Balopwe wa Bubidi 2:1-25
2 Yehova paadi kaselela Ediya+ mūlu* mu kimpumpu kya luvula,+ Ediya ne Edisha+ batamba mu Ngilengale.+
2 Ediya wanena Edisha amba: “Shala’po bidi pano, mwanda Yehova wantume ku Betele. Ino Edisha walondolola’mba: “Bine ne Yehova byadi mūmi ne abe byodi* mūmi, nkisapo kukushiya.” Ebiya batūkila ku Betele.+
3 Penepo bana ba bapolofeto* ba mu Betele batamba baiya kudi Edisha kebamunena’mba: “Le uyukile amba Yehova usa kusela mfumobe aleke kwikala mutwe obe?”+ Ponkapo nandi wanena’mba: “Ndyukile’kyo kala. Ubai talala.”
4 Ebiya Ediya wanena’mba: “Edisha, shala’po bidi pano, mwanda Yehova wantume ku Yediko.”+ Ino aye amba: “Bine ne Yehova byadi mūmi ne abe byodi* mūmi, nkisapo kukushiya.” Penepo bafika ku Yediko.
5 Penepo bana ba bapolofeto badi mu Yediko bafwena Edisha kebamunena’mba: “Le uyukile amba Yehova usa kusela mfumobe aleke kwikala mutwe obe?” Ponkapo nandi wanena’mba: “Ndyukile’kyo kala. Ubai talala.”
6 Ebiya Ediya wamunena’mba: “Shala’po bidi pano, mwanda Yehova wantume ku Yodano.” Ino aye amba: “Bine ne Yehova byadi mūmi ne abe byodi* mūmi, nkisapo kukushiya.” Ponkapo abo bonso bubidi baenda.
7 Penepa bana ba bapolofeto 50 nabo baenda kebemene batadila dya kulampe papo abo bubidi bemene dya ku Yodano.
8 Kupwa Ediya wayata kivwalwa kyandi kya bupolofeto+ wekivunga wakupila pa mema, nao eabanya ku lunkuso ne ku lundyo, penepo abo bonso bubidi baabuka pa nshi myūmu.+
9 Abo’tu pa kwabuka, Ediya wanena Edisha amba: “Nombe kyosaka nkulongele pano ponkyaselelwe kodi.” Ebiya Edisha wanena’mba: “Nakwisāshila, mbulwepo kupebwa bipindi bibidi+ bya mushipiditu obe?”+
10 Walondolola’mba: “Ubalombe kintu kikomo. Shi ubaumone ponsa kuselwa kodi, bisa kukulongekela wao muswelo; shi kumwenepo nabya kebisapo kulongeka.”
11 Pobadi benda pamo, benda besamba, na mu kukopa kwa diso dikalo dya mudilo+ ne tubalwe twa mudilo byebakalañanya abo bonso bubidi, ponkapo Ediya wakanda mūlu* mu kimpumpu kya luvula.+
12 Edisha paadi utala wadi udila’mba: “A tata, a tata! Dikalo dya Isalela ne bakandanga pa tubalwe bandi!”+ Aye pa kumujimina mu meso, wakwata bivwalwa byandi, webisana bipēta bibidi.+
13 Kupwa waboya kivwalwa kya bupolofeto+ kyaponene Ediya wajoka waimana ku lubungo lwa Yodano.
14 Penepo wasela kivwalwa kya bupolofeto kyaponene Ediya wakupila pa mema kanena’mba: “Le Yehova Leza wa Ediya udi kwepi?” Aye pa kukupila pa mema, nao eabanya ku lunkuso ne ku lundyo, penepo Edisha waabuka.+
15 Bana ba bapolofeto badi mu Yediko pa kumumona dya kulampe, kebanena’mba: “Mushipiditu wa Ediya ubatūkila Edisha.”+ Ebiya baenda kukamusambakana kebevukwila pa nshi ku meso andi.
16 Bamunena’mba: “Bengidi bobe aba kebo na bana-balume bankanka 50. Wibaleke’po bidi bende bakakimbe mfumobe. Padi mushipiditu* wa Yehova ubamutekunanga ubakamwela pa lūlu kampanda nansha mu musanza kabidye.”+ Ino aye wanena’mba: “Kemwakibatumai.”
17 Inoko, abo badi bamuningila’nka kumuningila kufika ne byaetyepelwe, ponkapo webanena’mba: “Mwibatumei.” Batuma bana-balume 50, nabo bamukimba’nka kumukimba mafuku asatu ino kumusokola mpika.
18 Abo pa kujokela kwadi, bamutana ushikete mu Yediko.+ Kupwa webanena’mba: “Mwene nemusapwidile amba kemwakyendai?”
19 Kitatyi pa kupita’po bana-balume ba mu kibundi banena Edisha amba: “A mfumwetu umwene abe mwine amba kibundi kidi payampe;+ ino mema i mabi, ne ntanda keibutulangapo.”*
20 Penepo wanena’mba: “Letai lweso lupya mwele’mo ne mwepo.” Nabo bamuletela’lo.
21 Ebiya waenda ku nsulo ya mema waela’mo mwepo,+ kanena’mba: “Yehova wanena namino amba, ‘Naundapa ano mema. Keakikaletapo monka lufu nansha buumba.’”*
22 Penepo mema aundapwa kufika ne dyalelo, mungya binenwa byanenene Edisha.
23 Watamba kwine’kwa wakanda ku Betele. Paadi wenda mwishinda, banuke bamo bana-balume batamba mu kibundi kebamupunika,+ banena’nka kunena’mba: “Kanda, abe wa dibala! Kanda, abe wa dibala!”
24 Mfulo mfulō waalamuka webatala, webafinga mu dijina dya Yehova. Penepo bauluse babidi bakaji+ batamba mu ditó basasamuna’po banuke 42.+
25 Watamba kwine’kwa waendelela kufika ne ku Lūlu lwa Kalamela,+ ebiya watamba kwine’kwa wajokela ku Samadia.
Kunshi kwa Dyani
^ Nansha’mba “mu makumbi.”
^ Nansha’mba “muya obe byoudi.”
^ Kishima “bana ba bapolofeto” kimweka bu kifunkila pa masomo a kufundija bapolofeto nansha kitango kya bapolofeto.
^ Nansha’mba “muya obe byoudi.”
^ Nansha’mba “muya obe byoudi.”
^ Nansha’mba “mu makumbi.”
^ Nansha’mba “luvula.”
^ Bibwanika padi i, “ilengejanga kupulumuna.”
^ Bibwanika padi i, “kupulumuna.”
