Batutu badi na ngikadila miyampe ya bwine Kidishitu bakwashanga bininge kipwilo. Muntu wa mutyima unekena wikalanga mu ndoe na bakwabo. Shi usaka kuyukana bu muntu wa mutyima unekena, teja bakwenu ne kulonga bukomo bwa kwivwanija milangwe yabo. Kimfwa, shi bakulumpe bavule abakwata butyibi kebujilulapo kijila nansha musoñanya kampanda wa mu Bible, lelo ukebukwatakanya nansha shi wadi’po na milangwe mikwabo? Kokaningila bakwenu balonge bintu enka mosakila. I kya mvubu kwikala na badingidi bavule. (Ngo. 13:​8, 9; Nki. 15:22) Pa kyaba kya kubulwa bakwabo bulēme nansha kwipotomeja nabo, abe ikala na kanye ne bunwa. Byodi muntu uleta ndoe, kwata’ko mulangwe wa kuleta ndoe nansha ke mu myanda mikomo bininge. (Yak. 3:​17, 18) Binenwa byobe bya kanye bibwanya kutalaja myanda na bantu bakwabo nansha ke na balwana.—Bat. 8:​1-3; Nki. 25:15; Mat. 5:​23, 24. w24.11 p. 23 mus. 13

Nansha Kidishitu byaāfwile “dimo kupwididile,” aye ukyendelela kwipāna pa mwanda wetu. (Loma 6:10) Muswelo’ka? Ukyendelela kwingila mwanda wa kwitupa bintu bivule biyampe bilupukile ku kinkūlwa. Tubandaulei’ko bintu byakilonga ne pano. Wingilanga bu Mulopwe wetu, bu Kitobo Mukatampe, ne bu mutwe wa kipwilo. (1 Ko. 15:25; Ef. 5:23; Bah. 2:17) Kadi utangidile mwingilo wa kukongakanya bashingwe māni ne kibumbo kikatampe, mwingilo mwine ukavuika kumeso kwa kyamalwa kikatampe kufula. (Mat. 25:32) Ne kadi wingidijanga umpika mukōkele mwanda wa kupa bengidi bandi ba kikōkeji byakudya bya ku mushipiditu mu ano mafuku a mfulo. (Mat. 24:45) Kadi ukendelela kwitwingidila enka ne mu wandi Umbikalo wa Myaka Kanunu. Bine, Yehova i mwitupe wandi Mwana! w25.01 p. 24 mus. 12

Shi Yehova wetulekela, witulekelanga lonso pampikwa kuvuluka monka bubi’bwa. Kino kitulengejanga twikale mu kipwano kiyampe na Tata wetu wa mūlu. Kadi tuvulukanga’mba lulekelo lwa bine i kyabuntu. Yehova ulekelanga bantu ba bubi pa mwanda wa buswe bwandi ne kanye kandi ka ku buntu bitupu. Ketulekelangapo mwanda tufwaninwe lulekelo lwandi. Batwe bonso tufwijanga’ko Yehova mwanda i Leza wa “lulekelo lwa bine”! (Ñim. 130:4; Loma 4:8) Inoko pa kusaka’mba Yehova etulekele, kudi kintu kya mvubu kyotufwaninwe kulonga. Yesu wānenene amba: “Shi kemulekelapo bantu bilubo byabo, ne Shenu nandi kakemulekelapo bilubo byenu.” (Mat. 6:​14, 15) Nanshi tufwaninwe kwiula Yehova na kwikala na lulekelo. w25.02 p. 13 mus. 18-19

Twisambilei’ko pa bantu ba mu Sodoma ne Ngomola. Lota muntu moloke wāshikete mu bukata mwabo. Ino le mungya byotuyukile, Lota wāsapwidile bantu bonso? Aa. Na bubine bādi bantu babi. Ino le muntu ne muntu mobadi wādi uyukile kiyampe ne kibi? Vuluka’mba mulwi wa bana-balume ba mu kino kibundi wākimbile kulāla ku bukomo na beni ba Lota. Bible unena’mba mu uno mulwi mwādi “banuke ne bakulu bene.” (Ngo. 19:4; 2 Pe. 2:7) Le bine tuyukile amba Yehova Leza wa lusa, wātyibīle muntu ne muntu butyibi bwa kwipaibwa pampikwa lukulupilo lwa kusangulwa? Yehova wākulupije Abalahama amba mu kino kibundi kemwādipo nansha bana-balume dikumi boloke. (Ngo. 18:32) Nanshi bādi bakondame, kadi Yehova wādi na bubinga bwa kwibepaya pa mwanda wa bilongwa byabo. Le penepo tubwanya kunena na kikulupiji kyonso amba, i kutupu muntu nansha umo mobadi ukasangulwa ku “lusangukilo lwa . . . bakondame”? Aa! w24.05 p. 2 mus. 3; p. 3 mus. 8

