Siopa Kasi Si Jehova?

 PAPALASPASAN toy susupoken ton katakelan diad Cambodia, si Henri Mouhot, sakey a Pranses a managdiskobre nen koma-19 siglo, so akasabi’d maawang a banawang a mamapaliber ed sakey a templo. Satan imay Angkor Wat, say sankabalgan a relihyoson monumento ed dalin. Kanengneng to et naibaga nen Mouhot a saray asakbongay lamuyak iran paalagey et ginaway too. “Impaalagey na agkabkabat a kadaanan a managpaalagey a singa si Michelangelo,” so insulat to, “satan so mas abalbaleg nen saray kera na dinanman ya arkitektural a paalagey a denisinyoy Gresya odino Roma.” Anggaman ed inkataynan tan inkapaulyan na saratan ed dakel lan siglo, agto nanduaruwaan a diad benegan na marakerakep iran paalagey et wala so managdesinyo.

Makapainteres, nausar ed sakey a libro na kakabatan a nisulat ed dakel lan sigloy linmabas so mipadparan panagkatunongan, a mangisasalaysay: “Ta amin ya abung pinaalagey na bengatlan too; balet say amaalagey ed saray amin a bengatla sikato so Dios.” (Hebreos 3:4) Balet nayarin ikuan na arum, ‘Say ikukurang na palsa so miduma ed ginaway too.’ Balet, aliwan amin a sientista so onabobon ed satan ya isusuppiat.

Kayari ton inawat a “saray biochemical system et aliwan agmabilay iran bengatla,” intepet nen Michael Behe, associate professor na biochemistry diad Lehigh University, Pennsylvania, E.U.A.: “Kasin say mabilay iran biochemical system et situtudion nadesinyo?” Intuloy ton impanengneng a saray sientista so mangidedesinyo la natan na manunan pananguman ed mabilay iran organismo diad panamegley na saray metodon singa say genetic engineering. On, say namparan  agmabilay tan mabilay iran bengatla so “nagawaan”! Susurien so mikroskopikon mundo na mabilay iran selula, impaimano nen Behe iray makapakelkelaw a komplikadon sistema a tugyopen na saray kabiangan a mandedependian pian onkurang. Say konklusyon to? “Say resulta na sarayan impantetekep a sagpot pian surien so selula​—pian surien so bilay ed molekular a sukat​—et malinew a mangipanengneng a say selula et produkto na ‘impanesinyo!’”

Siopa sirin, so Managdesinyo a walad benegan na sarayan amin a komplikadon sistema?

Siopa so Managdesinyo?

Say ebat so walad kadaanan a libro na kakabatan ya akadkaunan sinaglawi—say Biblia. Diad manangilukas iran salita to, eebatan na Biblia tekep na makatantandan inkasimpli tan inkalinew so tepet a no siopay angidesinyo na amin a bengatla: “Sanen gapo say Dios pinalsa to so saray tawen tan say dalin.”​—Genesis 1:1.

Balet, diad pangiduduma to’d inkasikato manlapud arum ya ibabagan Dios, impaamta na Manamalsa so inkasikato diad nikadkaduman ngaran: “Onia so kuan na Dios a Jehova, a sikato so Amalsa ed saray tawen . . . , Sikato ya angilaknab na dalin tan say ompaway ed sikato; Sikato a mangiter na panlinawa na saray totoo ed tapew to.” (Isaias 42:​5, 8) Jehova so ngaran na Dios ya angidesinyoy uniberso tan nanggawa’d totoo diad dalin. Balet siopa kasi si Jehova? Sikatoy anton klase na Dios? Tan akin a sikatoy kaukolan mon talinengen?

Kabaliksan na Ngaran To

Unona’d amin, anto so kabaliksay ngaran na Manamalsa, a Jehova? Say madibinon ngaran so nisulat ed apatiran Hebreon letra (יהוה) tan pinmatnag a ngalngalin 7,000 danay ed Hebreon kabiangan na Biblia. Inkonsidera iyan ngaran diad causative form na Hebreon berbon ha·wahʹ (“pian magmaliw”) tan sirin et mankabaliksay “Pagmaliwen To.” Diad arum a salita et sikakabat a pagmamaliwen nen Jehova so inkasikato ed antokaman a kaukolan ton pagmaliwan ta pian nasumpal iray  gagala to. Sikatoy magmamaliw a Manamalsa, Ukom, Manangilaban, Mananustini na Bilay, tan arum ni, ta pian nasumpal toray sipan to. Niarum ni, say Hebreon berbo so inusar ed gramatikon porma a mankabaliksay aksion a nasusumpal la. Saya so mangipabitar a si Jehova et siansian pagmamaliwen toy inkasikato a mananumpal ed saray gagala to. On, sikato so mabilay a Dios!

