Di Dos Karta pa Timoteo 2:1-26
2 P’esei, mi yu,+ sigui pidi Dios pa duna bo forsa pa medio di e bondat inmeresí ku Kristu Hesus ta demostrá.
2 I e kosnan ku bo a tende serka mi, i ku a ser konfirmá pa hopi testigu,+ siña nan na hòmber konfiabel. E ora ei, e hòmbernan ei lo ta kapasitá pa siña e kosnan ei na otro hende.
3 Komo un bon sòldá+ di Kristu Hesus, sea dispuesto pa pasa den sufrimentu.+
4 Un hende ku ta sirbi komo sòldá lo no bai hasi otro trabou pa gana sèn,* pasobra e ke haña aprobashon di e persona ku a tum’é den servisio komo sòldá.
5 I ora un atleta ta kompetí den e weganan, e no ta risibí premio* si e no kompetí segun e reglanan di wega.+
6 Ademas, wak un kunukero ku ta traha duru. Ta na su lugá ku e ta e promé persona ku ta kome di e kosecha di su kunuku.
7 Keda pensa riba loke mi ta bisa bo. Señor lo yuda bo komprondé tur e kosnan ei.*
8 No lubidá ku Hesukristu a ser lantá for di morto+ i ku e tabata un desendiente* di David.+ Esei ta e bon notisianan ku mi ta prediká.+
9 Pa motibu di e bon notisianan ei, mi ta sufri i mi ta den prizòn komo un kriminal.+ Pero niun hende no por frena palabra di Dios.*+
10 P’esei mi ta sigui wanta tur kos pa benefisiá e rumannan ku Dios a skohe,+ pa asina nan tambe por ser salbá pa medio di Kristu Hesus, i nan por haña gloria* eterno.
11 Loke mi ta bai bisa ta bèrdat: Si nos a muri huntu kuné, nos lo biba tambe huntu kuné.+
12 Si nos sigui perseverá, nos lo reina tambe komo rei huntu kuné.+ Si nos bisa ku nos no konos’é, e tambe lo bisa ku e no konosé nos.+
13 Si nos ta infiel, e sí ta keda fiel, pasobra e no por aktua kontrali na e persona ku e ta.*
14 Sigui kòrda e rumannan di e kosnan ei; duna nan instrukshon* dilanti di Dios pa no pleita tokante palabra,* pasobra esei no ta yuda ku nada. Al kontrario, esei ta kousa daño na fe di* e hendenan ku ta skucha.
15 Hasi tur bo esfuerso pa presentá bo mes na Dios komo un hende ku e ta aprobá, sí, komo un hende ku ta traha duru i* ku no tin bèrgwensa di e trabou ku el a hasi i ku ta siña i splika hende e mensahe di e bèrdat* na e manera korekto.+
16 Pero no skucha kòmbersashon ku no ta yuda ku nada i ku ta mustra falta di rèspèt pa loke ta santu,+ pasobra e kòmbersashonnan ei* lo pone hende alehá mas i mas di Dios.
17 I e mensahe di hende ku ta hiba e tipo di kòmbersashonnan ei lo plama manera gangrena.* Himeneo i Fileto ta entre e hendenan ku a plama e tipo di mensahenan ei.+
18 E dos hòmbernan ei a bandoná e bèrdat, i nan ta bisa ku e resurekshon a tuma lugá kaba.+ Anto nan ta pone algun hende pèrdè nan fe.
19 Apesar di esei, Dios a pone un fundeshi sólido ku ta keda firme i ku ta seyá ku e inskripshon akí: “Yehova* konosé e hendenan ku ta pertenesé na dje,”+ i ku e inskripshon akí: “Tur hende ku ta konfia den* e nòmber di Yehova* mester bandoná loke ta inhustu.”+
20 Den un kas grandi tin artíkulo di uso* di oro i di plata, pero tin di palu i di klei tambe. Hende ta usa algun di e artíkulonan ei pa un bon propósito,* pero algun di nan ta pa un propósito bergonsoso.*
21 Pues, si un persona keda leu for di hende ku ta manera e artíkulonan di uso ku ta pa un propósito bergonsoso, e persona ei lo ta manera e artíkulonan di uso ku ta pa un bon propósito. E persona ei lo ser santifiká;* lo e ta útil pa su doño, i lo e ta prepará pa tur bon obra.
22 Pues, hui for di e deseonan ku hende tin den nan hubentut. Sigui hasi esfuerso pa hasi loke ta korekto, i pa demostrá fe i amor i pa buska pas. Hasi esei miéntras ku bo ta keda den kompania di e hendenan ku ta konfia den* Señor i ku tin un bon kurason.
23 Ademas, no partisipá den diskushon bobo i sin pia sin kabes,+ pasobra bo sa ku eseinan ta hiba na pleitu.
24 Un esklabo di Señor no tin nodi di pleita. Mas bien, e mester ta amabel ku tur hende.*+ E mester ta kapasitá pa siña otro hende. E mester ta un persona ku ta dominá su mes ora hende hasi malu kuné.+
25 E mester instruí hende ku tin un aktitut rebelde na un manera suave.+ Tal bes Dios ta yuda e hendenan ei arepentí,* pa asina nan por haña un konosementu eksakto di e bèrdat.+
26 Esei lo yuda nan rekobrá nan sano huisio i skapa for di e trampa di Diabel, pasobra Diabel a gara nan pa nan hasi su boluntat.+
Nota
^ Òf posiblemente: “lo no okupá su mes ku e kosnan di bida diario.”
^ Òf: “korona; krans.”
^ Òf: “lo duna bo disernimentu den tur kos.”
^ Lit.: “simia.”
^ Lit.: “Pero palabra di Dios no ta na kadena.”
^ Òf: “bendishon.”
^ Òf: “e no por aktua na un manera ku ta bai kontra di su normanan.”
^ Òf: “duna nan testimonio kabal.”
^ Òf: “siñansa.”
^ Òf: “ta destruí; ta tumba.”
^ Òf: “splika palabra di Dios.” Lit.: “e palabra di e bèrdat.”
^ Lit.: “un trahadó.”
^ Òf: “pasobra e personanan ku ta hiba tipo di kòmbersashon asina.”
^ Gangrena ta un malesa ku ta pone karni di hende putri.
^ Òf: “ku ta invoká; ku ta karga.”
^ Òf: “un propósito onorabel.” Esaki ta inkluí artíkulo di uso pa kome, bebe i kushiná.
^ Òf: “un propósito sin onor.” Esaki ta inkluí artíkulo di uso pa deshasí di sushi.
^ Òf: “tin wea.”
^ Òf: “ku ta invoká.”
^ Òf: “mester trata tur hende ku takto.”
^ Òf: “ta yuda nan kambia nan manera di pensa.”
