeje kunshyigikira ungaragariza urukundo rudahemuka. 19  Igihe imihangayiko yambanaga myinshi,Warampumurije numva ndatuje. 20  Ntuzigera ukorana n’abategetsi* babi,Kuko bacura imigambi yo guteza ibibazo bitwaje amategeko. 21  Bagaba ibitero bikaze ku bakiranutsi,Kandi abantu badafite icyaha bakabakatira urwo gupfa. 22  Ariko Yehova azambera ubuhungiro,Kandi Imana yanjye izambera igitare mpungiraho. 23  Izatuma ibikorwa byabo bibi bibagaruka, Kandi ibibi byabo ni byo izakoresha ibarimbura. Yehova Imana yacu azabakuraho.

Ibisobanuro ahagana hasi

Cyangwa “abacamanza.”