Mwendele Mako 13:1-37
13 Paadi katambe mu tempelo, wandi mwanā bwanga umo kamunena’mba: “A Mufundiji, tala! ano mabwe ne byūbakwa i bya kutendelwa kashā!”+
2 Ino Yesu wamunena’mba: “Le umwene bino byūbakwa bikatampe’bi? I kutupu dibwe nansha dimo dikashala ditentamine pa dibwe dikwabo kwampikwa kubundwilwa panshi.”+
3 Paadi ushikete ku Lūlu lwa Impafu kampalampala na tempelo, Petelo, Yakoba, Yoano, ne Andele bamwipangula pafula’mba:
4 “Witulombole’po bidi, i kyaba’ka kikekala’ko bino bintu, ne i kiyukeno’ka kikalombola kitatyi kya kufika bino bintu byonso ku mvuyo?”+
5 Penepo Yesu washilula kwibanena’mba: “Tadijai kutyina’mba muntu nansha umo wakemongola.+
6 Bavule bakāya batela dijina dyami, amba, ‘Amiwa ye aye,’ kadi bakongolanga bavule bene.
7 Kadi shi mubaivwana mavita ne myanda ya mavita, kemwakatuyukai; bino bintu bifwaninwe kufika, ino ke mfulopo kala.+
8 “Mwanda muzo ukatamba muzo mukwabo ne bulopwe nabo bulopwe bukwabo;+ kukekala kutenkana kwa ntanda kwadi koku kekudi koku; kukekala ne bimpengele bya nzala.+ Bino’bi i ngalwilo ya bisanso bya malwa.+
9 “Nanshi banwe, tadijai. Bantu bakemufikija ku bidye bya kwenu,+ kadi bakemukupila mu mashinankonka+ ne kwimusambila ku bambikavu ne balopwe pa mwanda wa amiwa, mwanda wa bukamoni kobadi.+
10 Kadi myanda miyampe ifwaninwe bidi kusapulwa+ mu mizo yonso.
11 Kadi shi abemusela kukemufikija’ko, kemwakizumbijai kala mityima pa byomukanena; inoko kyonso kimupebwa pa mine nsá’ya, nenai’kyo, mwanda ke banwepo banena, ino i mushipiditu ujila.+
12 Ne kadi, muntu ukaba mwanabo amba epaibwe, shamuntu nandi mwana, ne bana nabo bakatombokela bambutwile ne kwibepaija.+
13 Kadi mukashikibwa na bantu bonso pa mwanda wa dijina dyami.+ Ino yewa wa kūminina* kufika ne ku mfulo kwine+ ukapandanga.+
14 “Inoko, shi mubamone kintu kya mukenye kileta musala+ kimene pokekifwaninwepo (yewa utanga ekale kusansanya), nankyo boba badi mu Yudea bashilule kunyemena ku ngulu.+
15 Yewa udi peulu pa njibo kakitūka nansha kutwela kukasela kintu mu njibo yandi;
16 kadi yewa udi ku madimi kakijokela ku bintu bidi kunyuma kukasela kivwalwa kyandi kya pangala.
17 Malwa abo bana-bakaji ba memi ne boba bamisha mwana mu oa mafuku!+
18 Lombelai’nka kulombela’mba kebyakekala mu kitatyi kya mashika;
19 mwanda oa mafuku akekala mafuku a kyamalwa+ kekyaikele’ko kashā tamba ku ngalwilo ya bupangi bwāpangile Leza, kufika ne pa kyokya kitatyi, kadi kekikekala’kopo monka.+
20 Na bubine, shi Yehova* kaipipijepo mafuku’a, longa kekwadipo kwa kupanda ngitu nansha imo. Ino pa mwanda wa batongwe batongele, waipipija mafuku.+
21 “Ne kadi shi muntu kaemunena’mba, ‘Monai’po! Kidishitu yeu kuno,’ nansha amba, ‘Monai’po! Yewa kokwa,’ kemwakitabijai’byo.+
22 Mwanda kukatamba Bakidishitu ba bubela ne bapolofeto ba bubela+ kadi bakalonga biyukeno ne bintu bya kutendelwa bya kubombola ne batongwe shi bibwanika.
23 Banwe nanshi dyumukai.+ Ami napu kala kwimulombola bintu byonso.
24 “Ino mu oa mafuku, pa kupwa kwa kyamalwa’kya, dyuba dikafītyijibwa, kweji nandi kakaletapo kitōkeji kyandi,+
25 ñenyenye ikapona mūlu, ne bya bukomo bidi momwa mūlu nabyo bikatenkanibwa.
26 Penepo bakamona Mwanā muntu+ wiya mu makumbi na bukomo bukatampe ne ntumbo.+
27 Penepo nandi ukatuma bamwikeulu kadi ukabungakanya batongwe bandi kutamba ku mvula iná, tamba ku mfulo ya ntanda kutūla ku mfulo ya diulu.+
28 “Nanshi, boilai ñeni ku kino kyelekejo kya kikuyu: Popa’tu pepinga musambo wakyo mwana ne kushipuka mani, muyukanga’mba ke pabwipi na ku dikumbi.+
29 Ne banwe nenu mo monka, shi mubamone bino bintu bilongeka, yukai amba kadi pabwipi ponka pa bibelo.+
30 I bine nemulombola’mba luno lukongo kelukapitepo nansha dimo enka ne bilongeka bino bintu byonso.+
31 Diulu ne ntanda bikapita,+ ino binenwa byami kebikapitepo nansha dimo.+
32 “Pa mwanda wa dyodya difuku ne nsá mine, i kutupu nansha umo wibiyukile, nansha bamwikeulu mūlu nansha Mwana, poso’nka Tata.+
33 Talai’nka kutala, kemwakilālai,+ mwanda kemuyukilepo kitatyi kitungwe pokikafika.+
34 Bidi pamo’nka bwa muntu umo wenda ku ntanda ingi, washiye njibo yandi ne kupa bapika bandi lupusa,+ muntu ne muntu mwingilo wandi, kadi wasomanya kalama wa pa kibelo akeshe’nka kukesha.+
35 Nanshi keshai’nka kukesha mwanda kemuyukilepo kitatyi kīya mwinē njibo,+ shi i kyolwa bininge, shi i pa bukata bwa bufuku, shi i ku mazolo, nansha i lubanga bwē,+
36 mwanda shi waiya mu kitulumukila, kakimutana mulēle.+
37 Ino kyokya kyonemunena, nanena’kyo ne ku bonsololo amba: Keshai’nka kukesha.”+
