Mu Bible tutañanga’mo myanda ya bantu bādi boloke kupwa baikala bakondame. Kimfwa kimo bidi i kya Mulopwe Solomone. Wāfundijibwe biyampe mashinda a Leza kadi Yehova wāmwesele bininge; inoko mwenda mafuku wāalamuka katōta baleza ba bubela. Bubi bwandi bwālobeje Yehova ne kulengeja muzo wa Isalela ususuke mu bula bwa myaka mivule. Bisonekwa binena’mba Solomone paāfwile, “walādikwa mwanda wa kukōkolokwa na bakulutuba bandi.” Mu bano’ba mubadilwa bana-balume ba kikōkeji pamo bwa Mulopwe Davida. (1 Ba. 11:​5-9, 43; 2 Ba. 23:13) Ino le muswelo waājīkilwe kyādi kilomboji kya amba ukasangulwa? Bible kanenene’popo kintu. Lusangukilo i kyabuntu kitamba kudi Leza wa buswe. Upananga’kyo ku boba bāsaka kupa mukenga wa kumwingidila nyeke. (Yoba 14:​13, 14; Yoa. 6:44) Lelo Solomone ukatambula kino kyabuntu? Yehova mwine ye uyukile; batwe ketuyukilepo. Inoko kyotuyukile i amba, Yehova ukalonga kyokya kyoloke. w24.05 p. 4 mus. 9

Shi tubepāna kudi Yehova twikalanga beni bandi mu pema wandi wa kyelekejo. Twikalanga’mo na byakudya bivule bya ku mushipiditu ne kupwana’mo na bantu bakwabo bekala bu beni ba Yehova. Pema wandi wa kyelekejo kadipo mu kifuko kimo. Uno pema utanwa konso kudi batōtyi ba Yehova ba kikōkeji. (Kus. 21:3) Le tunene namani pa bantu ba kikōkeji ke bafwe? Le tubwanya kunena’mba bakidi’nka beni mu pema wa Yehova? En-en! Mwanda waka tubwanya kunena namino? Mwanda bano bantu i bōmi mu luté lwa Yehova. Yesu wānenene amba: “Mwanda wa amba bafwile basangulwanga, ne Mosesa wāyukenye’o mu nsekununi ya kimuna kya miba paātelele Yehova bu ‘Leza wa Abalahama, Leza wa Izake, ne Leza wa Yakoba.’ Aye i Leza wa bōmi, ke wa bafwepo, aa, mwanda kwadi bonso i bōmi.”—Luka 20:​37, 38. w24.06 p. 3 mus. 6-7

Zadoki wāendele ku Hebelona mwilumbile byabulwi kadi mwiteakanye mwanda wa kulwa. (1 Bi. 12:38) Wāitabije na mutyima tō kwenda na Davida ku divita ne kulwila bene Isalela ku balwana nabo. Padi Zadoki kādipo sola wa bwino, inoko wādi mukankamane. Le i kudi ani kwēfundīle kitobo Zadoki kwikala na bukankamane? Wādi mujokolokwe na bana-balume bakomo kadi bakankamane. Na bubine, wēfundīle bivule ku kimfwa kyabo. Kimfwa, bukankamane bwa Davida bwa ‘kuludika Isalela mu malwi andi’ bwātonwene Isalela yense amukwatakanye na mutyima onso. (1 Bi. 11:​1, 2) Davida wādi nyeke ukulupile mu bukwashi bwa Yehova pa kulwa na balwana nandi. (Ñim. 138:3) Kadi Zadoki wāboīle ñeni ku bana-balume bakankamane pamo bwa Yehoyada ne wandi mwana mudyavita Benaya, ne ku bamfumu bakwabo 22 ba bisaka bādi ku mutamba wa Davida.—1 Bi. 11:​22-25; 12:​26-28. w24.07 p. 3 mus. 5-6

Solo wa ku Tasusa wālongele bintu bivule bibi byāmulengeje asakilwe bininge kwisāsa ne kulekelwa. Wāpangilepangile bya mu meso fututu balondi baswedibwe ba Kidishitu. Bene Kidishitu bavule ye bano bādi balanga’mba kakabwanyapo kushinta nansha dimo. Inoko Yesu musanguke wādi uyukile amba Solo ubwanya kushinta ne kwisāsa. Aye ne Shandi bāmwene ngikadila miyampe mwadi. Yesu wānenene amba: “Uno muntu i kingidilwa kyonatonga.” (Bil. 9:15) Yesu wālongele enka ne kingelengele mwanda wa kufikija Solo ku kwisāsa. (Bil. 7:58–8:3; 9:​1-9, 17-20) Pa kupwa kwikala mwine Kidishitu, Solo—mwine wāyukene mwenda mafuku bu mutumibwa Polo—wālombwele misunsa mivule mutyima wandi wa kufwija’ko pa kanye ne lusa byobāmulombwele kudi ba Yehova ne Yesu. (1 Tm. 1:​12-15) Le Polo paāivwene mwiendelejo wa bumvu wa busekese wādi mu kipwilo kya bwine Kidishitu mu Kodinda, wāpwijije’o namani? Wāpwijije’o mu muswelo witufundija ñeni mikatampe pa muletelanga Yehova bulemununi na buswe, ne kamweno kadi mu kulombola lusa. w24.08 p. 13 mus. 15-16