Pa mwanda wa makambakano a misokwe, bamo baitabije kaji kebalomba kushiya kyabo kisaka, inoko bavule bamwene mwenda mafuku amba buno kebwadipo butyibi bwa tunangu. Kumeso kwa kwitabija kaji, kokata mutyima enka ku lupeto inoko i biyampe ne kubandaula shi kaji’ka kakakukwasha abe ne kyobe kisaka mwikale pabwipi na Yehova. (Luka 14:28) Wiipangule amba: ‘Shi naikala kulampe na wami mukaji le kino kikekala na lupusa’ka pa busongi bwetu? Le nkabwanya kutanwa ku kupwila konso, kusapula, ne kupityija kitatyi pamo na batutu ne bakaka?’ Shi udi na bana, i biyampe wiipangule ne kino kipangujo kya mvubu: ‘Lelo nkatamija bami bana “na kwibalemununa ne kwibadyumuna bidyumu bya Yehova” shi nkidipo nabo pamo?’ (Ef. 6:4) Ludikwa na mulangilo wa Leza pa kyaba kya mulangilo wa ba mu kisaka nansha balunda kebalēmekelepo misoñanya ya mu Bisonekwa. w25.03 p. 29 mus. 12

Mwine Kidishitu wa kubulwa kutama, ubwanya kupēlelwa kongolwa “na budimbañani” ne na “nkuku ya kyongo.” Ubwanya kukulupila boba basambakanya myanda ya kyongo, ya amba amba, ne nsekununi ya bubela ku bisanji. Kadi ubwanya kongolwa na batupondo. Ubwanya kwikala na mukao, kuleta nkalañani nansha kuloba bukidibukidi, kadi ubwanya kyaba kyonso kulonga bintu bibi shi watompibwa. (1 Ko. 3:3) Bisonekwa bidingakanya muswelo utamanga muntu ku mushipiditu na mutaminanga mwana. (Ef. 4:15) Kudi bintu bivule kebiyukangapo mwana kadi usakilwanga wa kumwendeja. Kimfwa, lolo ubwanya kunena wandi mwana mwana-mukaji amukwate ku kuboko pobatyibulula kilai. Paenda utama, lolo ubwanya kuleka wandi mwana atyibulule kilai aye mwine, inoko ukendelela kumuvuluja atale ku lunkuso ne ku lundyo kumeso kwa kutyibulula. Shi mwana watama, ukanza kutyibulula kilai aye mwine. Muswelo umo onka, shi bene Kidishitu abatama, balangulukilanga pa misoñanya ya mu Bible mwanda wa kuyuka mulangilo wa Yehova pa mwanda’wa ne kwiulonda. w24.04 p. 3 mus. 5-6

Mu bula bwa myaka mivule, i enka bipangwa bya ku mushipiditu byādi bishikete momwa mūlu byādi bipwene na Leza. Mwenda mafuku, wāpangile bantu ne kwibapa mukenga wa kwikala bandi beni. Kimfwa, mu bano beni mwābadīlwe Enoke, Noa, Abalahama, ne Yoba. Bano batōtyi ba bine bātelelwe bu balunda na Leza nansha bu boba bādi bananga “na Leza wa bine.” (Ngo. 5:24; 6:9; Yoba 29:4; Isa. 41:8) Mu bula bwa myaka tutwa na tutwa, Yehova wāendelele kwita balunda nandi bekale beni bandi. (Ezk. 37:​26, 27) Kimfwa, twifunda mu bupolofeto bwa Ezekyele amba Leza usakanga batōtyi bandi ba lulamato bekale nandi mu kipwano kya mpwaninine. I mulaye kusamba “nabo kipwano kya ndoe.” Buno bupolofeto bufunkila pa kitatyi kikalungilwa mu bumo boba badi na lukulupilo lwa kwenda mūlu ne boba badi na lukulupilo lwa kwikala pano pa ntanda mu pema wa kyelekejo bu “luombe lumo.” (Yoa. 10:16) Kitatyi’kyo kyo kino’ki! w24.06 p. 2 mus. 2, 4; p. 3 mus. 5

