Di Dos Karta pa Timoteo 4:1-22
4 Kristu Hesus lo husga hende+ bibu i hende morto+ ora ku e revelá su mes klaramente+ i ora ku e ta goberná den su Reino.+ Mi ta ordená bo seriamente, ku Kristu Hesus i Dios komo testigu:
2 Prediká palabra di Dios.+ Hasi esei ku urgensia,* den tempu faborabel i den tempu difísil. Korigí hende;+ spièrta nan seriamente, i animá nan. Hasi tur esei ku masha pasenshi i manera un bon maestro.*+
3 Pasobra lo yega un tempu ku hende lo rechasá siñansa ku ta benefisiá nan.*+ Anto, pa satisfasé nan mes deseonan, nan lo buska maestro ku ta konta nan loke nan tin gana di tende.*+
4 Nan lo sera nan orea pa nan no skucha e bèrdat, i nan lo presta atenshon na kuenta falsu.
5 Pero abo, usa bo kapasidat di pensa den tur sirkunstansia.* Bo mester soportá difikultat;+ hasi e trabou di un predikadó di e bon notisianan,* i kumpli ku bo sirbishi pa Dios kabalmente.+
6 Ami ta manera un ofrenda di bibida* ku ta ser bashá riba altar,+ i e tempu di mi liberashon*+ ta hopi serka.
7 Mi a hiba e bon lucha;+ mi a kore e kareda te final,+ i mi a keda ku mi fe den Dios.
8 Awor, Señor, e hues hustu,+ tin un korona reservá pa mi. E korona ei ta pa e hendenan ku ta hustu.+ Lo e duna mi e korona ei komo rekompensa riba e dia stipulá.+ Sinembargo, lo e no duna ami so esei, sino tambe tur e personanan ku ta anhelá pa e tempu ku lo e revelá su mes.
9 Por fabor, hasi tur bo esfuerso pa bini pronto serka mi,
10 pasobra Démas+ a bandoná mi komo ku e tabata stima e mundu* akí. El a bai Tesalónika. Kresente a bai Galasia, i Tito a bai Dalmasia.
11 Ta Lúkas so ta huntu ku mi. Trese Marko ora bo ta bini, pasobra lo e por yuda mi bon den mi sirbishi na Dios.
12 Pero Tikiko,+ mi a manda bai Efeso.
13 Ora bo ta bini, trese e paña di wenter, ku mi a laga na Tróas na kas di Karpo, i e ròlnan,* foral e pèrkamèntnan.*
14 Aleksander, un artesano di koper, a hasi mi hopi daño. Yehova* lo dun’é su pago meresí.+
15 Abo tambe mester tene kuidou kuné, pasobra el a oponé nos mensahe fuertemente.
16 E promé biaha akí ku mi mester a defendé mi mes dilanti di outoridat, niun hende no a bin yuda mi; nan tur a bandoná mi. Mi ta spera ku Dios lo no tene nan responsabel pa esei.
17 Pero Señor a para band’i mi, i el a duna mi poder, pa asina mi por a prediká e bon notisianan kabalmente i hende di tur nashon por a tende esei.+ Ademas, Señor a libra mi for di boka di leon.+
18 Señor lo libra mi di tur loke ta malu, i lo e salba mi i hiba mi den su Reino selestial.+ Señor meresé gloria pa tur eternidat. Amèn.
19 Kumindá Priska* i Akila+ i e hendenan di kas di Onesíforo.+
20 Erasto+ a keda na Korinto, pero mi a laga Trófimo+ na Mileto pasobra e tabata malu.
21 Por fabor, hasi tur bo esfuerso pa yega promé ku wenter.
Eubulo ta manda kumindamentu, i tambe Pudente, Lino, Klaudia i tur e rumannan.
22 Señor bendishoná bo pa e bon aktitut ku bo ta demostrá. Mi ta pidi p’e mustra boso bondat inmeresí.
Nota
^ Òf: “sin pèrdè tempu; ku zelo.”
^ Òf: “i ku arte di siña.”
^ Òf: “maestro ku ta kishikí nan orea.”
^ Òf: “ku ta saludabel; ku ta probechoso.”
^ Òf: “mantené bo sano huisio den tur kos.”
^ Òf: “sigui prediká e bon notisianan.”
^ Òf: “mi morto.”
^ Esakinan tabata ròl trahá di kueru di bestia.
^ Lit.: “bukinan chikitu.” Na griego, biblía. For di esaki a bini e palabra “Beibel.”
^ Konosí tambe komo Priskila.