Mu myaka tutwa na tutwa, Yehova wāendelele kulombola bityebitye muswelo ubwanya kufwena bantu ba bubi kwadi. Abele, mwana wa bubidi wa ba Adama ne Eva, ye muntu mubajinji wālombwele lwitabijo mudi Yehova pa kupwa kwa butomboki bwa mu Edena. Abele byaādi usenswe Yehova ne kukimba kumusangaja, wāfwenene kwadi ne kumulambula kitapwa. Abele wādi mukumbi, o mwanda wāselele yandi mikōko myana, wēitapa ne kulambula’yo Yehova. Le Yehova wālongele’po namani? “Wāloelelwa Abele ne kyamulambu kyandi.” (Ngo. 4:4) Yehova wāloelelwe bitapwa pamo bwa bino byāmulambwile bantu bādi bamusenswe ne kumukulupila pamo bwa Noa. (Ngo. 8:​20, 21) Yehova pawāitabije bino bitapwa, wālombwele amba bantu ba bubi babwanya kwitabijibwa nandi ne kumufwena. w24.08 p. 3 mus. 5-6

Tubwanya kutenekwa bininge ne kutyumukwa mutyima na bukondame. (Mus. 7:7) Ne bengidi ba kikōkeji pamo bwa Yoba ne Habakuka, nabo bēivwene uno muswelo. (Yoba 6:​2, 3; Hab. 1:​1-3) I byendele’mo kwiivwana namino, inoko tufwaninwe kutadija kutyina’mba twakalonga kintu kibi kitatyi kyobetulongela bukondame ne kubipijija’ko myanda. Shi boba balongele bintu na bukondame bamweka bu kebapelwepo mfuto, tubwanya kwiipangula shi i kya mvubu kulonga byoloke. Kimfwa, kaimba wa mitōto wāmwene bantu bayampe balongelwa bintu na bukondame kudi bantu babi, inoko bantu babi’ba bamweka bu bekele na būmi buyampe. Wānenene amba, “Bano’ba bo babi, badi biyampe mafuku onso.” (Ñim. 73:12) Kadi wātyumukilwe mutyima bininge pa mwanda wa bukondame, kalanga’mba kwingidila Yehova kekudipo na mvubu. Wānenene amba: “Ponatompele kwibivwanija, byaunkambakenye.”—Ñim. 73:​14, 16. w24.11 p. 3 mus. 5-7

Tutumbijanga Yehova mwanda tumulēmekele bininge. Tudi na bubinga buvule bwa kumulēmekela. Yehova i mwinē bukomo bonso; aye udi na bukomo kebudi mpwilo. (Ñim. 96:​4-7) Tunangu twandi tukatampe tumwekelanga mu bintu byapangile. Aye ye Nsulo ya būmi bwetu kadi wibukwatakanyanga. (Kus. 4:11) I wa lulamato. (Kus. 15:4) Bintu byonso byalonga byendekanga, kadi ufikidijanga nyeke byalaya. (Yos. 23:14) O mwanda mupolofeto Yelemia wānenene padi Yehova amba: “Mu bantu bonso ba tunangu ba mizo ne mu malopwe abo onso, i mutupu nansha umo udi pamo bwa abe”! (Yel. 10:​6, 7) Bine, tudi na bubinga bwendele’mo bwa kulēmekela Tata wetu wa mūlu. Inoko tufwaninwe kulēmeka Yehova bya binebine ne kumusanswa. Kadi batwe bonso tutumbijanga Yehova mwanda tumusenswe bininge. w25.01 p. 3 mus. 5-6

Balwana na Leza baloñanga bukomo bwa kumwekeja bintu biyampe bitala bulongolodi bwandi bu bibi. Kimfwa, twi befunde kupityila ku Bisonekwa amba Yehova usakanga batōtyi bandi bekale batōka ku ngitu, mu malango, ne ku mushipiditu. Aye unena’mba muntu ense wa mwiendelejo wa disubi upela kwisāsa, ufwaninwe kupangwa mu kipwilo. (1 Ko. 5:​11, 12; 6:​9, 10) Tukōkelanga uno musoñanya wa mu Bisonekwa. Inoko balwana netu bakimbanga kwingidija uno musoñanya mwanda wa kwitunena’mba twi bantu ba kōminija, ba kasuminiji ne bampikwa buswe. Tunenwe kujingulula mwine witulwa. Satana Dyabola ye kalenga-byanzwe wa ino mfumo ya bubela. I “shandya bubela.” (Yoa. 8:44; Ngo. 3:​1-5) O mwanda tufwaninwe kutengela’mba, Satana ukengidija bantu bandi mwanda wa kusambakanya mfumo ya bubela pa bulongolodi bwa Yehova. w24.04 p. 10-11 mus. 13-14