Batwe bantu ba Yehova tukwatakanyanga Bulopwe bwa Leza na mutyima wetu onso, inoko divule tusakilwanga bukankamane pa kwibukwatakanya. (Mat. 6:33) Kimfwa, mu ino ntanda mibi tusakilwa bukankamane pa kwiendeja mungya misoñanya ya Yehova ne kusapula myanda miyampe ya Bulopwe. Kadi bilombanga divule bukankamane pa kuleka kwikuja mu myanda ya politike mu ino ntanda muvudile bininge kwilalulula. (Yoa. 18:36) Bantu bavule ba Yehova i bajimije misokwe, basusulwe ku ngitu, nansha kukutwa pa mwanda wa kupela kwikuja mu myanda ya politike nansha kukalwa mavita. Tumonanga bukomo ne bukankamane kitatyi kyotubandaula bimfwa bya boba bākwatakenye bubikadi bwa Yehova na bukankamane. Mulopwe wetu Yesu Kidishitu, wāpelele na bukankamane kwikuja mu myanda ya politike ya mu ntanda ya Satana kitatyi kyaādi pano pa ntanda. (Mat. 4:​8-11; Yoa. 6:​14, 15) Wāikele mukomo na kukulupila nyeke mudi Yehova. w24.07 p. 3 mus. 4; p. 4 mus. 7

Yehova wālembeje ino nsekununi ya bulanda mu Bible mwanda wa kamweno ketu. Itukwashanga twivwanije kine kyashikilwe bininge bubi. Bubi bwitusansanyanga na Tata wetu, kadi butwalanga ku lufu. (Isa. 59:2) Inoko Satana ushikilwe Yehova ne bantu. O mwanda wāletele tuno tuvutakanya tonso, kadi ye kine kyasanshilwe bubi ne kukankamika bantu bebulonge. Ye uno wālangile amba waikala na bushindañani bukatampe mu Edena. Inoko kādipo wivwanije mwikadile Yehova na buswe bukatampe. Leza kāshintyilepo nansha dimo mpango yandi pa lutundu lwa ba Adama ne Eva. Usenswe bantu, o mwanda wāpele bantu bonso lukulupilo kiponka na ponka. (Loma 8:​20, 21) Yehova wāyukile amba bantu bamo ba ku luno lutundu bakatonga kumusanswa ne kumukōkela. Kadi byadi Tata wabo ne Umpangi wabo, wēbapele mukenga wa kumufwena ne kwibanyongolola ku bubi ne lufu. w24.08 p. 3 mus. 3-4

Batwe bantu ba Yehova twi bavudilwe bya kulonga. Twingilanga twaji mwanda wa kuvuija bisakibwa byetu ne bya byetu bisaka. (1 Tm. 5:8) Bakwabo balelanga babutule babo babela nansha banunu. Kadi batwe bonso tunenwe kukwatakanya bukomo bwetu bwa ngitu, bine biselanga kitatyi. Kutentekela pa bino biselwa, tudi kadi ne na bintu bikwabo bya kulonga mu kipwilo. Kiselwa kikatampe kyotudi nakyo i kya kusapula myanda miyampe na bupyasakane. Kutanga Bible kubadilwa mu “bintu bya mvubu mikatampe” ku batwe bene Kidishitu. O mwanda tufwaninwe kwikutūla pa kifuko kibajinji. Lwimbo lwa mitōto lubajinji lunena lwisambila pangala pa muntu wa nsangaji amba: “Aye uloelelwe bijila bya Yehova, kadi utañanga bijila bya Leza na diwi ditūke dyuba ne bufuku.” (Ñim. 1:​1, 2) Na bubine, kino kishintulula’mba tufwaninwe kwitūdila’ko kitatyi kya kutanga Bible. Le i kitatyi’ka kiyampe kya kumutanga? Kilondololwa kya kino kipangujo kibwanya kwishila mungya muntu ne muntu. Ino kya mvubu i amba, tufwaninwe kutonga kitatyi kiketukwasha tumutange kyaba ne kyaba. w24.09 p. 3 mus. 5-6

Le mwine Kidishitu mutame usakilwanga bukwashi bwa bantu bakwabo? I amo. Nandi ubwanya kusakilwa kulomba bukwashi kyaba kimo. Muntu wa kubulwa kutama ku mushipiditu, ubwanya kutengela bantu bakwabo bamulombole bya kulonga nansha butyibi bwa kukwata, bintu bine byafwaninwe kulonga aye mwine. Inoko mwine Kidishitu mutame ukamwena mu tunangu ne bwino bwa bantu bakwabo, koku uyukile amba Yehova umusakilanga “[eselele] kiselwa kyandi.” Monka mwishidile bantu batame ku mumwekelo wabo wa ku ngitu, ne bene Kidishitu batame nabo i beshile ku ngikadila ya ku mushipiditu, pamo bwa tunangu, bukankamane, buntu ne kwitūla pa kyaba kya bakwabo. Kadi kitatyi kitanwa bene Kidishitu batame ku mushipiditu mu ngikadilo ya muswelo umo, babwanya kwikala na milangwe mishile, ayo’ko yonso ikwatañene na Bisonekwa. Kino kimwekanga bininge mu mwanda utala mutyima wa mundamunda. Byobayukile kino, kebenenenangapo bibi pangala pa kuno kwishila. Inoko, batanga mutyima ku kwendelela kwikala mu bumo.—Loma 14:10; 1 Ko. 1:10. w24.04 p. 4 mus. 7-8

