Balopwe wa Bubidi 13:1-25
13 Mu mwaka wa 23 wa Yehoashe+ mwanā Ahazia+ mulopwe wa Yuda, Yehoahaze mwanā Yehu+ wabikala pa Isalela mu Samadia, wabikele myaka 17.
2 Wadi ulonga nyeke bibi ku meso a Yehova, kadi waūminine’nka mu bubi bwa Yeloboame mwanā Nebata bwaalubije Isalela.+ Kasāsukile’kopo.
3 Penepa bulobo bwa Yehova+ bwaakila Isalela bininge,+ webapāna mu kuboko kwa Hazaele+ mulopwe wa Shidea ne mu kuboko kwa Bene-Hadada+ mwanā Hazaele mu mafuku abo onso.
4 Mwenda mafuku Yehoahaze wazenza* Yehova, Yehova nandi wamwivwana, mwanda wamwene malwa obadi bamwesha Isalela+ kudi mulopwe wa Shidea.
5 Penepo Yehova waletela Isalela umpandiji+ wa kwibanyongolola mu lukono lwa Shidea, ebiya bene Isalela babwanya kushikata mu mobo abo na dibajinji.*
6 (Inoko, kebafundukilepo ku bubi bwa njibo ya Yeloboame bwaalubije Isalela.+ Baendelele mu buno bubi,* kadi kipanda kikola*+ kyadi kimene nyeke mu Samadia.)
7 Yehoahaze washele’tu na kibumbo kya divita kya bakandanga pa tubalwe 50, ne makalo 10, ne basola ba lwa nshi 10 000, mwanda mulopwe wa Shidea webonakenye,+ webatyampakanya pamo bwa luvumbi mu kitatyi kya kupūla bidibwa.+
8 Myanda mikwabo ya mānga ya Yehoahaze, byonso byaalongele ne bukomokomo bwandi, mwene i milembwe mu mukanda wa mānga ya bitatyi bya balopwe ba Isalela?
9 Kupwa Yehoahaze walādikwa mwanda wa kukōkolokwa na bakulutuba bandi, bamujīka mu Samadia;+ ebiya wandi mwana Yehoashe wabikala pa kyandi kyaba.
10 Mu mwaka wa 37 wa Yehoashe mulopwe wa Yuda, Yehoashe+ mwanā Yehoahaze wabikala pa Isalela mu Samadia, wabikele myaka 16.
11 Wadi ulonga nyeke bibi ku meso a Yehova, kafundukilepo ku bubi bonso bwa Yeloboame mwanā Nebata bwaalubije Isalela.+ Waendelele* mu buno bubi.
12 Myanda mikwabo ya mānga ya Yehoashe, byonso byaalongele ne bukomokomo bwandi ne mwaalwidile na Amazia mulopwe wa Yuda,+ mwene i milembwe mu mukanda wa mānga ya bitatyi bya balopwe ba Isalela?
13 Kupwa Yehoashe walādikwa mwanda wa kukōkolokwa na bakulutuba bandi, ebiya Yeloboame*+ washikata pa lupona lwandi. Yehoashe wajīkilwe mu Samadia na balopwe ba Isalela.+
14 Ino kitatyi kyabelele Edisha+ misongo mine yaafwile mwenda mafuku, Yehoashe mulopwe wa Isalela watūkila kwadi kamudila’mba: “A tata, a tata! Dikalo dya Isalela ne bakandanga pa tubalwe bandi!”+
15 Penepo Edisha wamunena’mba: “Sela buta bwa miketo ne miketo.” Nandi wasela buta bwa miketo ne miketo.
16 Kupwa wanena mulopwe wa Isalela amba: “Tūla kuboko kobe pa buta bwa miketo.” Nandi watūla’po kuboko, penepa Edisha watūla makasa andi pa makasa a mulopwe.
17 Ebiya wamunena’mba: “Shitula dididisha dya kutunduka.” Penepa nandi wedishitula. Edisha wanena’mba: “Sobola!” Nandi wasobola. Kupwa wanena’mba: “Muketo wa Yehova wa bushindañani,* muketo wa kushinda* Shidea! Usa kunekenya* Shidea ku Afeke+ enka ne byomutukija fututu.”
18 Wanena monka’mba: “Yata miketo,” nandi weiyata. Kupwa wanena mulopwe wa Isalela amba: “Kupila pa nshi.” Nandi wakupila pa nshi misunsa isatu waleka’byo.
19 Ponkapo muntu wa Leza wa bine wamufītyilwa mutyima kanena’mba: “Wadi ufwaninwe kukupila pa nshi misunsa itano nansha isamba! Nabya wadi wa kunekenya Shidea enka ne byomutukija fututu, ino pano usa kunekenya Shidea misunsa isatu kete.”+
20 Kupwa papo Edisha wafwa wajīkwa. Kwadi bibumbo bya bañonaona+ bya bene Moabu byadi bitwela mu ntanda ku ngalwilo kwa mwaka.*
21 Bantu bamo pobadi bajīka muntu, bamona kibumbo kya bañonaona, ponkapo bamwela bukidibukidi mu kibundu mwadi mujīkilwe Edisha banyema. Muntu’wa pa kutenga bikupa bya Edisha, waikala monka mūmi,+ waimana na maulu andi.
22 Ino Hazaele+ mulopwe wa Shidea wadi umwesha Isalela+ malwa mafuku onso a Yehoahaze.
23 Ino Yehova webatōkelwa mutyima ne kwibafwila lusa,+ webata mutyima pa mwanda wa kipwano kyaāsambile na Abalahama,+ Izake+ ne Yakoba.+ Kadipo usaka kwibonakanya, kadi kebafundwilepo ku meso andi kufika ne dyalelo.
24 Hazaele mulopwe wa Shidea pa kufwa, wandi mwana Bene-Hadada wabikala pa kyandi kyaba.
25 Penepa Yehoashe mwanā Yehoahaze wayata monka bibundi kudi Bene-Hadada mwanā Hazaele byaaselele shandi Yehoahaze mu divita. Yehoashe wamunekenya*+ misunsa isatu, penepa wajokeja bibundi bya Isalela.
Kunshi kwa Dyani
^ Nansha’mba “wanekenya mpala.”
^ Ko kunena’mba, mu ndoe ne mutyima-nteke.
^ Kishima pa kishima i, “Mu abo wanangile.”
^ Tala Nshintulwilo ya Bishima.
^ Kishima pa kishima i, “Wanangīle.”
^ Ko kunena’mba, Yeloboame II.
^ Nansha’mba “lupandilo.”
^ Nansha’mba “kupandija kudi.”
^ Nansha’mba “kushinda.”
^ Kishima pa kishima i, “pa kutwela kwa mwaka,” mobimwekela i ku ngalwilo kwa buyo.
^ Nansha’mba “wamushinda.”