Nansha shi kyamalwa kikatampe ke kishilule, bantu bamo babwanya kumona konakanibwa kwa “Babiloni Mukatampe” ne kuvuluka’mba Batumoni ba Yehova badi betusapwila uno mwanda mu bula bwa myaka mivule. Le bamo bakamona kino kinkumenkume bakashinta mumweno wabo? (Kus. 17:5) Shi bamo bakashinte, bikeifwana na byālongekele mu Edipito mu mafuku a Mosesa. Vuluka’mba “kibumbo kikatampe kya bantu basobakane” kyēlungile na bene Isalela pobātambile mu Edipito. Bamo ye bano bāshilwile kulombola lwitabijo pobāmwene kufikidila kwa bidyumu bya Mosesa bitala Mpupo Dikumi. (Div. 12:38) Shi kino kibakalongeka pa kupwa konakanibwa kwa Babiloni Mukatampe, le tukatyumukwa mutyima amba bantu abelunga netu kitatyi’tu kityetye kumeso kwa mfulo kufika? Aa! Tusakanga kumwekeja bumuntu bwa Tata wetu wa mūlu, “Leza wa lusa ne kanye, wija pa kukwatwa bulobo kadi muyule buswe bwa ndamatyidile ne bubine.”—Div. 34:6. w24.05 p. 11 mus. 12-13

Le i bika bibwanya kulongeka shi tubasāsuka ku “kimfwa kya kulondela’po kya binenwa biyampe”? Tubandaulei’ko kino kimfwa. Bimweka’mba mu myaka katwa kabajinji, lupupuluji lwāshilwile kusambakana mu bene Kidishitu bamo amba difuku dya Yehova ke difike kala. Mobimwekela kwādi mukanda wānenene namino, mwine wādi ulangilwa na bantu amba wālembelwe na mutumibwa Polo. Pampikwa ne kwitūdila’ko kitatyi kya kubandaula myanda, bene Kidishitu bamo mu Tesalonika bākukupile luno lupupuluji, enka ne kushilula kwilusambakanya. Kebādipo babwanya kongolwa shi bāvulukile bintu byēbafundije Polo kitatyi kyaākidi nabo pamo. (2 Ts. 2:​1-5) Polo wādingīle banababo baleke kwitabija bintu byonso byobevwana. Kadi pa kwibakwasha mu mafuku a kumeso, Polo wāfudije mukanda wandi wa bubidi ku bene Tesalonika na binenwa bya amba: “Luno i lwimu lwami ami Polo, lonalemba na makasa ami, e kyo kiyukeno mu mukanda ne mukanda; e monembelanga namino.”—2 Ts. 3:17. w24.07 p. 12 mus. 13-14

Bene Kidishitu Bahebelu, bādi banenwe kūminina matompo a lwitabijo lwabo pādi penda pabipila’ko būmi mu Yudea. Nansha bene Kidishitu bamo Bahebelu byobēkondele na kupangwapangwa kukatampe, bavule bāitabije bwine Kidishitu kitatyi kyādi’ko ndoe kampanda. Mutumibwa Polo wālombwele amba, nansha byobāuminine matompo mavule a lwitabijo, bādi kebāsusukile na mwāsusukile Yesu ne kwipaibwa. (Bah. 12:4) Inoko byāsambakene bwine Kidishitu, balwana Bayuda bālobele bininge ne kwikala ba bya lūma. Myaka’tu mityetye kunyuma, Bayuda 40 ne musubu “batyipa koku befinga mafingo amba kebakadipo ne kutoma kwine poso bepaye bidi Polo.” (Bil. 22:22; 23:​12-14) Nansha bene Kidishitu byobādi ba kushikibwa ne kupangwapangwa, bādi banenwe kwendelela kwibungila pamo mwanda wa kutōta, kusapula myanda miyampe, ne kulama lwitabijo lwabo lukomo. w24.09 p. 12 mus. 15