Le i bika byobwanya kulonga shi wimona bu kudipo na mvubu? Tanga ne kulangulukila pa mavese a mu Bible akukulupija’mba wi mulēme ku meso a Yehova. Shi wakomenwe kufikila pa kitungo kampanda nansha wi mutyumukwe mutyima mwanda’po kubwanyapo kulonga bivule pamo bwa bantu bakwabo, kokedingakanya nabo ne kuta mutyima pa bintu byokubwanyapo kulonga. Yehova katengelangapo ulonge bintu byokubwanyapo. (Ñim. 103:​13, 14) Shi bakususwile nansha kukona na busekese mafuku kunyuma, koketopeka pa byalongele yewa wakonene nansha kukususula. Kwadipo ufwaninwe kulongelwa bintu mu uno muswelo! Vuluka’mba Yehova ukatyibila mambo boba basusula bakwabo, ino ukakwasha boba basusulwa. (1 Pe. 3:12) Kokitatana nansha dimo amba Yehova kabwanyapo kukwingidija mwanda wa kukwasha bantu bakwabo. I mukupe dyese dya kwingila nandi pamo mu mwingilo wa busapudi. (1 Ko. 3:9) Bintu bikutene mu būmi ye bino i bikulengeje wikale witūla pa kyaba kya bantu bakwabo, ne kukulengeja upēlelwe kwivwanija mobeivwanina. Nanshi ubwanya kulonga bivule mwanda wa kwibakwasha. w24.10 p. 7-8 mus. 6-7

Yehova utele mutyima bininge ku muswelo obetulongela bintu. “Yehova usenswe boloke.” (Ñim. 37:28) Yesu witukulupija’mba Yehova ‘uketubingija bukidibukidi’ pa kitatyi kifwaninwe. Kadi panopano ponka Yehova usa kutalula’ko masusu etu onso ne bukondame bwa miswelo yonso. (Ñim. 72:​1, 2) Yehova witukwashanga tulwe na bukondame pano potutengēle kitatyi kisa kwikala’ko boloke. (2 Pe. 3:13) Witufundijanga mwa kwepukila kulonga bintu pampikwa tunangu kitatyi kyobetulongela bintu na bukondame. Yehova i mwitupe kimfwa kibwaninine kya wandi Mwana kya mwa kulwila na bukondame. Kadi Yehova witupanga madingi a kamweno mu Bible pa muswelo otubwanya kulonga bintu kitatyi kyobetulongela bukondame. w24.11 p. 2-3 mus. 3-4

Yesu wānenene batumibwa bape kibumbo byakudya. Kino kekyādipo kipēla mwanda kwādi kintu kya bana-balume 5000. Kadi kubadila’mo bana-bakaji ne bana ye bano bādi kintu kya 15000. (Mat. 14:21) Andele wānena’mba: “Kudi mwanuke umo kuno udi na mikate itano ya mebele a buluba ne twita twa lui tubidi. Ino le bino’bi bisa kulonga bika mu bantu bavudile nenki?” (Yoa. 6:9) Mikate ya mebele a buluba yādi idibwa divule na balanda ne na bantu bakwabo, kadi mobimwekela twita twa lui twādi twele’ko mwepo kadi tumishibwe ku dyuba. Inoko, buvule bwa byakudya byādi na uno mwanuke kebyādipo bya kubwana bano bantu bavule namino! Yesu byaāsakile kulombola kizaji ku kino kibumbo kya bantu, wēbasoñenye bashikate panshi bisumpibisumpi pa biyombo. (Mako 6:​39, 40; Yoa. 6:​11-13) Tutanga’mba Yesu wāfwija’ko Shandi pangala pa mikate ne twita twa lui. Byādi byendele’mo kufwija Leza, mwanda aye ye mwine wāletele bino byakudya. Kino i kivulujo kiyampe kotudi kya kulonda kimfwa kya Yesu na kulombela kumeso kwa kudya byakudya. Kupwa Yesu wālombola batumibwa babanye byakudya, ebiya bantu badya ne kwikuta baikuta. w24.12 p. 2-3 mus. 3-4

