Laga Yehova Su “Palabra” Protehá Bo

NA AÑA 490 promé ku nos era na e bataya históriko di Máratòn, entre 10 mil pa 20 mil sòldá di Atenas a konfrontá un ehérsito di Persia hopi mas superior. Un táktika klave di e griegonan tabata e asina yamá falanks, esta, un bloke di sòldá ku a marcha pegá-pegá riba otro. Nan eskudonan tabata tapa otro i a forma un muraya kasi impenetrabel, un muraya yen di lansa su tras. E falanks a duna e sòldánan di Atenas un viktoria famoso riba e forsanan hopi mas superior di Persia.

Kristiannan berdadero ta den un guera spiritual. Nan ta lucha kontra enemigunan poderoso, e gobernantenan invisibel di e mal sistema di kosnan aki, deskribí den Beibel komo “e forsanan mundial di e skuridat aki, . . . e forsanan spiritual di maldat den e lugánan selestial.” (Efesionan 6:12; 1 Juan 5:19) Dios su pueblo ta sigui viktorioso, pero no riba nan mes forsa. Tur mérito ta bai pa Yehova, kende ta protehá nan i instruí nan, manera Salmo 18:30 ta deklará: “E palabra di SEÑOR ta probá [“refiná,” NW]; e ta un eskudo pa tur esnan ku ta tuma refugio den dje.”

Sí, pa medio di su “palabra” refiná, ku nos ta haña den e Skritura Santu, Yehova ta protehá su sirbidónan leal di daño spiritual. (Salmo 19:7-11; 119:93) Relashoná ku e sabiduria ku e Palabra di Dios ta manifestá, Salomon a skirbi: “No bandoná sabiduria, i é lo warda bo; stim’é, i é lo kuida bo.” (Proverbionan 4:6; Eklesiastés 7:12) Kon sabiduria divino por protehá nos di daño? Konsiderá e ehèmpel di antiguo Israel.

Un Pueblo Protehá dor di Sabiduria Divino

E Lei di Yehova a protehá i guia e israelitanan den tur aspekto di bida. Por ehèmpel, e reglanan di dieta, higiena i karentena a spar nan di hopi di e malesanan ku a asotá otro nashonnan. Ta te despues ku hende a deskubrí bakteria den siglo 19, siensia a kuminsá yega na e nivel di e Lei di Dios. E leinan tokante  propiedat di tereno, derecho di kumpra bèk, eksonerashon di debe i kobramentu di interes a trese benefisionan sosial den Israel dor di promové un sosiedat stabil i un ekonomia hustu. (Deuteronomio 7:12, 15; 15:4, 5) E Lei di Yehova asta a yuda konserbá e tereno di Israel den bon kondishon! (Eksodo 23:10, 11) Mandamentunan ku a prohibí adorashon falsu a duna e pueblo protekshon spiritual; protehando nan di opreshon di demoño, di sakrifisio di yu i di hopi otro maldat, fuera tambe di e práktika degradante di bùig dilanti imágennan sin bida.—Eksodo 20:3-5; Salmo 115:4-8.

Ta bisto ku e “palabra” di Yehova no a resultá di ta “un palabra bashí” pa Israel; mas bien el a nifiká bida i a prolongá e dianan di tur ku a obedes’é. (Deuteronomio 32:47) Meskos ta e kaso awe ku personanan ku ta kumpli ku Yehova su palabranan sabí, apesar ku kristiannan no ta bou di e aliansa di Lei mas. (Galationan 3:24, 25; Hebreonan 8:8) De echo, en bes di un kódigo di lei, kristiannan tin un variedat grandi di prinsipio bíbliko pa guia nan i protehá nan.

Un Pueblo Protehá dor di Prinsipio

Leinan por tin un aplikashon limitá i por ta algu temporal. Sin embargo, prinsipionan bíbliko, siendo ku nan ta bèrdatnan fundamental, por lo general tin un aplikashon amplio i permanente. Por ehèmpel, tuma e prinsipio na Santiago 3:17 ku ta bisa en parte: “E sabiduria di ariba primeramente ta puru, despues pasífiko.” Kon e bèrdat fundamental ei por sirbi komo un eskudo òf protekshon pa e pueblo di Dios awe?

Ser puru ke men ser moralmente limpi. Pues, hende ku ta balorá puresa ta hasi esfuerso pa no solamente evitá inmoralidat sino asta e kosnan ku ta hiba na dje, entre otro, fantasianan seksual i pornografia. (Mateo 5:28) Di igual manera, parehanan ku ta namorá otro i ku a tuma e prinsipio di Santiago 3:17 na pechu ta evitá aktonan íntimo ku lo por pone nan pèrdè nan dominio propio. Komo ku nan ta ser guiá pa prinsipio, nan lo no kai den e tentashon di pensa ku tanten ku nan no ègt kibra e lei di Dios, nan kondukta lo karga Yehova su aprobashon; nan sa ku e pensamentu ei lo hasi nan impuru. Nan sa ku Yehova “ta wak kurason” i ku e ta aktua di akuerdo ku esei. (1 Samuel 16:7; 2 Krónikanan 16:9) E personanan sabí ei ta protehá nan karni di e tantísimo malesanan transmití seksualmente ku ta reina awe i tambe ta konserbá nan bienestar mental i emoshonal.