Yoano wādi mutumibwa musanshibwe bininge na Yesu Kidishitu. (Mat. 10:2) Wāendele na Yesu mu bula bwa mwingilo wandi, wēmwenine bingelengele byandi, kadi wāmulamete mu bitatyi bya makambakano. Wāmwene Yesu paādi wipaibwa ne kumumona paāsangukile. Kadi Yoano wēmwenine mwābaile kipwilo kya bwine Kidishitu, kufika ne byāsapwilwe myanda miyampe “mu bipangwa byonso bidi munshi mwa diulu.” (Kol. 1:23) Dya ku mfulo kwa būmi bwandi, Yoano wāpelwe dyese dya kulunga kuboko ku kulembwa kwa Kinenwa kya Leza kya ku bukomo bwa mushipiditu. Wālembele myanda ilenga nzuba ya “kusokwelwa kwa Yesu Kidishitu.” (Kus. 1:1) Kadi Yoano wālembele Evanjile itelelwa pa dyandi dijina. Ne kadi wālembele mikanda mikwabo isatu ya ku bukomo bwa mushipiditu. Mukanda wandi wa busatu wālembēle’o mwine Kidishitu wa kikōkeji witwa bu Ngaiusa, mwine waādi umona bu wandi mwana muswedibwe wa ku mushipiditu. (3 Yo. 1) Bintu byālembele uno mwana-mulume mutame wa kikōkeji i bikankamike balondi bonso ba Yesu kufika ne dyalelo. w24.11 p. 12 mus. 15-16

Mulume usenswe wandi mukaji umukwatanga na bulēme ne kumukena. Umumonanga bu kyabuntu kilēme kitamba kudi Yehova. (Nki. 18:22; 31:10) Kino kimulengejanga amulongele bintu na buswe ne na bulēme, enka ne kitatyi kyobasambakena pamo. Kakamuningilapo asambakene nandi pamo mu muswelo mubi, wampikwa kwendela’mo, nansha kulengeja wandi mukaji aleke kwikala na mutyima wa mundamunda utōka. Kadi mulume nandi ukalonga bukomo bwa kulama mutyima wa mundamunda utōka ku meso a Yehova. (Bil. 24:16) A balume, kulupilai amba Yehova umwene kadi usangelanga bukomo bonso bomulonga mwanda wa kulēmeka bakaji benu mu myanda yonso ya mu būmi bwenu. Nanshi sumininwai kulēmeka benu bakaji na kwepuka bintu kebibaletelapo bulēme, na kwikala na kanye, bulēmantu, ne kulombola kisanso ku benu bakaji. Shi mulonge namino, mukalombola’mba mwibasenswe kadi mwibalēmekele. Shi ulēmeke obe mukaji, nabya ukalama kipwano kitabukile kintu kyo-kyonso—ke kipwano kyobe na Yehova kadi.—Ñim. 25:14. w25.01 p. 13 mus. 17-18

Kintu kimo bidi kishiyañanyanga bengidi ba Yehova na boba betela bu bene Kidishitu i bupyasakane bwabo mu busapudi. Le i bika bibwanya kwitukwasha tulame nyeke bupyasakane bwetu mu busapudi nansha kwibuvudijija’ko? Tubwanya kwikala na bupyasakane mu mwingilo wetu wa busapudi na kubandaula kimfwa kya Yesu. Mu bula bwa mwingilo wandi, kātyepejepo bupyasakane bwandi. Ino mu kupita kwa kitatyi, po pene wāvudijije’ko bupyasakane. Pamo bwa mwingidi wa mu budimi bwa mañanza wākwatakenye kikuyu mu bula bwa myaka isatu ino kupa kipa nansha kimo mpika, Yesu nandi wāsapwidile Bayuda mu bula bwa myaka isatu, ino bavule kebāmutejejepo. (Luka 13:​6-9) Kwifunda bintu byaāfundije ne kwiula byobya byaālongele kuketukwasha twikale nyeke bapyasakane dyalelo. w25.03 p. 14-15 mus. 1-4

Le bikekala namani shi ulanga’mba muntu kampanda ubwanya kwikala mwinē pobe muyampe? Le ufwaninwe kumulombola kiponka na ponka’mba umusenswe? Bible unena’mba muntu wa tunangu ukimbanga buyuki kumeso kwa kulonga kintu. Nanshi i kya tunangu kutadija muntu na bunwa kumeso kwa kumulombola’mba umusenswe. Le i muswelo’ka obwanya kutadija muntu na bunwa? Ku kupwila nansha pomwisangaja na balunda, ubwanya kuyuka mwikadile muntu ku mushipiditu, bumuntu bwandi, ne mwiendelejo wandi. Le i bāni bāpwene nabo ne i bika byasenswe kwisambila’po? (Luka 6:45) Le byalanga kulonga mu būmi bikwatañene na byolanga kulonga? Ubwanya kwipangula bakulumpe ba mu kyabo kipwilo nansha bene Kidishitu batame bamuyukile biyampe. (Nki. 20:18) Ubwanya kwipangula mobamuyukile nansha ngikadila yandi. (Luta 2:11) Kitatyi kyotadija uno muntu, longa bukomo bwa kuleka kumulengeja abulwe mutyima-ntenke. Lēmeka mwiivwanino wandi ne myanda imutala. w24.05 p. 22 mus. 7-8

