Balopwe wa Bubidi 17:1-41

  • Hoshea, mulopwe wa Isalela (1-4)

  • Kupona kwa Isalela (5, 6)

  • Isalela waselwa bu misungi pa mwanda wa bupondo (7-23)

  • Beni abatwejibwa mu bibundi bya Samadia (24-26)

  • Mutōtelo musobakane wa bene Samadia (27-41)

17  Mu mwaka wa 12 wa Ahaza mulopwe wa Yuda, Hoshea+ mwanā Elā wabikala pa Isalela mu Samadia; wabikele myaka kitema.  Wadi ulonga nyeke bibi ku meso a Yehova, ino ke pamopo bwa balopwe ba Isalela bamubadikidile.  Shalemanese mulopwe wa Ashidia wakanda kukamutamba bulwi,+ penepo Hoshea waikala mwingidi wandi kamulambula mulambu.+  Ino mulopwe wa Ashidia waivwana’mba Hoshea nandi udi mu boba bamukutyila kitumba, mwanda Hoshea watumine mikendi kudi So mulopwe wa Edipito+ kadi kadipo ukilambula mulambu kudi mulopwe wa Ashidia mwaadi ulambwilanga myaka kunyuma. Penepo mulopwe wa Ashidia wamukuta wamwela mu kifungo.  Mulopwe wa Ashidia watwela ku bukomo mu ntanda yonso’ya, wafika ne ku Samadia wamutēkela kasāla mu myaka isatu.  Mu mwaka wa kitema wa Hoshea, mulopwe wa Ashidia wakwata Samadia.+ Kupwa waselela bantu ba Isalela mu Ashidia bu misungi+ webashikatyija mu Halaha ne mu Habole ku munonga wa Ngozane+ ne mu bibundi bya bene Mede.+  Byalongekele namino mwanda bantu ba Isalela bapile Yehova Leza wabo mambo, mwine webatambije mu ntanda ya Edipito mu lupusa lwa Felo mulopwe wa Edipito.+ Ino badi kebatōta* baleza bakwabo,+  badi balonda bibidiji bya mizo yapangilwe na Yehova ku meso a bene Isalela, kadi badi balonda bibidiji byatūdile’ko balopwe ba Isalela.  Bene Isalela badi balondalonda bintu byampikwa koloka ku meso a Yehova Leza wabo. Badi bōbaka nyeke mitenta mu bibundi byabo byonso,+ kushilwila ku kiteba kya mulami kutūla ne ku kibundi kikomejibwe.* 10  Badi beshimikila nyeke bikomo bikola ne bipanda bikola*+ pa mitenta yonso ne munshi mwa mityi yonso mivwambile;+ 11  kadi pa mitenta yonso badi bafitwila’po mwishi wa bitapwa mwadi mulongela mizo yatuminwe na Yehova bu misungi ku meso abo.+ Badi balonga nyeke bibi mwanda wa kusanshija Yehova. 12  Badi bakingidila bilezaleza bya mukenye*+ byobebanenene kudi Yehova amba: “Kemufwaninwepo kulonga namino!”+ 13  Yehova wadi udyumuna’nka kudyumuna Isalela ne Yuda kupityila kudi bapolofeto bandi bonso ne kudi bamoni bonso ba bimonwa,+ amba: “Vundaminai mashinda enu mabi!+ Lamai mbila yami ne bitungo byami mungya bijila byonso byonasoñenye bakulutuba benu ne byonemutumīne na bengidi bami bapolofeto.” 14  Ino kebaivwenepo, baikala nyeke na mitwe myūmu pamo bwa* bakulutuba babo kebaikelepo na lwitabijo mudi Yehova Leza wabo.+ 15  Badi bapela nyeke misoñanya yandi ne kipwano kyandi+ kyaasambile na bakulutuba babo ne bivulujo byaebapele mwanda wa kwibadyumuna,+ kadi badi balonda’nka kulonda bilezaleza bya bitupu,+ ne abo bene+ baikala ba bitupu, baiula mizo yonso yadi ibajokolokele mine yebasoñenye Yehova amba kemufwaninwepo kwiiula.+ 16  Badi baleka nyeke mbila yonso ya Yehova Leza wabo, bapunga bankishi ba byuma* ba byana bya ñombe bibidi+ ne kipanda kikola*+ kadi badi bevukwila ku bibumbo byonso bya mūlu+ ne kwingidila Bāla.+ 17  Badi bapityija ne babo bana bana-balume ne bana-bakaji mu mudilo,+ babuka lubuko+ ne kukimba mitāmu, kadi badi bepāne* nyeke mu kulonga bibi ku meso a Yehova mwanda wa kumusanshija. 18  Penepo Yehova walobela Isalela bininge, webafundula ne ku meso andi.+ Kashilepo muntu nansha umo, poso’nka kisaka kya Yuda kete. 19  Ne Yuda mwine kalaminepo mbila ya Yehova Leza wabo;+ nabo banangīle mu bibidiji byalondele Isalela.+ 20  Ebiya Yehova waela ntundu yonso ya Isalela, webafwija bumvu, kupwa webapāna mu kuboko kwa bantu ba kwibatūta, enka ne byaebafundwidile kulampe nandi. 21  Watalula Isalela ku njibo ya Davida, nabo babikika Yeloboame mwanā Nebata.+ Ino Yeloboame wasāsukija Isalela waleka kulonda Yehova, webalongeja bubi bukatampe. 