Ademas, segun Santiago 3:17, sabiduria divino ta “pasífiko.” Manera nos sa, Satanas ta purba alehá nos for di Yehova dor di sembra un spiritu di violensia den nos kurason. E ta hasi esei entre otro mediante literatura, pelíkula, músika i weganan di kòmpiuter dudoso; tin di e weganan aki ta laga e hungadónan imaginá nan kon nan ta kometé brutalidat i matansanan inkreibel! (Salmo 11:5) E kresiente ola di krímennan violento ta duna prueba ku Satanas tin éksito. Relashoná ku e tipo di krímennan ei, algun aña pasá e korant oustraliano The Sydney Morning Herald a sita Robert Ressler, e hòmber ku a bin ku e ekspreshon “serial killer” (asesino múltiple). Ressler a bisa ku e asesinonan ku el a entrevistá den dékada di 1970 a ser stimulá dor di material pornográfiko ku “ta nada na komparashon ku esnan djawendia.” P’esei Ressler a ekspresá ku e ta mira “un futuro skur, un siglo nobo den kua asesinonan múltiple lo multipliká.”

En bèrdat, apénas algun luna despues ku e notisia ei a sali publiká, un pistolero a mata 16 mucha chikitu i nan maestra na un skol preparatorio na Dunblane, Eskosia, promé ku el a mata su kurpa. E siguiente luna un otro pistolero loko a masakrá 32 hende den un pueblo trankil di Port Arthur, na Tasmania, Oustralia. Den añanan resien, Merka a keda sagudí pa vários masakre na skol, poniendo e merikanonan puntra: Dikon? Na yüni 2001, Hapon a alkansá titularnan di notisia mundial ora ku un hòmber loko a drenta den un skol i hinka 8 mucha di klas unu i klas dos mata i kòrta  15 otro hende. Un kos ta sigur, kisas no ta fásil pa bisa mesora kiko ta e motibunan, pero mas i mas eksperto ta mira violensia den medionan di komunikashon komo un faktor ku ta kontribuí na esei. E kolumnista oustraliano Phillip Adams a skirbi: “Si un spòt di 60 sekònde por oumentá benta enormemente, no bisa mi ku un pelíkula multimionario di dos ora largu no ta kambia hende su aktitut.” Loke a hala hopi atenshon ta ku den e kas di e pistolero di Port Arthur, polis a konfiská 2.000 vidio violento i pornográfiko.

Hende ku ta pega na prinsipionan bíbliko ta protehá nan mente i kurason di tur forma di entretenimentu ku ta fomentá un pashon pa violensia. Pues, nan no ta habri un tapeit di ‘bonbiní’ pa “e spiritu di mundu” den nan pensamentu i deseonan. Mas bien, nan ta ser “siñá dor di e spiritu [di Dios],” i nan ta hasi esfuerso pa kultivá un amor pa su fruta ku ta inkluí pas. (1 Korintionan 2:12, 13; Galationan 5:22, 23) Nan ta kultivá e amor aki dor di estudio regular di Beibel, orashon i meditashon edifikante. Nan ta evitá tambe di asosiá ku personanan ku tin inklinashon violento, i ta skohe mas bien pa asosiá ku esnan ku, meskos ku nan, ta anhelá pa Yehova su mundu nobo di pas yega. (Salmo 1:1-3; Proverbionan 16:29) Sí, sabiduria divino ta duna nos un bon protekshon!

Laga Yehova Su “Palabra” Warda Bo Kurason

Ora Satanas a tenta Hesus den desierto, Hesus a rechas’é dor di sita e Palabra di Dios ku eksaktitut. (Lukas 4:1-13) Sin embargo, Hesus no a djis pusta ku Diabel pa wak ken ta mas sabí. Dor di basa su defensa riba e Skritura, Hesus a papia di kurason, i ta p’esei e strategia di Diabel ku a funshoná asina bon den Edén, a frakasá den kaso di Hesus. Satanas su trampanan lo frakasá serka nos tambe si nos yena nos kurason ku e palabranan di Yehova. Nada lo por ta mas importante, pasobra kurason “ta e fuente di bida.”—Proverbionan 4:23.

Ademas, nos tin ku sigui warda nos kurason, sin slèk niun momentu. Ora Satanas a frakasá den desierto, e no a stòp di pone Hesus na prueba. (Lukas 4:13) Asina tambe lo e persistí ku nos dor di purba vários strategia pa kibra nos integridat. (Revelashon 12:17) P’esei, laga nos imitá Hesus dor di kultivá un amor profundo pa e Palabra di Dios, i a la bes pidiendo sin stòp den orashon pa haña spiritu santu i sabiduria. (1 Tesalonisensenan 5:17; Hebreonan 5:7) Yehova di su parti ta primintí ku tur ku buska refugio den dje lo no sufri daño spiritual.—Salmo 91:1-10; Proverbionan 1:33.