Bakulumpe kebeyumbilangapo kulanga’mba nonga-bibi kakesāsapo. Nansha bamo byobabwanya kwisāsa mu kwitana kwabo kubajinji na bakulumpe, bakwabo babwanya kusakilwa kitatyi kivule. O mwanda bakulumpe babwanya kukwata’ko mpangiko ya kwitana na kipya-mambo misunsa mivule. Padi pa kupwa kwitana nandi musunsa mubajinji, mwine Kidishitu usāsukile ubwanya kushilula kulangulukila bininge pa bintu byobesambile nandi. Ubwanya kufwena Yehova mu milombelo na kwityepeja. (Ñim. 38:18) Mu uno muswelo, pobaketana nandi musunsa mukwabo, kipya-mambo ubwanya kulombola mushipiditu mwishile na waalombwele dibajinji. Pa kufikija kipya-mambo ku kwisāsa, bakulumpe balombolanga lusa ne kanye. Balombanga Yehova esele bukomo bwabo ne kukulupila’mba mwanabo mu lwitabijo ukealuja ne kwisāsa.—2 Tm. 2:​25, 26. w24.08 p. 22-23 mus. 12-13

Yehova kasakilepo muntu nansha umo oneke! Usaka babipya-mambo bapwane nandi monka. (2 Ko. 5:20) O mwanda mu bula bwa mānga, Yehova i mukankamike kyaba ne kyaba bantu bandi ba kubulwa kikōkeji—enka ne muntu wa pandi wa pandi—amba besāse ne kujokela kwadi. Bakulumpe pa kipwilo badi na dyese dya kwingidila pamo na Yehova pobalonga bukomo bwa kukwasha banonga-bibi bafikile ku kwisāsa. (Loma 2:4; 1 Ko. 3:9) Fwatakanya’po nsangaji ikalanga mūlu kitatyi kīsāsa babipya-mambo! Tata wetu wa mūlu Yehova, usangalanga bininge kitatyi kyonso kijokela mukōko wandi mujimine mu kipwilo. Nanshi tuvudijijei’ko nyeke buswe botusenswe Yehova, potulangulukila pa lusa lwandi ne pa kanye kandi ka ku buntu bitupu.—Luka 1:78. w24.08 p. 31 mus. 16-17

Shi Yesu wāitabije bantu bamubikike bu mulopwe, wādi wa kukwatakanya myanda ya politike ya Bayuda, bene bādi munshi mwa buludiki bwa bene Loma. Na bukankamane, Yesu ‘wetolwela ku lūlu.’ Nansha byobāmuningile kudi bantu bakwabo, aye kēkujijepo mu politike. Bine, i mwitushile kimfwa kiyampe’po kashā! Shako, bantu bakwabo kebaketunenapo tuvudije mikate nansha kubelula babela mu kingelengele; kadi kebakakimbepo kwitubikika bu balopwe nansha bendeji ba ntanda. Inoko babwanya kukimba kwitutonona twikuje mu myanda ya politike na kuvota muntu obamona’mba usa kulumbulula bintu, nansha kumukwatakanya. Ino kimfwa kya Yesu kidi patōka. Wāpelele kwikuja mu myanda ya politike, kadi wānenene enka ne mwenda mafuku amba: “Bulopwe bwami ke bwa ino ntandapo.” (Yoa. 17:14; 18:36) Batwe bene Kidishitu dyalelo tunenwe kwiula mulangilo wa Yesu ne kulonga bintu pamo bwa aye. Tukwatakenye buno Bulopwe, twibusapula, ne kulombela bwiye.—Mat. 6:10. w24.12 p. 4 mus. 5-6

Powifunda Bible, kimba’ko miswelo ya kwingidija’mo myanda yowifunda. Kimfwa, iula boloke bwa Yehova na kulongela bantu bakwabo bintu pampikwa mboloji. Iula buswe bwa Yesu bwasenswe Shandi ne bantu, na kukimba kususuka na mutyima umo pa mwanda wa Yehova ne kwipāna pa mwanda wa batutu ne bakaka. Kadi iula Yesu na kusapwila bantu bakwabo amba nabo bamone mukenga wa kwitabija kyabuntu kilēme kya Yehova. Shi twendelele kwivwanija mvubu ya kinkūlwa ne kulombola mutyima wa kufwija’ko, po pene tukasanshilwa’ko Yehova ne wandi Mwana. Ne kino kikalengeja nabo betusanshilwe’ko. (Yak. 4:8) Nanshi twingidijei Bible ne mabuku alupulwa na bulongolodi bwetu mwanda wa kwendelela kwifunda myanda itala kinkūlwa. w25.01 p. 25 mus. 16-17

