Nkindi 4:1-27
4 A bami bana, ivwanai bulemununi bwa shenu,+Tai mutyima amba mwikale na ñeni,
2 Mwanda nkemupanga bulombodi buyampe;Kemwakalekai bufundiji bwami.*+
3 Ami nadi mwana wa bine kudi tata+Kadi mwine obasenswe mpata kudi mama.+
4 Wamfundije kaunena’mba: “Mutyima obe ukwatyije binenwa byami.+
Lama mbila yami wikale mūmi nyeke.+
5 Ikala na tunangu, ikala na ñeni.+
Kokelwa, kadi kokasāsuka byonesamba.
6 Kokaleka’to, nato tukakukinga.
Witusanswe, tukakulamanga.
7 Tunangu kyo kintu kya mvubu*+ kutabuka, o mwanda ikala na tunangu,Kadi pamo ne byonso byoikala nabyo, ikala na ñeni.+
8 Witumone bu twa bulēme bininge, nato tukakuzunzulanga.+
Tukakulēmekanga mwanda ubetufumbakanya.+
9 Tukatūlanga kilukwa kya maluba kinengele pa mutwe obe;Tukakuneñenya na kilukwa kya buya.”
10 A wami mwana ivwana, itabija binenwa byami,Ne myaka ya būmi bobe ikavulanga.+
11 Nkakulombolanga dishinda dya tunangu;+Nkakwendejanga mu tushinda twa boloke.+
12 Kitatyi kyoenda, matabula obe keakakalakanibwapo;Kadi shi unyeme lubilo, kukakukalapo.
13 Kwatyija bulemununi; kokebulekelela bwende.+
Wibulame, mwanda abo i būmi bobe.+
14 Kokatwela mu kashinda ka babi,Kadi kokenda mu dishinda dya bantu babi.+
15 Wikanyeme, kokenda’mo;+Sāsuka’ko, wikapite bitupu.+
16 Mwanda abo kebabwanyapo kulāla shi kebalongelepo bibi.
Bebebanga tulo shi kebaponejepo muntu.
17 Badyanga mukate wa bubi,Ne kutoma vinyu ya lūma.
18 Ino kashinda ka bantu boloke kadi pamo bwa kitōkeji kya lubanga kyeñenyaKyenda kibaila’ko kufika ne bikanda dyuba mu mitwe.+
19 Dishinda dya babi didi pamo bwa fukutu;Kebayukilepo kibakukaja.
20 Wami mwana, tá mutyima ku binenwa byami;Ivwanija biyampe* binenwa byami.
21 Kokebijimija mu meso obe;Wibilame munda mwa mutyima obe,+
22 Mwanda abyo i būmi ku boba basokola’byo+Ne bukomo ku ngitu yabo yonso.*
23 Kutabuka bintu byonso byolama, lama mutyima obe,+Mwanda mo mudi masulo a būmi.
24 Sonsolola kodi binenwa bya bukondame,+Kadi fundula kodi mīsambo ya buzazangi.
25 Meso obe atale kumeso sō,Bine, bambila sō* kumeso kobe.+
26 Seneja biyampe* dishinda dya maulu obe,+Kadi mashinda obe onso akekala senene.
27 Kokalēmenena ku lundyo nansha ku lunkuso.+
Sonsolola maulu obe ku bibi.
Kunshi kwa Dyani
^ Nansha’mba “bijila byami.”
^ Nansha’mba “kibajinji.”
^ Kishima pa kishima i, “Tebeka kutwi kobe ku.”
^ Kishima pa kishima i, “ku mwita wabo onso.”
^ Nansha’mba “meso akeleme.”
^ Bibwanika padi i, “Bandaula senene.”