Yesu paādi pano pa ntanda, wātumbije Shandi na kusapwila bantu amba bingelengele byonso byalonga wibiloñanga na bukomo bwa Shandi. (Mako 5:​18-20) Kadi Yesu wātumbije Yehova kupityila ku muswelo waādi wisambila padi Shandi ne na muswelo waādi ushikete na bantu. Difuku dimo, Yesu wādi ufundija mu shinankonka. Mu bantu bādi bamuteja, mwādi mwana-mukaji umo mukwatwe na bandemona mu bula bwa myaka 18. Ndemona wālengeje ngitu yandi ikale mītontele panshi ukomenwa ne kubanduka nansha bityetye. Bine, kyādi kileta bulanda! Yesu pa kumukwatyilwa lusa, wāfwena uno mwana-mukaji ne kumunena na kanye amba: “A mwana-mukaji, ubakutululwa ku buzoze bobe.” Kupwa wāmutenteka makasa, ponka na ponka wāoloka “katumbija Leza ntumbo.” Bine, waālwije monka bukomo ne bulēme bwandi! (Luka 13:​10-13) Uno mwana-mukaji wādi na bubinga bwendele’mo bwa kutumbijija Yehova. Pamo bwa aye, netu tubwanya kutumbija Yehova. w25.01 p. 2-3 mus. 3-4

Le tubwanya kwikala monka na bintu byonso byājimije ba Adama ne Eva? Ketubwanyapo kwikala nabyo na bukomo bwa batwe bene. (Ñim. 49:​7-9) Pampikwa bukwashi, ketwadipo ba kwikala na lukulupilo lwa būmi bwa kumeso nansha lusangukilo. Twadi ba kwanza kufwa’nka na mufwilanga banyema. (Mus. 3:19; 2 Pe. 2:12) Tata wetu wa buswe Yehova, i mwitupe kyabuntu kifutyile mapu a bubi botupyene kudi Adama. Yesu wāshintulwile’byo amba: “Leza byaasenswe ino ntanda bikatampe mpata, wapēne wandi Mwana wa bunka, amba ense ulombola lwitabijo mudi aye kakyonakanibwa, ino amone būmi bwa nyeke.” (Yoa. 3:16) Kadi kino kyabuntu kimo kyonka, i kītupe mukenga wa kwikala mu kipwano kiyampe na Yehova. Tubwanya kumwena mu kino kyabuntu kya kutendelwa ne kumona kulekelwa kwa bubi bwetu nansha “mapu.” w25.02 p. 3 mus. 3-6

Le i bika byākweshe Solo abatyijibwe? Mfumwetu Yesu paēsambile na Solo tamba mūlu, kiké kyāsabile meso a Solo. (Bil. 9:​3-9) Wāshikilwe na nzala mu bula bwa mafuku asatu, ne kulangulukila bininge pa byāmufikile. Bine, Solo wākulupile amba Yesu ye Meshiasa ne amba balondi bandi bo batōtyi ba bine. Kudi ñeni mivule yotubwanya kuboila kudi Solo. Wādi ubwanya kuleka mitatulo nansha kityino kya bantu bimulengeje aleke kubatyijibwa. Inoko kālekelepo kino kilongeke. Solo wāitabije na mutyima tō kwikala mwine Kidishitu nansha byaāyukile amba ukapangwapangwa. (Bil. 9:​15, 16; 20:​22, 23) Pa kupwa kubatyijibwa, wāendelele kukulupila’mba Yehova ukamukwasha ōminine matompo. (2 Ko. 4:​7-10) Kubatyijibwa kobe bu Kamoni wa Yehova kubwanya kukulengeja utanwe na makambakano nansha kutompibwa mu lwitabijo. Inoko ubwanya kukulupila’mba Leza ne Kidishitu bakakukwasha ūminine ne kushala wa kikōkeji.—Fid. 4:13. w25.03 p. 4 mus. 8-9

