IBhayibhili Liyamntshintsha Umuntu
KUYINI enye indoda yeScotland eyakubona kuqakatheke ukwedlula ukuba lebhizimusi eyayisenza imali? Indoda yeBrazil yancedwa kuyini ukuthi itshiye ukungaziphathi lokubhema izidakamizwa? Kuyini okwanceda indoda ehlala eSlovenia yenelisa ukutshiya ukunatha kakhulu utshwala? Bala uzwe ukuthi bathini.
“Ngangikhomba Ngophakathi.”—UJOHN RICKETTS
UMNYAKA WOKUZALWA: 1958
ILIZWE AZALELWA KULO: ESCOTLAND
IMBALI: NGANGINGUMUNTU WEZIMALI ZAKHE
KUDALA KWAMI: Ngakhulela emulini enothileyo. Ubaba wayeyisikhulu sebutho leBritain, yikho imuli yangakithi yayihlala ithutha. Sake sahlala eScotland, e-England, eGermany, eKenya, eMalaysia, e-Ireland leCyprus. Sengileminyaka engu-8 ngasengifunda ebhodingi eScotland. Ngaqeda isikolo eCambridge University.
Ngileminyaka engu-20, ngavula ibhizimusi yamafutha ezimota. Ekuqaliseni ngangisebenzela eSouth America, ngasengisuka ngaya e-Africa ngacina sengisentshonalanga ye-Australia. Ngathi sengise-Australia, ngavula ibhizimusi engacina ngiyithengisa.
Imali engayithola lapho yayinengi kakhulu okokuthi kwasekungaselasidingo sokuthi ngisebenze. Yikho ngayekela ukusebenza ngileminyaka engu-40. Ngasebenzisa isikhathi leso engasengilaso ukuthi ngizivakatshele. Ngabhoda i-Australia yonke kabili ngihamba ngomdududu, ngaphinda ngabhoda umhlaba wonke. Ngangikhomba ngophakathi!
INDLELA IBHAYIBHILI ELANGITSHINTSHA NGAYO: Ngingakatshiyi ukusebenza, ngangidinga indlela zokubonga uNkulunkulu ngempilo enhle ayengiphe yona. Yikho ngaqalisa ukuya etshetshi ye-Anglican engangikhulele kuyo. Kodwa akula lutho olutheni engalufundayo oluvela eBhayibhilini. Ngatshiya ngaqalisa ukufunda lamaMormon, kodwa ngacina ngisekela ngoba ababekufundisa kwakungasekelwanga eBhayibhilini.
Ngelinye ilanga oFakazi bakaJehova bafika emzini wami. Ngananzelela ukuthi lokho ababekufundisa kwakuvela eBhayibhilini. Enye ivesi abangitshengisa yona ngu-1 Thimothi 2:3, 4. Amavesi la athi intando kaNkulunkulu yikuthi “abantu bemihlobo yonke basindiswe njalo bathole ulwazi oluqondileyo lweqiniso.” Engakuthanda kakhulu ngoFakazi yikuthi babegcizelela ukuthi sithole ulwazi oluqondileyo olusekelwe eBhayibhilini hatshi ukuba lolwazi nje.
Ukufunda iBhayibhili laboFakazi bakaJehova kwanginceda ngathola iqiniso. Ngokwesibonelo ngabakwazi ukuthi uNkulunkulu loJesu ngabantu ababili abatshiyeneyo. (UJohane 14:28; 1 KwabaseKhorinte 11:3) Ngathokoza ngisibakwazi iqiniso lelo. Ngananzelela ukuthi ngangidlalise isikhathi eside ngilokhe ngizama ukuzwisisa amanga esasiwafundiswa emasontweni.
Ngaqalisa ukuhamba emihlanganweni yaboFakazi bakaJehova. Ngananzelela ukuthi abantu bonke babelomusa futhi beziphethe kuhle. Indlela ababethandana ngayo yangenza ngabona ukuthi ngasengiyitholile inkolo yeqiniso.—UJohane 13:35.
INDLELA ENGISIZAKALE NGAYO: Ngemva kokubhabhathizwa ngaqalisa ukuthandana loDiane. Yena ukhulele emulini yaboFakazi futhi wayelobuntu obuhle kakhulu obenza ngamthanda ngacina sengitshade laye. UJehova ungibusisile sibili ngokungipha umngane ongithandayo futhi ongisekelayo.
Mina lomkami saba lesifiso esikhulu sokuthuthela endaweni elabatshumayeli bezindaba ezinhle abalutshwana. Ngo-2010 sathutha saya eBelize, eCentral America. Abantu abasendaweni le bayamthanda uNkulunkulu futhi bakulambele ukufunda iqiniso eliseBhayibhilini.
Ukubakwazi iqiniso ngoNkulunkulu kanye leBhayibhili kungenze ngahlaliseka. Ngazinikela ukutshumayela isikhathi sonke futhi lokhu kwenze ngakholisa ukufundisa abantu abanengi iBhayibhili. Akulanto emnandi njengokubona iqiniso eliseBhayibhilini linceda omunye umuntu empilweni ngendlela lami elanginceda ngayo. Ngimbonga ngingaqedi uNkulunkulu ngentokozo le angiphe yona.