22  Kadi bantu ba Isalela badi banangila nyeke mu bubi bonso bwalongele Yeloboame.+ Kebafundukile’kopo 23  enka ne Yehova byaatalwile Isalela ku meso andi, monka mwaanenene’kyo na bengidi bandi bonso bapolofeto.+ Enka nenki Isalela waselwa mu ntanda yabo waenda bu misungi mu Ashidia,+ mobakidi ne dyalelo’di. 24  Kupwa mulopwe wa Ashidia wasela bantu ba ku Babiloni, ba ku Kuta, ba ku Ava, ba ku Hamata, ne ba ku Sefavaime+ webashikatyija mu bibundi bya Samadia pa kyaba kya bene Isalela; bayata Samadia bashikata mu bibundi byandi. 25  Pobashilwile kushikata’mo dibajinji, kebadipo batyina* Yehova. Yehova nandi watuma bantambo mu bukata mwabo,+ nabo baipaya’mo bantu bamo. 26  Basapwila mulopwe wa Ashidia amba: “Mizo yowaselele bu misungi wakeishikatyija mu bibundi bya Samadia keiyukilepo mutōtelo* wa Leza wa yoya ntanda. O mwanda utuma’nka kutuma bantambo mu bukata mwabo kebebepaya, mwanda kekudipo nansha umo uyukile mutōtelo wa Leza wa yoya ntanda.” 27  Ponkapo mulopwe wa Ashidia webasoñanya’mba: “Selai kitobo umo mu boba bomwaselele’ko bu misungi, mumujokeje akekale kwine’kwa ebafundije mutōtelo wa Leza wa yoya ntanda.” 28  Ebiya kitobo umo wa mu boba bobaselele bu misungi kutamba ku Samadia wajoka kashikete mu Betele,+ waanza kwibafundija mobafwaninwe kutyinina* Yehova.+ 29  Inoko muzo ne muzo walongele leza* wabo, bebatūla mu mobo a kutōtela’mo pa mitenta yaubakile bene Samadia; muzo ne muzo wadi ulonga’nka namino mu bibundi byabo byobadi bashikata’mo. 30  Ebiya bantu ba Babiloni bapunga Sukote-Benote, bantu ba Kuta bapunga Nengale, bantu ba Hamata+ bapunga Ashima, 31  bene Ava nabo bapunga Nibahaza ne Talatako. Bene Sefavaime badi basōka babo bana mu mudilo kudi Adalameleke ne Anameleke, baleza ba Sefavaime.+ 32  Nansha byobadi batyina Yehova, ino batongele babitobo ba pa mitenta ba mu bantu bonso, nabo badi bebengidila ku mobo a kutōtela’mo a pa mitenta.+ 33  Shako badi batyina Yehova, ino batōta baleza babo mungya mutōtelo* wa mizo yobaselelwe’mo.+ 34  Kufika ne dyalelo balondanga mitōtelo* yabo ya kala. I kutupu nansha umo utōta* Yehova kadi kekudipo nansha umo ulonda bitungo byandi, ne butyibi bwandi, ne Bijila, ne mbila yapēne Yehova kudi bana ba Yakoba, washintyilwe dijina ke Isalela.+ 35  Yehova paasambile nabo kipwano,+ webasoñenye amba: “Kemufwaninwepo kutyina baleza bakwabo kadi kemufwaninwepo kwivukwila kobadi nansha kwibengidila nansha kwibalambula bitapwa.+ 36  Ino Yehova mwine wemutambije mu ntanda ya Edipito na bukomo bukatampe ne na kuboko kōlole,+ ye Aye omufwaninwe kutyina,+ kadi mufwaninwe kwivukwila kwadi, aye ye omufwaninwe kulambula bitapwa. 37  Ne kadi misoñanya, ne butyibi, ne Bijila, ne mbila yaemulembēle+ mufwaninwe kwibilonda nyeke kamo ne kamo, kemufwaninwepo kutyina baleza bakwabo. 38  Kemufwaninwepo kwilwa kipwano kyonasambile nenu,+ kadi kemufwaninwepo kutyina baleza bakwabo. 39  Ino mufwaninwe kutyina Yehova Leza wenu, mwanda aye ye usa kwimukūla ku kuboko kwa balwana nenu bonso.” 40  Ino kebakōkelepo, balonda’ko mutōtelo* wabo wa kala.+ 41  Shako ino mizo yadi keityina Yehova,+ inoko yadi kadi ingidila bankishi babo basōnge. Babo bana ne bankana babo balongele mwalongēle bakulutuba babo, kufika ne dyalelo.

Kunshi kwa Dyani

Kishima pa kishima i, “badi kebatyina.”
Ko kunena’mba, konsokonso, kudi bantu batyetye nansha bangi.
Kishima kya Kihebelu kibwanya kukwatañana na kishima “tuvwi” kadi i kingidijibwe mu muneneno wa kafutululo.
Kishima pa kishima i, “baūmije nshingo yabo pamo bwa nshingo ya.”
Nansha’mba “bankishi basungululwe.”
Kishima pa kishima i, “bepoteje.”
Nansha’mba “batōta.”
Nansha’mba “bibidiji bya mutōtelo.”
Nansha’mba “kutōta.”
Nansha’mba “baleza.”
Nansha’mba “bibidiji bya mutōtelo.”
Nansha’mba “bibidiji bya mutōtelo.”
Kishima pa kishima i, “utyina.”
Nansha’mba “bibidiji bya mutōtelo.”