Matalonggaring a Kualidades nen Jehova

Ipapanengneng na Biblia a sayan Manamalsa tan mananumpal ed sipasipan to so makapasagyat a tuloy a persona. Imparungtal a mismo nen Jehova iray nikadkaduman kualidad to ya inkuanton: “Jehova, Jehova, Dios a mapangasi tan mapaaro, mapalna ya onsanok, tan daakan ed maaro ya abig na linawa, tan katuaan; a mangigagana na maaro ya abig na linawa ed saray nilibo, mamerdona na inkauges, tan impakasumpa, tan kasalanan.” (Exodo 34:​6, 7) Adeskribe si Jehova bilang Dios na maaron abig na linawa. Say Hebreon salita a nausar dia so nipatalos a “matoor ya aro.” Diad panusumpal to’d magnayon a gagala to, matoor ya ipapanengneng nen Jehova so aro ed saray palsa to. Agmo ta pablien so ontan a panangaro?

Si Jehova so mapalna met ya onsanok tan maples a mamerdona ed saray kalilingoan tayo. Makapaligsay-puso so onapit ed ontan a persona ya agmanaanap na lingo noagta mabulos a mamerdona ed sikatayo. Balet ta agto labay ya ibagan aabuloyan toy gawan-mauges. Inyabawag to: “Siak, si Jehova, aroen ko so inkatunong, gulaen ko so pantakew pati inkauges.” (Isaias 61:8) Bilang Dios na inkahustisya, agto magnayon ya abuloyan iray malangas a managkasalanan a mansiasiansia’d karelmengan da. Kanian, makakaseguro itayo a diad dugan panaon to, ipetek nen Jehova so ag-inkahustisya ed mundon walad kaliberliber tayo.

Say panmantini ed naspot ya inkasimbang na saray kualidad na aro tan inkahustisya so mankaukolay kakabatan. Sisimbangen nen Jehova irayan duaran kualidad diad makapakelaw a dalan sano pidedenengan  to itayo. (Roma 11:​33-36) Siempre, nanengneng so kakabatan to ed amin a pasen. Paneknekan itan na saray pankelawan ed palsa.​—Salmo 104:​24; Uliran 3:19.

Balet, agmagenap so pakawalaay kakabatan. Pian nitarok ed kompleton kasumpalan so inggagala to, say Manamalsa so nepeg met a walaay nagnap a pakayari. Ipapanengneng na Biblia a sikato so ontan a Dios: “Itangay yo so saray mata yo ed tagey, tan nengnengen yo no siopa so amalsa ed saraya, a Sikato alaen to so saray ehersito ra ed bilang . . . Lapu ed kabaleg a tuloy na biskeg to ed pakapanyari, . . . anggapo so kulang anggan sakey.” (Isaias 40:26) On, walaan si Jehova na ‘baleg a tuloy a biskeg ed pakapanyari,’ a walad panangimando to pian nasumpal so linawa to. Agta nasagyat ka ed si Jehova lapud ontan iran kualidad to?

Saray Gungguna na Pakapikabat ed si Jehova

Si Jehova et “pinalsa to [so dalin] ya aliwa a kibalatar,” balet “tinibukel to ta pian sikato so panayaman” na saray totoo a walaay makabaliksan a siglaotan ed sikato. (Isaias 45:18; Genesis 1:28) Iyaansakit toy mangaraldalin iran palsa to. Inikdan toy katooan na ayadyarin gapoan diad sakey a singa-harden ya ayaman, sakey a paraiso. Saray totoo, diad biang da, so manederal ed satan, a kainglit a tuloy nen Jehova. Ingen, mitunosan ed ipapatnag na kabaliksay ngaran to, sumpalen nen Jehova so orihinal a gagala to parad katooan tan say dalin. (Salmo 115:​16; Apocalipsis 11:18) Ipawil toy Paraiso ed dalin parad saramay mabulos ya ontulok ed sikato bilang ananak to.​—Uliran 8:​17; Mateo 5:5.

Dedeskribien na sampot a libroy Biblia so kualidad na bilay a napanggayagaan mo’d satan a Paraiso: “Punasen to so amin a lua ed kamataan da; tan andi gapo la naani ipatey; tan anggapo la naani onnangis o dageyem, o ot-ot: Ta saray ona a bengatla sikara so linmabas la.” (Apocalipsis  21:​3, 4) Satan so peteg a bilay a kaliktan nen Jehova a panggayagaan mo. Sikatoy agaylan abig ya Ama! Kasin mabulos kan manaral a nagkalalo nipaakar ed sikato tan no antoy kakaukolanen ed sika pian manbilay ed Paraiso?

Likud no sananey so nipanengneng, amin ya inaon ed Biblia et manlalapud say Pangasinan a Biblia a PBS tekep na modernon ortograpiya.