Kisonekwa kyetu kya dyalelo kinena’mba: “Ubaela bubi bwami bonso kunyuma kobe.” Nansha na munenena kunshi kwa dyani amba, “ubatalula bubi bonso ku meso obe.” Uno muneneno wa kyelekejo ulombola’mba, Yehova uselanga bubi bwa boba besāsa ne kwibwela kulampe kwakabwanyapo kwibumona monka. Kadi bino binenwa bibwanya kwalamunwa’mba: “Ubalonga [bubi bwami] enka na abo kebwalongekelepo.” Kadi Bible ukomeneja uno mulangwe na muneneno mukwabo wa kyelekejo utanwa mu Mika 7:​18, 19. Yehova unena mu ano mavese amba welanga bubi bwetu mu mushike wa dijiba. Mu kitatyi kya kala, muntu kādipo ubwanya kusokola kintu kyelelwe mu mushike wa dijiba. Tubefunde kupityila ku muneneno wa kyelekejo amba, kitatyi kitulekela Yehova witutalulanga kiselwa kya bubi bwetu. Bine, monka mwānenene’kyo Davida, “ba nsangaji i boba bobalekēle kujilula kwabo ne bobapūtyila bubi bwabo.” (Loma 4:7) Luno shalo lo lulekelo lwa bine! w25.02 p. 9 mus. 7-8

Dyalelo, pano pa ntanda padi paladisa muyudile bantu bavule kadi badi na bivule bya kulonga. Mudi bantu midiyo ne midiyo badi na ndoe ya bine. Boba badi kala mu ino paladisa i basumininwe kuleka kutamba’mo nansha dimo. Kadi basakanga bantu bavule batwele mu kino kifuko kya pa bula. Le akyo kine i kifuko’ka? I paladisa ya ku mushipiditu! Yehova i mutūle’ko kifuko kiyampe mu ino ntanda yalamwine Satana ke kifuko kibi, kya mushikwa, ne kya kyaka. (1 Yo. 5:19; Kus. 12:12) Leza wetu wa buswe umonanga lupusa lubi ludi na ino ngikadilo ya bintu. O mwanda i mwitupe mutyima-ntenke otusakilwa pa kwendelela kumwingidila na nsangaji. Kinenwa kyandi kitela paladisa ya ku mushipiditu bu “mwa kunyemena” mwa mutyima-ntenke, ne bu “budimi busangilwe mema biyampe.” (Isa. 4:6; 58:11) Na bukwashi bwa Yehova, boba badi mu ino paladisa badi na nsangaji ne na mutyima-ntenke mu ano mafuku a mfulo makomo ne mwa kulongela.—Isa. 54:14; 2 Tm. 3:1. w24.04 p. 20 mus. 1-2

Na bubine shi ulañanga ya kusonga nansha kusongwa, ye uno kodi mulombe Yehova akukwashe usokole muntu wa kwisonga nandi. Shako, Yehova kalailepo muntu nansha umo amba ukamupa wa kwisonga nandi. Inoko, utele mutyima ku bisakibwa byobe ne ku mwiivwanino obe, kadi ubwanya kukukwasha usokole muntu wa kwisonga nandi. Nanshi, endelela kumulombola byosaka ne mowiivwanina. (Ñim. 62:8) Mulombe akupe kitūkijetyima ne tunangu. (Yak. 1:5) Nansha shi kusokwelepo bukidibukidi muntu wa kwisonga nandi, Yehova i mulaye kukukwatakanya ku ngitu ne mu malango. (Ñim. 55:22) Inoko dyumuka: Kokaleka milangwe ya kukimba muntu wa kwisonga nandi ikubudije nsangaji. (Fid. 1:10) Nsangaji ya bine keitambengapo ku kusonga ne kusongwa nansha ku kwikala nkunga, ino i ku kipwano kyopwene na Yehova. (Mat. 5:3) Kadi pokidi nkunga, ubwanya kwikala na mikenga mivule ya kutandabula mwingilo obe. (1 Ko. 7:​32, 33) Nanshi ingidija biyampe kino kitatyi. w24.05 p. 21 mus. 4; p. 22 mus. 6

Le mufwaninwe kwinangila mu bula bwa bitatyi binga? Divule butyibi bwa kampeja-bukidi bufikijanga muntu ku makambakano. (Nki. 21:5) Nanshi kwinangila kwenu kufwaninwe kwija mu bula bwa kitatyi kampanda mwanda wa kwiyuka senene. Inoko kemufwaninwepo kulepeja kitatyi kya kwinangila pampikwa bubinga. Bible unena’mba: “Kukungila kwija kubelekanga mutyima.” (Nki. 13:12) Le i bika bibwanya kulonga bantu bakwabo kitatyi kīnangila boba bakimba kwisonga? Tubwanya kwibeta tudye nabo byakudya, ku butōtyi bwa kisaka, nansha kupityija kitatyi pamo na balunda. (Loma 12:13) Le basakilwa kakunku, talanshipolo nansha kifuko kobabwanya kwisambila biyampe? Shi i amo, tubulwepo kwibakwasha? (Ngt. 6:10) Shi abakulombe kwikala bu kakunku, ubulwepo kumona kino bu dyese? Tadija kuleka kwibashiya kwa bunka bwabo, inoko kadi jingulula kitatyi kya kwibashila kyaba besambe myanda ibatala. w24.05 p. 30 mus. 13-14