E Palabra di Dios Ta Protehá e Kongregashon

Satanas no por stroba e “multitut grandi” profetisá di sobrebibí e gran tribulashon. (Revelashon 7:9, 14) Sin embargo, tòg e ta purba di tur manera pa korumpí kristiannan pa por lo ménos algun di nan pèrdè Yehova su aprobashon. E strategia aki a funshoná den antiguo Israel i a hiba na e morto di 24.000 persona na drèmpel di e Tera Primintí. (Numbernan 25:1-9) Klaru ku kristiannan ku kometé eror i mustra berdadero arepentimentu ta risibí yudansa amoroso pa asina nan por rekuperá spiritualmente. Pero pekadónan ku no repentí ta pone na peliger e bienestar moral i spiritual di otro kristiannan, manera tabata e kaso ku Zimri di pasado. (Numbernan 25:14) Nan ta eksponé no solamente nan mes na daño sino tambe nan kompañeronan, meskos ku den kaso di e sòldánan den un falanks ku benta nan eskudo un banda.

P’esei Beibel ta manda: “No asosiá ku ningun hende ku ta ruman pa nòmber, si e ta un hende inmoral, òf golos pa plaka, òf un adoradó di dios falsu, òf un blasfemadó, òf un buraché, òf un estafadó—pa ni kome mes huntu ku un hende asina. . . . Saka e hòmber malbado for di meimei di boso.” (1 Korintionan 5:11, 13) Bo no ta di akuerdo ku e “palabra” sabí aki ta yuda protehá e puresa moral i spiritual di e kongregashon kristian?

Na kontraste skèrpi, hopi di e iglesianan di kristiandat i tambe apóstatanan ta konsiderá e partinan di Beibel ku ta bai kontra di puntonan  di bista moderno i liberal di moralidat komo ouderwets. P’esei nan ta hustifiká tur forma di piká grave, asta den klero. (2 Timoteo 4:3, 4) Sin embargo, tuma nota ku Proverbionan 30:5 tambe ta bisa ku Yehova su “palabra” ta manera un eskudo, pero den versíkulo 6 ta sigui e mandamentu: “No añadí na [Dios] su palabranan, pa e no reprendé bo i bo wòrdu probá di ta un gañadó.” Sí, hende ku ta interferí ku Beibel òf purba kambi’é ta en realidat gañadónan spiritual, anto e gañadónan di mas kulpabel ku tur! (Mateo 15:6-9) Pues, laga nos ta realmente gradisidu ku nos ta parti di un organisashon ku tin rèspèt profundo pa e Palabra di Dios.

Protehá dor di “un Holó Dushi”

Komo ku e pueblo di Dios ta pega na Beibel i ta kompartí su mensahe konsolador ku otro hende, nan ta manda un “holó dushi” di bida, un holó manera di sensia ku ta agradá Yehova. Pero pa personanan inhustu, e kargadónan di e mensahe ei ta manda, segun e tradukshon di Beibel na papiamentu koriente, “un holó stinki i mortal.” Sí, e sentido figurativo di hole di hende malbado ta asina trosí dor di Satanas su sistema di kosnan ku nan ta sinti nan inkómodo òf asta agresivo den presensia di esnan ku ta manda e “holó dushi di Kristu.” Di otro banda, esnan ku yen di entusiasmo ta plama e bon nobo ta bira ‘un holó dushi di Kristu meimei di esnan ku ta wòrdu salbá.’ (2 Korintionan 2:14-16) E personanan ei di kurason onrado hopi bes ta sinti nan disgustá pa e hipokresia i mentiranan religioso ku ta karakterisá religion falsu. P’esei, ora nos habri e Palabra di Dios i kompartí e mensahe di Reino ku nan, nan ta sinti nan atraí na Kristu i nan ke siña mas.—Juan 6:44.

Pues no sinti bo deskurashá ora ku algun hende ta reakshoná negativo riba e mensahe di Reino. Mas bien, mira e “holó dushi di Kristu” komo un forma di protekshon spiritual ku ta kore ku hopi persona ku por representá un peliger pa e lugá spiritual ku e pueblo di Dios ta biba aden, miéntras ku e ta atraé esnan di bon kurason.—Isaias 35:8, 9.

Debí ku e sòldánan griego na Máratòn a marcha pegá-pegá riba otro i a gara nan eskudo ku tur nan forsa, nan a gana e bataya apesar di tabatin un desbentaha grandi. Di igual manera, Yehova su Testigunan leal ta haña e garantia ku nan lo tin un viktoria kompletu den nan guera spiritual, pasobra esei ta nan “herensia.” (Isaias 54:17) P’esei laga kada un di nos sigui buska refugio den Yehova dor di tene “duru na e palabra di bida.”—Filipensenan 2:16.

[Plachinan na página 31]

‘E sabiduria di ariba ta puru, despues pasífiko’