Kutanga Bible i kitungo kiyampe. Inoko pa kumwena’mo ne pa mfulo, ketufwaninwepo kwimanina enka pa kutanga Kinenwa kya Leza kete. Tulete kimfwa: Divule mema a mvula ekalanga a kamweno ku bikunanwa. Inoko shi mvula wanoke muvule mu kitatyi kityetye, nshi ibwanya kwandabilwa na mema. Shi kino kibalongeka, mema mavule a mvula keakekalapo a kamweno. Nshi isakilwa kitatyi kya kukoka mema ne kulengeja bikunanwa bitame. Ne batwe netu, ketufwaninwepo kutanga Bible na kwiyumbila, ko kunena’mba bya bukidibukidi ketukomenwa ne kulangulukila pa byotutanga, kwibivuluka, ne kwibingidija. (Yak. 1:24) Le ubamone amba kitatyi kimo utañanga Bible bya bukidibukidi? Le i bika byofwaninwe kulonga? Tanga bityebitye. Longa bukomo bwa kulangulukila pa byotanga nansha pa byowatangile. Ubwanya padi kukwata butyibi bwa kulepeja’ko kitatyi kya kwifunda mwanda wa kumona kitatyi kya kulangulukila’po. w24.09 p. 4 mus. 7-9

Kitatyi kyobatambula bulombodi, bakulumpe banenwe kwibutanga na katentekeji ne kulonga bukomo bwabo bonso mwanda wa kwibulonda. Batambulanga bulombodi bwa mwa kupityijija bipindi ku kupwila, mwa kulombelela ku meso a kipwilo, ne mwa kulelela mikōko ya Kidishitu. Bakulumpe balonda bulombodi butamba ku bulongolodi, bakwashanga batutu ne bakaka bemone bu bakingwe kadi basanshibwe. Kitatyi kitupa bakulumpe bulombodi, tufwaninwe kwibulonda na mutyima tō. Shi tulonga namino, tukebapēleleja mwingilo wabo. Bible witukankamika tukōkele ne kukōkelelela boba betutangidile kumeso. (Bah. 13:​7, 17) Inoko kyaba kimo kebipēlangapo. Mwanda waka? Mwanda bano bana-balume i ba kubulwa kubwaninina. Inoko shi tute mutyima pa ngikadila yabo mibi pa kyaba kya kuta’o pa ngikadila yabo miyampe, tukekala bwa batwe bakwasha balwana netu. Muswelo’ka? Tukazozeja kikulupiji kyetu mu bulongolodi bwa Leza. w24.04 p. 10 mus. 11-12

Le bonso bakafwa pa kyamalwa kikatampe, bakonakanibwa lonso pampikwa lukulupilo lwa lusangukilo? Bisonekwa bilombola patōka’mba balwana na Yehova ne boba bakonakanibwa na bibumbo byandi bya divita pa Amakedona, kebakasangulwapo. (2 Ts. 1:​6-10) Ino le tunene namani pa bantu bakwabo, kimfwa bamo babwanya kufwa pa kyamalwa kikatampe pa mwanda wa misongo, bununu, ku akishida nansha kwipaibwa na bantu bakwabo? (Mus. 9:11; Zek. 14:13) Le bantu bamo mu bano’ba babwanya kubadilwa mu “bakondame” bakasangulwa mu ntanda mipya? (Bil. 24:15) Ketuyukilepo. Inoko tuyukile bintu bivule pa binkumenkume bya kumeso. Kimfwa, tuyukile amba pa Amakedona bantu bakatyibilwa mambo pa muswelo obadi bekele na banababo na Kidishitu. (Mat. 25:40) Kadi boba bakatyibilwa mambo bu mikōko i boba bakwatakenye banababo na Kidishitu.—Kus. 12:17. w24.05 p. 10-11 mus. 9-11

Bible utela kino kyetu kitatyi bu “bitatyi bya makambakano bikomo ne mwa kulongela.” (2 Tm. 3:1) Kutentekela pa makambakano ekonda na bantu bonso mu ino ngikadilo ya bintu, bantu ba Yehova bekondanga na lwana ne na kupangwapangwa. Le i bika bitukwashanga twendelele kutōta Yehova nansha byokudi ano makambakano? Kintu kimo bidi kitukwashanga i kuyuka’mba Yehova “i Leza mūmi.” (Yel. 10:10; 2 Tm. 1:12) Yehova i Muntu udi’ko bine mwine witukwashanga mu makambakano ne kukimba’ko mikenga ya kwitukwatakanya. (2 Bi. 16:9; Ñim. 23:4) Kumumona bu Leza mūmi kubwanya kwitukwasha tulwe na makambakano onso etutana. w24.06 p. 20 mus. 1-2