Bakulumpe bakimbanga kuyuka bintu bifikije muntu ku kulonga bubi. Kimfwa, le mwine Kidishitu washilwile kuzoza bityebitye pa mwanda wa kusūla kifundwa kyandi kya pa kasuku nansha busapudi? Le milombelo yandi yadi ke ya na dimodimo nansha ya kūlukūlu? Le walekele bya kusakasaka byandi bibi bimuludike? Le walongele butongi bwa kubulwa tunangu mu mwanda utala balunda nansha kwipwija mukose? Le buno butongi bwaikele na lupusa’ka pa mulangilo wandi ne bya kusakasaka byandi? Le wivwanije mwiivwanine Yehova pa bintu byalongele? Bakulumpe babwanya kwipangula muntu bipangujo bimukwasha alangulukile pa bintu bimulengeje ajimije kipwano kyandi na Yehova ne kulonga bubi. Baloñanga kino na kanye, o mwanda kebepangulangapo bipangujo pa myanda itala muntu mine yokebanenwepo kuyuka. (Nki. 20:5) Kadi babwanya kwingidija byelekejo mwanda wa kukwasha muntu alanguluke ne kumona mubipile bilongwa byandi. Padi mu kwitana kubajinji, muntu ukashilula kwialakanya pa mwiendelejo wandi. Ubwanya enka ne kwisāsa. w24.08 p. 22 mus. 9-11

Yesu wāsapwile na bupyasakane “myanda miyampe ya Bulopwe” mwanda wādi uyukile amba o mwingilo wādi umusakila Leza kwingila. Yesu wātūdile mwingilo wa busapudi pa kifuko kibajinji mu bwandi būmi. Enka ne dya ku mfulo kwa mwingilo wandi, wādi wenda “mu kibundi ne kibundi, kikatampe ne kityetye,” ufundija bantu bakwabo. (Luka 13:22) Kadi wāfundije bana ba bwanga bavule basapule nandi pamo. (Luka 10:1) Ne dyalelo, kusapula myanda miyampe o mwingilo mubajinji witusakila ba Yehova ne Yesu kwingila. (Mat. 24:14; 28:​19, 20) Tubwanya kuvudijija’ko bupyasakane bwetu mu busapudi na kumona bantu mwibamwena Yehova. Aye usakanga bantu bavule bevwane myanda miyampe ne kwiitabija. (1 Tm. 2:​3, 4) O mwanda witufundijanga tulumbulule muswelo otwisamba na bantu, ke-pantu musapu wetu i upandija būmi. Nansha shi bantu kebashilwilepo kwingidila Yehova pano, babwanya kwikala na mukenga wa kulonga namino kumeso kwa kyamalwa kikatampe kufula. w25.03 p. 15-16 mus. 5-7

Mwine Kidishitu yense ufwaninwe kwingidija mutyima wandi wa mundamunda mufundijibwe na Bible mu uno mwanda. Bamo babwanya kupēlelwa kwimuna nansha kutundaila uno muntu ku kupwila. Inoko ketufwaninwepo kwisamba nandi bilabila nansha kupityija nandi kitatyi mu myanda mikwabo. Bamo babwanya kwiipangula’mba, ‘Mwene Bible unena’mba mwine Kidishitu wimuna uno muntu weabila nandi mingilo yandi mibi?’ (2 Yo. 9-11) Myanda īsambilwe’po mu kino kisonekwa ilombola’mba buno bulombodi bwisambilanga pa batupondo ne boba bakankamika mwiendelejo mubi. (Kus. 2:20) Nanshi shi muntu ukankamika mfundijo ya batupondo nansha bilongwa bikwabo bibi, bakulumpe kebakakwata’kopo mpangiko ya kumupempula. Shako, uno muntu ubwanya kwisāsa. Inoko pākesāshile ketukamwimunapo nansha kumwita ku kupwila. w24.08 p. 30-31 mus. 14-15

Yesu pa kupwa kudisha kibumbo, wānenene batumibwa bandi bajokele mu Kapanama lwa bwabo. Ebiya nandi wētolwela ku lūlu mwanda wa kwepa kibumbo kyādi kikimba kumubikika bu mulopwe. (Yoa. 6:​16-20) Batumibwa pobādi benda lwa bwato, kwātetukile kimpumpu kyāletele mabimbi makatampe. Ebiya Yesu wāiya kobadi wenda ulandala pa mema. Kadi wānena mutumibwa Petelo nandi alandale pa mema. (Mat. 14:​22-31) Aye’tu Yesu ukanda mu bwato, kimpumpu ne kokyāya jimejime. Batumibwa batulumuka kebanena’mba: “Bine abe wi Mwanā Leza.” (Mat. 14:33) Inoko kebāivwanijepo kwiifwana kwādi pa bukata bwa kino kingelengele na kingelengele kya mikate kyālongele Yesu. Mako unena pangala pa kingelengele kya mikate amba: “[Batumibwa] batendela bikatampe mpata, mwanda kebaivwanijepo buluji bwa mikate.” (Mako 6:​50-52) Bine, bākomenwe kwivwanija mwādi mubaile bukomo bobāpele Yesu kudi Yehova mwanda wa kulonga bingelengele. w24.12 p. 5 mus. 7