“Uyazi Babelomusa.”—UMAURÍCIO ARAÚJO
UMNYAKA WOKUZALWA: 1967
ILIZWE AZALELWA KULO: EBRAZIL
IMBALI: NGANGINGAZIPHATHANGA
KUDALA KWAMI: Ngakhulela e-Avaré, indawo eseSão Paulo. Abantu abanengi endaweni le bangabayanga.
Ubaba wabhubha ngingakazalwa. Ngisasengumfanyana ngangithanda ukugqoka izigqoko zikamama nxa engekho. Ngangisenza angathi ngiyinkazana yikho abantu bacina sebesithi ngiyisitabane. Kungakayingaphi ngasengisiya emacansini labanye abafana kanye lamadoda.
Ngathi sengileminyaka engaba ngu-20 ngasengidinga abantu engingalala labo kungelani lokuthi ngabesilisa kumbe ngabesifazana. Ngangijayele ukubathola emabhawa, emaphathini ngitsho lasemasontweni. Ngesikhathi samaholideyi ngangigqoka njengabantu besifazana besengigida njalo ngasengisaziwa kakhulu.
Ngalesosikhathi ngasengilabangane abanengi kakhulu abanye babo babeyizitabane, abanye bengamawule ikanti abanye babephila ngezidakamizwa. Abanye babo bangiyenga ukuthi ngizame omunye umhlobo wezidakamizwa futhi kungakayi ngaphi lami ngasengithathekile. Kwezinye izikhathi sasibhema ubusuku bonke. Kwamanye amalanga ngangitshona ilanga lonke ngibhema ngingedwa. Ngacaka abantu baze bacabanga ukuthi ngile-AIDS.
INDLELA IBHAYIBHILI ELANGITSHINTSHA NGAYO: Ngalezonsuku ngahlangana laboFakazi bakaJehova. Uyazi babelomusa. Enye ivesi abangibalela yona nguRoma 10:13, othi: “Wonke umuntu obiza ibizo likaJehova uzasindiswa.” Ivesi le yangitshengisa ukuthi kuqakathekile sibili ukusebenzisa ibizo likaNkulunkulu elithi Jehova. Ngangisithi nxa sengibheme ubusuku bonke ngivule iwindi, ngithandaze kuJehova ngikhala ngimcela ukuthi angincedise.
Umama kwakumkhathaza kakhulu ukubona indlela izidakamizwa ezazingiqeda ngayo yikho ngabona kungcono ukuthi ngitshiyane lazo. Ngaqalisa ukufunda laboFakazi bakaJehova. Bangitshela ukuthi engizakufunda kuzanginceda ukuthi ngitshiyane lezidakamizwa, lakanye yikho kanye okwenzakalayo.
Kwakungalula ukutshiya imikhuba emibi engangilayo besengitshintsha indlela engangiphila ngayo. Phela ubutabane yinto engangivele ngasuka layo phansi yikho kwakunzima kakhulu ukuthi ngitshintshe. Kodwa okwanginceda kakhulu yikuthutha ngiyehlala kwenye indawo lokwehlukana labangane engangidlala labo kanye lokungayi emabhawa.
Lanxa lokhu kwakunzima, ukwazi ukuthi uJehova uyangithanda njalo uyabuzwisisa ubunzima engikubo kwakungiduduza kakhulu. (1 UJohane 3:19, 20) Ngatshiya yonke imikhuba emibi engangiyenza kwasokusithi ngo-2002 ngabhabhathizwa lami ngaba nguFakazi kaJehova.
INDLELA ENGISIZAKALE NGAYO: Indlela engatshintsha ngayo yamthokozisa kakhulu umama laye waseqalisa ukufunda iBhayibhili. Lanxa nje khathesi umama esesehluleka ukwenza okunengi ngenxa yokuthi watshaywa yi-stroke, usamthanda uJehova futhi kalithontisi iqiniso eliseLizwini lakhe.
Eminyakeni engu-8 edlulileyo bengisenkonzweni yesikhathi sonke, ngisebenzisa isikhathi sami esinengi ngifundisa abantu iBhayibhili. Iqiniso yikuthi lokhe ngisalwisana lazo izifiso ezimbi. Kodwa ukwazi ukuthi nxa ngingekela ukulandela izifiso zami ngiyabe ngithokozisa uNkulunkulu, kungenze ngaba lesibindi sokuqhubeka ngilwisa.
Ngiyathokoza kakhulu ngoba sengingumngane kaNkulunkulu futhi ngiphila ngendlela ayamukelayo.
“Ngangibukhelela Okuzwayo.”—ULUKA ŠUC
UMNYAKA WOKUZALWA: 1975
ILIZWE AZALELWA KULO: ESLOVENIA
IMBALI: NGANGIYINDLAMANZI
KUDALA KWAMI: Ngazalalelwa eLjubljana, isigodlo seSlovenia. Konke kwakuhamba kuhle ngaze ngaba leminyaka emine. Ubaba wazibulala. Ngemva kosizi lolu, umama kwasekumele asebenze gadalala ukuze anakekele mina lomnewethu.