Tufwaninwe kulama nyeke kikulupiji kyetu mu bulongolodi bwa Yehova. Shi bibamweka patōka’mba bilomba kujadika mwivwanino kampanda wa bubine bwa mu Bible nansha muswelo ulongolwelwe mwingilo wa Bulopwe, boba batangidile kumeso kebekakangapo kuleta bujadiki. Baloñanga namino mwanda kyobasakanga bininge i kusangaja Yehova. Kadi bakwatanga butyibi bwabo kukwatañana na Kinenwa kya Leza, kine kidi na misoñanya ifwaninwe kukōkela bantu bonso ba Yehova. Mutumibwa Polo wāletele madingi a amba: “Kwatyija nyeke kimfwa kya kulondela’po kya binenwa biyampe.” (2 Tm. 1:13) “Kimfwa kya kulondela’po kya binenwa biyampe” kifunkila pa bufundiji bwa bwine Kidishitu butanwa mu Bible. (Yoa. 17:17) Buno bufundiji, po pemanine bintu byonso byotukulupile. Bulongolodi bwa Yehova i bwitufundije tulamate ku kino kimfwa kya kulondela’po. Kadi ponso potulonga namino, tweselwanga. w24.07 p. 11-12 mus. 12-13

Mutumibwa Petelo pa kupwa kwimwena uno mwanda, wādi kabwanya kufundija bakwabo myanda itala kwisāsa ne lulekelo. Kitatyi kampanda pa kupita’po na pāsobelwe masobo a Pentekosa, Petelo wānenene mwisambo ku kibumbo kya Bayuda bampikwa kwitabija, wēbashintulwila’mba baipaile Meshiasa. Inoko wēbakankamika na buswe amba: “Mwisāsei, kadi alamukai mwanda wa bubi bwenu bujimankanibwe, amba bitatyi bya kutūja bitambe kudi Yehova mwine.” (Bil. 3:​14, 15, 17, 19) Mu uno muswelo, Petelo wālombwele amba kwisāsa kulengejanga kipya-mambo alamuke, ko kunena’mba ashinte mulangilo wandi ne bilongwa byandi ne kwikala na mwiendelejo mupya usangaja Leza. Kadi mutumibwa Petelo wālombwele amba Yehova ukabula bubi bwabo, nansha kwibulengeja bujimankane. Bine, bisenga’po kashā kuyuka’mba shi twisāse bubi bwetu, Yehova uketulekela nansha shi i bukatampe namani! w24.08 p. 12 mus. 14

Tukabwanya kupela kusanswa bintu bya ku ngitu shi tudi na lwitabijo lukomo lwa amba, mfulo ya ino ngikadilo ya bintu ibafwena pabwipi. Pa kyamalwa kikatampe lupeto kelukekalapo na mvubu. Bible unena’mba bantu “bakela ndalama yabo mu bipito” mwanda bakajingulula’mba “ndalama yabo ne olo yabo kebikabwanyapo kwibapandija mu difuku dya bukalabale bwa Yehova.” (Ezk. 7:19) Pa kyaba kya kwipeneneka mu kukimba lupeto luvule, tunenwe kukwata butyibi bwitukwasha tuvuije bisakibwa byetu ne bya kyetu kisaka, koku twendelela kwingidila Yehova. Muno mubadilwa kupela ditompo dya kwapula mapu ampikwa mvubu ne kupityija kitatyi kivule na kukwatakanya bintu bya ku ngitu. Kadi tukatadija mwanda wa kwepuka kulamata bininge ku bintu bya ku ngitu byotudi nabyo kala. (Mat. 6:​19, 24) Lwitabijo lwetu lubwanya kutompibwa na bintu bya ku ngitu ne na myanda mikwabo pano potutengēle mfulo. w24.09 p. 11 mus. 13-14

Tubwanya padi kunekenya lonso bukōkekōke bwetu kampanda. Inoko tubwanya kumona’mba bukōkekōke bumo bukyendelela kwitukambakanya. Twisambilei’ko pa kimfwa kya mutumibwa Petelo. Wāponēne mu kityino kya bantu paātunine Yesu misunsa isatu. (Mat. 26:​69-75) Byāmwekele amba Petelo wānekenye uno moyo paāpene bukamoni pampikwa moyo ku meso a Sanedini. (Bil. 5:​27-29) Inoko myaka kampanda pa kupita’po, “mwanda’tu wa kutyina boba ba disao,” wālekēle kudīla pamo na bene Kidishitu ba mu mizo. (Ngt. 2:​11, 12) Kityino kya bantu kyāmujokēle. Padi wādi kekinekenye ne pa mfulo. Netu tubwanya kutanwa mu ngikadilo pamo bwa ino. Inoko, tubwanya kukomena bukōkekōke bwa kulonga bintu bibi na kulonda madingi a Yesu atala pa kutompibwa a ‘kukesha’nka kukesha.’ (Mat. 26:41) Nansha ke kitatyi kyowimona bu mukomo, endelela kwepuka ngikadilo ibwanya kukufikija ku kutompibwa. Longa nyeke bintu ke bikukwashe ukomene bwabo bukōkekōke.—2 Pe. 3:14. w24.07 p. 18-19 mus. 17-19