Tubwanya kulombola kufwija’ko pa buswe bwa Yehova na kulonga byonso byotubwanya mu kitatyi kya Kivulukilo mwanda wa kulombola mutyima wa kufwija’ko pa kinkūlwa. Kutentekela pa kutanwa ku Kivulukilo, tubwanya kwita ne bantu bakwabo batanwe’ko. Shintulwila boba boita bintu bikalongeka ku Kivulukilo. Ubwanya kulonga namino na kwibalombola pa jw.org video inena’mba Mwanda Waka Yesu Wāfwile? ne Vuluka Lufu lwa Yesu. Bakulumpe bafwaninwe kulonga bukomo bwa kwita boba kebakingilangapo. Fwatakanya’po nsangaji ikalanga mūlu ne pano panshi shi mukōko mujimine wa Yehova ubalonga bukomo bwa kujokela mu luombe! (Luka 15:​4-7) Ku Kivulukilo, tufwaninwe kwiimuna batwe bene na bene, ino nakampata bapya batanwa’ko nansha boba balonga kitatyi kilampe kutanwa’ko mpika. Tusakanga kwibalengeja beivwane bu batundailwe senene!—Loma 12:13. w25.01 p. 29 mus. 15

Kinkūlwa kitukwasha twivwanije amba Yehova i Leza wa boloke. Kadi kitukwasha nakampata tumone mubaile buswe bwandi. (Yoa. 3:16; 1 Yo. 4:​9, 10) Kinkūlwa kilombola’mba Yehova usaka twikale na būmi bwa nyeke ne kutwela mu kisaka kyandi. Kimfwa: Kitatyi kyālongele Adama bubi, Yehova wāmupangile mu kisaka kya batōtyi bandi. Kino i kilengeje batwe bonso tubutwilwe panja pa kisaka kya Leza. Inoko kupityila ku kinkūlwa, Yehova witulekelanga bubi bwetu, kadi ku mfulo ukatweja mu kisaka kyandi boba bonso balombola lwitabijo mwadi ne kumukōkela. Shako enka ne pano, tubwanya kwikala mu kipwano kiyampe na Yehova ne na batōtyi-netu. Bine, Yehova i mwitusanswe kisanso kikatampe!—Loma 5:​10, 11. w25.01 p. 21 mus. 6

Na bubine abe nobe witabije amba kinkūlwa i kyabuntu kilēme! (2 Ko. 9:15) Yesu byaāpene būmi bwandi bwa bu muntu, ubwanya kupwana na Yehova Leza. Kadi ubwanya kwikala na kyepelo kya kwikala’ko nyeke. Bine, tudi na bubinga buvule bwa kufwijija’ko Yehova, mwine wāletele kinkūlwa pa mwanda wa buswe bukatampe bwaetusenswe! (Loma 5:8) Pa kwitukwasha twendelele kufwija’ko ne kuleka kumona kinkūlwa bu kintu kya bituputupu, Yesu wētusoñenye tutanwe ku Kivulukilo kya lufu lwandi kiloñwanga mwaka ne mwaka. (Luka 22:​19, 20) Uno mwaka, Kivulukilo kikalongwa mu Dya Buná, mafuku 2 Kweji 4, 2026. Na bubine, batwe bonso twiteakanyanga mwanda wa kutanwa’ko. Tukamwena’mo bininge shi twitudile’ko kyaba kya kulangulukila pa bitulongēle ba Yehova ne Yesu mu kitatyi kya Kivulukilo. w25.01 p. 20 mus. 1-2

Tubwanya kwendelela kwifunda myanda itala buswe bwitusenswe ba Yehova Leza ne Yesu Kidishitu shi twendelele kulangulukila’po. Padi mu kitatyi kya Kivulukilo kya uno mwaka, ubwanya kutanga na katentekeji Evanjile imo nansha mavule. Kokepangila kutanga mashapita mavule musunsa umo. Inoko tanga bityebitye ne kukimbila’ko bubinga bukwabo botufwaninwe kusanshilwa ba Yehova ne Yesu. Shi kodi mulonge myaka mivule mu bubine, ubwanya padi kukimba kuyuka shi bibwanika kusokwela’ko bintu bipya pa myanda yotuyukile senene, pamo bwa boloke bwa Leza, buswe bwandi, ne kinkūlwa. Bubine i amba tukendelela kwifundila’ko bintu bipya pa ino myanda ne pa myanda mikwabo. Nanshi witūdile’ko kitatyi kya kutanga myanda itendelwa idi mu mabuku etu. w25.01 p. 24-25 mus. 13-15