Sicela usilandisele ngawe.

Ngazalwa ngo-1979 e-United States. Ngathi ngileminyaka engu-3 abazali bami badivosa. Umama wangikhulisa ngamasiko esiJuda futhi wangihambisa ezikolo zamaJuda. Ngathi ngileminyaka engu-7 sathuthela e-Israel okomnyaka owodwa njalo ngangifunda esikolo somphakathi esibizwa ngokuthi yi-kibbutz. Ngemva kwalokho sathuthela eMexico.

Lanxa kwakungelamasinagogi endaweni le, kangizange ngiwalahle amasiko esiJuda. NgeSabatha ngangilayitha amakhandlela, ngibale iTorah besengithandaza ngisebenzisa ibhuku lethu lemithandazo okuthiwa yisiddur. Esikolo ngangijayele ukutshela engifunda labo ukuthi inkolo yami yiyo yodwa eyeqiniso. Ngangingakaze ngibale iThestamenti Elitsha elikhuluma ngenkonzo kaJesu Khristu kanye lalokho ayekufundisa. Phela lomama laye wangixwayisa ukuthi ngingabali iThestamenti Elitsha ngoba ngemfundiso zalo zingangidukisa.

Yindaba manje wacina ubala iThestamenti Elitsha?

Ngathi ngileminyaka engu-17, ngabuyela e-United States ukuze ngiyeqedisa imfundo yami. Sengikhonale omunye umuntu engangimjayele owayengumKhristu wangitshela ukuthi impilo yami ngeke ibe lenjongo nxa ngingamazi uJesu.

Ngathi kuye, “Abantu abakholwa kuJesu balahlekile.”

Wangibuza wathi, “Sewake walibala yini iThestamenti Elitsha?”

Ngamphendula ngathi, “Hatshi.”

Wasesithi, “Manje ubona angani kuqondile yini ukuhle uyale into wena vele ungazi lutho ngayo?”

Lokho akutshoyo kwangithinta, ngoba ngangihlala ngikubona kuyibuthutha ukukhulumela into ongazi lutho ngayo. Ngayangeka ngasengithatha iBhayibhili lakhe ngahamba lalo endlini ngafika ngabala iThestamenti Elitsha.

Kuyini owakutholayo?

Ngamangala ngibona ukuthi ababhala iThestamenti Elitsha babe ngamaJuda. Njengoba ngangiqhubeka ngibala ngananzelela ukuthi uJesu wayengumJuda olomusa, owayethobekile futhi efuna ukuncedisa abantu ababephathwa kubi. Ngahamba lase-library ngisiyaboleka amabhuku ayekhuluma ngoJesu. Kodwa akula engakubalayo okwangenza ngakholwa ukuthi unguMesiya. Abanye abalobi babesithi uJesu unguNkulunkulu, kodwa kwakungelangqondo kimi lokhu ngoba wayeyabe ekhuluma lobani nxa wayethandaza. Kambe ukuthi wayethandaza kuye? Okunye yikuthi uJesu wafa, kodwa iBhayibhili lithi uNkulunkulu ‘kafi.’ a

Manje wenzani ukuze uthole impendulo zemibuzo yakho?

Iqiniso aliziphikisi yikho ngazimisela ukulidinga. Ngathandaza kuNkulunkulu ngenhliziyo yami yonke ngaze ngakhala lokukhala. Ngangiqala ngqa ukuthandaza ngingasebenzisi ibhuku lemithandazo. Ngathi ngiqeda nje ukuthandaza, ngezwa kulomuntu oqoqodayo. Kwakungomama ababili abangoFakazi bakaJehova. Banginika ibhuku futhi ibhuku lelo kanye lengxoxo ezalandela lapho laboFakazi zangenza ngaqiniseka ukuthi abakukholwayo bakuthatha eBhayibhilini. Ngokwesibonelo, oFakazi bakholwa ukuthi uJesu ‘yiNdodana kaNkulunkulu’ b lokuthi ‘uyisiqalo sezinto zonke ezadalwa nguNkulunkulu’ c hatshi ukuthi yena loNkulunkulu kanye lomoya ongcwele bangumuntu oyedwa.

Kungakayi ngaphi ngabuyela eMexico futhi ngaqhubeka ngitaditsha iziphrofetho ezimayelana loMesiya ngincediswa ngoFakazi. Ngasala ngibambe owangaphansi nginanzelela ukuthi zinengi kangaka iziphrofetho lezo! Kodwa ngangingazikholwa kangako. Ngangizibuza ukuthi, ‘NguJesu kuphela ogcwalisa iziphrofetho lezo?’ lokuthi ‘Kuthiwani nxa wayengumlingiswa ohlakaniphileyo nje kuphela odlala ingxenye leyo?’

Manje kuyini okwenza wacina uzikholwa?

OFakazi bangitshengisa iziphrofetho okwakungaba nzima ukuthi kube nguJesu ozenzelayo. Ngokwesibonelo, kusasele iminyaka edlula engu-700 ukuthi kwenzakale, umphrofethi uMikha wathi uMesiya wayezazalelwa eBhethilehema yeJudiya. d Phela akulamuntu ongazikhethela ukuthi ufuna ukuzalelwa ngaphi. U-Isaya yena wabhala ukuthi uMesiya uzabulawa njengesigebanga kodwa wayezangcwatshwa lezinothi. e Konke lokhu kwagcwaliseka kuJesu.

Obunye ubufakazi obangithintayo ngobumayelana losendo lukaJesu. IBhayibhili lathi uMesiya wayezavela kusendo lweNkosi uDavida. f Kudala amaJuda ayegcina imibhalo emayelana losendo lwabantu yikho aluba uJesu wayengaveli kusendo lukaDavida izitha zakhe zazingahle zikumemezele ebantwini bonke. Kodwa azizange zikwenze lokhu ngoba kwakusegcekeni ukuthi uJesu ngowosendo lukaDavida. Abantu babeze bambize ngokuthi ‘yiNdodana kaDavida.’ g

Ngo-70 C.E. ngemva kweminyaka engu-37 uJesu efile, amasotsha eRoma atshabalalisa iJerusalema futhi imibhalo yosendo lwabantu yalahleka kumbe yaloba. Yikho ukuze kwaziwe ukuthi uMesiya wayevela kuluphi usendo kwakumele abonakele u-70 C.E. engakafiki.

Owakufundayo kwakunceda njani?

UDutheronomi 18:18, 19 uthi uNkulunkulu uzavusela abako-Israyeli umphrofethi onjengoMosi. UNkulunkulu wathi loba ngubani “ongasoze alalele amazwi ami azawakhuluma ebizweni lami kuzamele alandise loba sekutheni.” Ukugebha ngijule eBhayibhilini lonke kwangenza ngangathandabuzi ukuthi uJesu weNazaretha wayengumphrofethi okwakukhulunywe ngaye.