Balopwe wa Bubidi 3:1-27
3 Yeholama+ mwanā Ahaba wabikele pa Isalela mu Samadia mu mwaka wa 18 wa Yehoshafata mulopwe wa Yuda, wabikele myaka 12.
2 Wadi ulonga nyeke bibi ku meso a Yehova, ino ke pamopo bwa shandi nansha inandi, mwanda aye watalwile kikomo kikola kya Bāla kyalongele shandi.+
3 Inoko walamete ku bubi bwa Yeloboame mwanā Nebata bwaalubije Isalela.+ Kafundukile’kopo.
4 Ino Mesha mulopwe wa Moabu wadi kimunye wa mikōko, kadi wadi ulambula mulopwe wa Isalela twana twa mikōko 100 000 ne mikōko milume yampikwa kutendwa myoya 100 000.
5 Ahaba’tu pa kufwa,+ mulopwe wa Moabu watombokela mulopwe wa Isalela.+
6 Penepo Mulopwe Yeholama watamba mu dine difuku’dyo waenda ku Samadia wakongakanya Isalela ense.
7 Watuma ne musapu kudi Yehoshafata mulopwe wa Yuda, kanena’mba: “Mulopwe wa Moabu wantombokela. Le usa kwenda nami tukalwe divita na Moabu?” Nandi amba: “Nsa kwenda.+ Ami ngidi pamo bwa abe. Bantu bami badi pamo bwa bantu bobe. Ne tubalwe twami pamo bwa tubalwe tobe.”+
8 Kupwa waipangula’mba: “Le tusa kwenda dishinda’ka?” Nandi walondolola’mba: “Mu dishinda dya mu ntanda mutuputupu ya Edoma.”
9 Kupwa mulopwe wa Isalela watamba pamo ne mulopwe wa Yuda ne mulopwe wa Edoma.+ Pobadi benda batontoloka lwendo lwa mafuku asamba-abidi, kekwadipo mema a basola ne a banyema ba nja badi bebalonda kunyuma.
10 Mulopwe wa Isalela wanena’mba: “Yō, i kya bulanda! Yehova waite bano balopwe basatu mwanda’tu wa kwibapāna mu makasa a Moabu!”
11 Ponkapo Yehoshafata wanena’mba: “Le kuno kekudipo mupolofeto wa Yehova amba twipangule Yehova kupityila kwadi?”+ Umo wa mu bengidi ba mulopwe wa Isalela walondolola’mba: “Kudi Edisha+ mwanā Shafata, wadi upungulwilanga Ediya+ mema ku makasa.”*
12 Kupwa Yehoshafata wanena’mba: “Kinenwa kya Yehova kidi nandi.” Ebiya mulopwe wa Isalela ne Yehoshafata ne mulopwe wa Edoma batūkila kwadi.
13 Edisha wanena mulopwe wa Isalela amba: “Le ndi nobe mwanda’ka?*+ Enda kudi bapolofeto ba shobe ne bapolofeto ba inobe.”+ Ino mulopwe wa Isalela wamunena’mba: “Mhm, mwanda i Yehova waita bano balopwe basatu mwanda wa kwibapāna mu makasa a Moabu.”
14 Ponkapo Edisha wanena’mba: “Bine ne Yehova wa bibumbo oñingidila* byadi mūmi, shi nkyadipo ndēmekele Yehoshafata+ mulopwe wa Yuda, nkyadipo wa kukutala nansha kukuta mutyima kwine.+
15 Shi ke pano ndetelei muntu omba lunsense.”*+ Yewa omba lunsense pa kushilula’tu komba, kuboko kwa Yehova kwaiya pādi.+
16 Kanena’mba, “Yehova wanena namino amba: ‘Kolai mvwa mingimingi mu uno musanza,*
17 mwanda Yehova wanena namino amba: “Kemusapo kumona luvula, kadi kemusapo kumona mvula; ino mu uno musanza* musa kuyula mema bā,+ musa kutoma’o banwe ne bimunanwa byenu, pamo ne banyema benu bakwabo.”’
18 Inoko uno i mwanda mutyetye’tu ku meso a Yehova,+ mwanda usa ne kupāna Moabu mu makasa enu.+
19 Mufwaninwe kutūta bibundi byonso bikomejibwe+ ne bibundi byonso bilumbuluke, kadi mufwaninwe kutēta mityi yonso miyampe, ne kujika masulo onso a mema, mufwaninwe ne kona na mabwe tupindi tonso tuyampe twa ntanda.”+
20 Ebiya lubanga, pa kitatyi kilambulwanga kyamulambu kya miseke+ kya lubanga, mema atamba mu kitulumukila dya ku Edoma, penepa ntanda’ya yayula mema bā.
21 Bene Moabu bonso baivwana amba balopwe abakanda kulwa nabo, penepo bakongakanya bana-balume bonso badi babwanya kusela byabulwi,* kadi bakemana ku mukalo.
22 Abo pa kubūka lubanga futwi, dyuba dyadi dyasa pa mema, ebiya bene Moabu badi bukila bukwabo bamona mema atyila pyā bwa mashi.
23 Kebanena’mba: “Ano i mashi! Na bubine balopwe abekube abo bene na bene na kipete. Shi ke pano a Moabu, katūte bintu!”+
24 Abo pa kutwela mu nkambi ya Isalela, bene Isalela baimana kebatape bene Moabu, nabo bebanyema.+ Baenda’nka ne mu Moabu mwine, benda koku batapa bene Moabu.
25 Babundula bibundi, kadi muntu ne muntu waela dibwe mu kapindi ne kapindi kayampe ka ntanda, badinga’mo mabwe bā; bajika masulo onso a mema,+ kadi batēta ne mityi yonso miyampe.+ Mfulo mfulō enka mumbu ya mabwe a Kile-Halesete+ yo yashele imene, ino boba belanga matopito bekijokoloka bekyonakanya.
26 Mulopwe wa Moabu pa kumona’mba abamunekenya mu bulwi, wasela bana-balume 700 belumbile bipete amba bakasaule dishinda dya kokwa kwadi mulopwe wa Edoma;+ ino kebabwenyepo.
27 Ponkapo wayata wandi mwana umbedi mwine wadi wa kubikala pa kyandi kyaba wamulambula bu kyamulambu kisōkwe+ pa lubumbu. Penepo bantu bafītyilwa Isalela mutyima bininge, nabo bataluka kwadi bajokela ku yabo ntanda.
