Eklesiástes 7:1-29
7 Un bon nòmber* ta mihó ku bon zeta,+ i e dia di un hende su morto ta mihó ku e dia di su nasementu.
2 Mihó bai un kas kaminda hende ta na luto ku bai un kas kaminda tin fiesta,*+ pasobra morto ta pone un fin na bida di tur hende. E hendenan ku ta na bida mester keda kòrda esei.
3 Mihó yora ku hari,+ pasobra tristesa ta yuda bo bira un mihó persona.*+
4 Un hende sabí ta pensa seriamente riba bida ora e ta na un kas kaminda hende ta na luto. Sinembargo, un hende bobo ta pensa riba plaser* so.+
5 Mihó bo hasi kaso ora un hende sabí korigí bo+ ku bo sinta skucha kantika di hende bobo.
6 Harimentu di hende bobo+ ta zona manera krakmentu di sumpiña ku ta kima bou di wea; esei tambe ta algu sin sentido.
7 Opreshon por pone un hende sabí aktua manera hende loko, i soborno ta korumpí kurason.+
8 Mihó fin di un asuntu ku su kuminsamentu. Mihó tene pasenshi ku desplegá un aktitut* arogante.+
9 No sea lihé pa rabia,*+ pasobra ta hende bobo ta rabia lihé.*+
10 No puntra: “Dikon ántes tabata mihó ku awendia?” Un pregunta asina no ta reflehá sabiduria.+
11 Sabiduria huntu ku un herensia ta algu bon. Sí, esei ta algu benefisioso pa tur hende.*
12 Sabiduria ta protekshon,+ meskos ku plaka ta protekshon.+ Sinembargo, e bentaha di konosementu huntu ku sabiduria ta ku nan ta salba bida di nan doño.+
13 Reflekshoná riba e obranan di e Dios berdadero. Ken por stret loke Dios a trose?*+
14 Ora un dia bai bon, abo tambe mustra bondat.+ Sinembargo, ora un dia ta yen di difikultat,* kòrda ku Dios ta permití tantu dia bon komo dia yen di difikultat.+ Hende no sa* kiko lo pasa ku nan den futuro.+
15 Durante mi bida pasahero,*+ mi a mira hopi kos: Hende hustu ta muri apesar ku nan ta hustu,+ i hende malbado ta biba largu aunke nan ta hasi maldat.+
16 No sea muchu hustu den bo bista,+ ni no sea demasiado sabí.+ Pakiko destruí bo mes?+
17 No skohe pa hasi malu, ni no hasi kos di bobo.+ Pakiko bo mester muri promé ku bo ora?+
18 Ta bon pa bo hasi kaso di ámbos konseho, tantu e promé konseho* komo e di dos konseho.*+ Hende ku tin rèspèt profundo pa Dios* ta hasi kaso di ámbos konseho.
19 Sabiduria ta hasi un hende sabí mas poderoso ku dies hòmber fuerte den un stat.+
20 No tin niun hende hustu riba tera ku semper ta hasi loke ta bon i ku nunka no ta peka.+
21 No tuma muchu na serio tur palabra ku hende papia,+ pasobra bo por tende bo sirbidó papia malu di bo.*
22 Bo* sa bon bon kuantu biaha abo tambe, sí abo mes, a papia malu di otro hende.+
23 Danki na sabiduria, mi a logra investigá tur e kosnan ei. Mi a bisa: “Lo mi bira masha sabí,” pero mi no por a logra bira asina sabí.
24 Hende no tin kapasidat pa komprondé tur kos; tin kos masha difísil pa komprondé. Ken por komprondé tur kos?+
25 Mi a disidí di hasi algun investigashon pa mi por a komprondé algun kos. Mi a buska pa haña sa kiko ta sabiduria. Ademas, mi kier a komprondé dikon ta malu pa un hende komportá su mes na manera bobo i dikon ta un bobedat pa un hende komportá su mes manera hende loko.+
26 I mi a deskubrí esaki: Tin hende muhé ku ta manera nèt di yagdó. Nan kurason ta manera reda, i nan mannan ta manera kadena di prizòn. Un hende muhé asina ta pió* ku morto. Hende ku ta agradá e Dios berdadero lo skapa di un muhé asina,+ pero un pekadó ta kai den e trampanan di un muhé asina.+
27 E maestro*+ ta bisa: “Tende; esaki ta loke mi a deskubrí. Mi a investigá vários kos, un kos tras di otro, i mi a yega na un konklushon.
28 Loke mi tabata buska kontinuamente, mi no a haña. Entre mil hende, mi a haña un solo hòmber hustu, pero mi no a haña ni un hende muhé hustu entre mil hende.
29 Loke mi a deskubrí por ser resumí na e manera akí: E Dios berdadero a krea hende rekto,+ pero hende a sigui nan mes kaminda.”*+
Nota
^ Òf: “Un bon reputashon.” Lit.: “Un nòmber.”
^ Òf: “bankete.”
^ Òf: “ta laga bo kurason sinti mihó.”
^ Òf: “dibertishon.”
^ Lit.: “spiritu.”
^ Òf: “pa sinti bo ofendí.”
^ Òf posiblemente: “pasobra esei ta karakterístika di hende bobo.”
^ Òf: “pa tur hende ku ta mira lus di dia.”
^ Òf: “a dobla?”
^ Òf: “no por sa sigur.”
^ Òf: “Pero riba dia di kalamidat.”
^ Òf: “bida sin sentido.”
^ Esta, loke a ser menshoná na versíkulo 16.
^ Esta, loke a ser menshoná na versíkulo 17.
^ Lit.: “maldishoná bo.”
^ Lit.: “Bo kurason.”
^ Lit.: “ta mas marga.”
^ E palabra hebreo ku a ser tradusí aki komo “maestro” ta referí na un persona ku tabata reuní hende òf na un persona ku tabata konvoká un reunion.
^ Òf: “pero hende a traha nan propio plannan.”