Sengileminyaka engu-15 ngahamba ngayahlala logogo ozala umama. Kwakumnandi ukuhlala laye ngoba abangane bami abanengi babehlala eduze khonapho. Okunye okwakusenza kube mnandi yikuthi ngasengilenkululeko enengi ukwedlula leyo engangilayo ngisahlala ngekhaya. Sengileminyaka engu-16, ngaqalisa ukujayelana labantu ababesiyanatha ngempelaviki. Ngagcina inwele zami zabankulu, ngaqalisa ukugqoka butshapha futhi ngasengibhema.
Ngazama ukusebenzisa izidakamizwa ezitshiyeneyo kodwa engangikukholisa kakhulu yikunatha utshwaIa. Kungakayi ngaphi ngasenginatha okuzwayo okokuthi nxa ngidakiwe kwasekungasakhanyi. Izikhathi ezinengi wawusizwa ngomnuko emlonyeni wami ukuthi benginatha. Lanxa kunjalo kwakuyabe kungakhanyi ukuthi senginathe amambodlela amanengi kangakanani.
Izikhathi ezinengi mina labangane bami sasihamba emaphathini sibunathe okuzwayo kuze kube sebusuku. Lanxa ngangiyabe nginathe amambodlela amanengi kulabo, yimi engangibaqhuba ngibasa endlini. Ngelinye ilanga ngezwa omunye umngane wami etshela omunye esithi ngiyindlamanzi. Ibala lolimi lwesiSlovenia alisebenzisayo alilanhlonipho sibili. Ukuzwa lokhu kwangizwisa ubuhlungu.
Kwathi dlwe ngaqalisa ukucabangisisa ngempilo yami. Ngazibona ngingumuntu ongancedi ngalutho, ongakwaziyo lokuthi uphilelani.
INDLELA IBHAYIBHILI ELANGITSHINTSHA NGAYO: Ngalesosikhathi ngananzelela ukuthi omunye engangifunda laye wayesetshintshile eselomusa. Ngasengifuna ukwazi ukuthi kuyini okwenze watshintsha yikho ngamnxusa ukuthi sihambe sonke siyekudla ekhefa. Sathi sixoxa wangichasisela ukuthi wayeseqalise ukufunda iBhayibhili laboFakazi bakaJehova. Wangichathekela okunye ayekufunda kodwa kimi konke kwakukutsha ngoba ngangingakaze ngibale iBhayibhili kumbe ngiye etshetshi. Ngaqalisa ukuya emihlanganweni yebandla yaboFakazi njalo sengifunda labo iBhayibhili.
Ukufunda iBhayibhili kwangivula amehlo, ngabakwazi izinto ezinengi ezatshintsha impilo yami. Ngokwesibonelo ngafunda ukuthi isikhathi esiphila kuso iBhayibhili lisibiza ngokuthi ‘zinsuku zokucina.’ (2 KuThimothi 3:1-5) Ngafunda lokuthi sekuseduze ukuthi uNkulunkulu asuse abantu ababi emhlabeni futhi anike abalungileyo ithuba lokukholisa ukuphila kuze kube nini lanini epharadayisi. (IHubo 37:29) Lokhu kwangenza ngaba lesifiso esikhulu sokuthi ngitshiye ukwenza okubi ukuze lami ngibe phakathi kwabantu abalungileyo.
Ngaqalisa ukuxoxela abangane bami lokho engangikufunda eBhayibhilini. Abanengi babo babengihleka, kodwa indlela ababesenza ngayo yanginceda ngendlela engangingayikhangelelanga. Phela kwahle kwangitshengisa ukuthi babengasobangane beqiniso. Ngananzelela lokuthi ukunatha kwami kakhulu kwakubangelwa ngabangane engangijayelane labo ngoba akula okunye ababekuqakathekisa ngaphandle kokuthi balindele impelaviki ukuze baphinde badakwe futhi.
Ngatshiyana labo abangane labo ngasengidinga abanye ababengoFakazi bakaJehova. Ukuba laboFakazi kwakungikhuthaza ngoba ngabantu abathanda uNkulunkulu ngenhliziyo yonke futhi abazama ngamandla wonke ukuphila ngendlela ayifunayo. Kancane kancane, ngawutshiya umkhuba wokunatha kakhulu.
INDLELA ENGISIZAKALE NGAYO: Ngiyambonga kakhulu uJehova ngoba wanginceda ngabona ukuthi ngingathokoza lanxa nginganathanga utshwala. Angazi lokuthi aluba ngingaphi aluba ngaqhubeka ngiphila ngendlela engangiphila ngayo. Khathesi impilo yami isingcono kakhulu futhi ngiyathokoza.
Okweminyaka engu-7 edlulileyo ngibe lesibusiso sokuncedisa egatsheni laboFakazi bakaJehova eSlovenia. Ukwazi uJehova lokumkhonza kungenze ngathokoza empilweni futhi ngabakwazi ukuthi ngiphilelani.