I kutupu muntu nansha umo ke mulombole buntu pamo bwa Yesu. Paādi pano pa ntanda, wāingidije na mutyima tō bukomo bwandi bwa kulonga bingelengele mwanda wa kukwasha bantu. (Luka 9:​12-17) Wētupele kyabuntu kikatakata kya būmi bwandi. (Yoa. 15:13) Tamba usangulwa, i mwendelele kwitukwasha. Monka mwaālaile’kyo, i mulombe Yehova apungulule mushipiditu mwanda wa kwitufundija ne kwitusenga. (Yoa. 14:​16, 17, kunshi kwa dyani; 16:13) Kadi kupityila ku kupwila kwetu, witupanga byonso byotusakilwa pa kwingila mwingilo wetu wa kufundija ne kulonga bana ba bwanga ntanda yonso. (Mat. 28:​18-20) Mutumibwa Polo wālembele amba pa kupwa kwa Yesu kukanda mūlu, “wapēne bantu bu byabuntu.” (Ef. 4:​7, 8) Polo wāshintulwile amba Yesu wāpēne bino byabuntu mwanda wa kukwatakanya kipwilo mu miswelo palapala. (Ef. 1:​22, 23; 4:​11-13) Shako, bano bana-balume i bampikwa kubwaninina, o mwanda baloñanga bilubo. (Yak. 3:2) Inoko Mfumwetu Yesu Kidishitu wibengidijanga mwanda wa kwitukwasha; i byabuntu byaetupele. w24.10 p. 18 mus. 1-2

Davida wāsapwidile wandi mwana Solomone amba ukanekenya enka shi wāendelele kukōkela Yehova Leza. Kya bulanda mu bununu bwandi, Solomone wāshilula kutōta baleza bakwabo. Yehova wāleka kumwitabija, ebiya Solomone wājimija tunangu twa kuludika na boloke. (1 Ba. 11:​9, 10; 12:4) Le i ñeni’ka yotuboila’ko? Kikōkeji kitwalanga ku kweselwa na Yehova. (Ñim. 1:​1-3) Shako, Yehova kalailepo kwitupa bupeta ne ntumbo ya Solomone. Inoko shi tumukōkele, uketupa tunangu tuketukwasha tukwate butyibi buyampe. (Nki. 2:​6, 7; Yak. 1:5) Misoñanya yandi ibwanya kwituludika kimfwa mu myanda itala kaji, masomo, kwipwija mukose, ne lupeto. Kulonda tunangu twa Leza kuketukinga ku misanshi ya nyeke. (Nki. 2:​10, 11) Tukekala na balunda bayampe. Kadi tukekala na būmi bwa nsangaji mu kisaka. w24.11 p. 10-11 mus. 11-12

Bambutwile badi na mikenga mishileshile isangaja ya kwisambila na wabo mwana pa myanda itala Bible ne pa mwa kwikadila na lwitabijo mudi Leza. Mubwanya kwikala na ino mikenga kitatyi kyomukapempula mamizé, biwanza bya mityi, nansha pomukapempula bilo ya musambo ya Batumoni ba Yehova. Kimfwa, kitatyi kyomupempula mizé, ekale bya mpala na mpala nansha ku kingidilwa kya busendwe, mubwanya kukokela ñeni ya wenu mwana pa binkumenkume bya mu mānga nansha pa bipungwa bya pa kala bine bibwanya kukomeja lwitabijo lwa wenu mwana lwa amba Bible i wa bine. Le wenu mwana uyukile amba dijina dya Leza dya bunka ditanwanga pa dibwe diyukene bu Dibwe dya mu Moabu dine ke dilāle myaka 3000? Pa Dibwe dya mu Moabu difwatulwe i palembwe binenwa bya amba “Bible ne Dijina dya Leza” bitūdilwe ku Kité kya Ntanda Yonso kya Batumoni Ba Yehova ku Warwick, mu New York. Dibwe dya mu Moabu dilombola’mba Mulopwe Mesha wa Moabu wātombokēle Isalela. Bino i bikwatañane na binena Bible. (2 Ba. 3:​4, 5) Kitatyi kīmwena wenu mwana na meso andi bubinga bulombola’mba Bible unenanga bya bine, lwitabijo lwandi lukaningila’ko. w24.12 p. 14 mus. 4; p. 15 mus. 6