Nkindi 10:1-32
10 Nkindi ya Solomone.+
Mwana wa tunangu usangajanga shandi,+Ino mwana mulembakane i njia ya inandi.
2 Byabulēme bisokolwa na bubi kebikekalapo na kamweno,Ino boloke bo bukūla ku lufu.+
3 Yehova kakalengejapo moloke* ekale na nzala,+Ino ukasuminwa babi byobabila mpata.
4 Maboko mazoboloke akalenga bulanda,+Ino maboko a kininga aletanga bupeta.+
5 Mwana ulonga bintu na bujinguludi ukongakanyanga byangulwa mu bushipo,Ino mwana ulonga bya bumvu ulālanga bukidi bonka mu mwangulo.+
6 Madyese adi pa mutwe wa moloke,+Ino kyakanwa kya babi kifyanga lūma.
7 Kivulukilo* kya moloke i kya kweselwa,+Ino dijina dya babi dikabola.+
8 Muntu wa mutyima wa tunangu uketabija bulombodi,*+Ino yewa wisamba bya bulembakane ukanyantwa panshi.+
9 Yewa unanga mu bululame ukananga na mutyima-ntenke,+Ino yewa ukondamija mashinda andi ukasokolwa.+
10 Yewa ufīka diso dyandi na budyumuku uleñanga njia,+Kadi yewa wisamba bya bulembakane ukanyantwa panshi.+
11 Kyakanwa kya moloke i nsulo ya būmi,+Ino kyakanwa kya babi kifyanga lūma.+
12 Mushikwa ukolomonanga lupotopoto,Ino buswe bupūtanga kujilula konso.+
13 Tunangu tutanwa ku milomo ya muntu wa kusansanya,+Ino lusonde ludi’ko mwanda wa nyuma ya yewa wampikwa ñeni.*+
14 Boba badi na tunangu bebikilanga buyuki,+Ino kyakanwa kya mulembakane kītanga musala.+
15 Bupeta bwa* mpeta i kibundi kyandi kikomejibwe.
Ino musala wa balanda i bulanda bwabo.+
16 Mwingilo wa moloke utwalanga ku būmi;Ino bipa bya mubi bitwala ku bubi.+
17 Yewa uta mutyima ku bulemununi i kashinda ka būmi,*Ino yewa usūla madingi ulubija bakwabo.
18 Yewa ufya mushikwa wandi wisambanga bya bubela,+Kadi yewa usambakanya myanda* na nshikani i kivila.
19 Shi binenwa i bingi, kujilula kekubulwe’mopo,+Ino yewa ulama milomo yandi uloñanga bya budyumuku.+
20 Ludimi lwa moloke ludi pamo bwa ndalama milumbuluke mpata,+Ino mutyima wa mubi udi na bulēme butyetye.
21 Milomo ya moloke idishanga* bavule,+Ino mulembakane ufwanga mwanda wa kubulwa ñeni.+
22 I dyese dya Yehova dipetejanga muntu,+Kadi Aye kabwejanga’kopo misanshi* nansha dimo.
23 Kwipāna mu mwiendelejo wa bumvu i pamo bwa makayo kudi kivila,Ino tunangu tudi kudi muntu wa kusansanya.+
24 Kyokya kityina mubi e kyo kikamufikila;Ino kyokya kisakasaka moloke kikamupebwa.+
25 Shi kimpumpu kibapite, mubi kakekala’kopo monka,+Ino yewa moloke i kyalwilo kya nyeke.+
26 Pamo bwa busuku busosoma ku meno ne mwishi mu meso,Ye mwikadile ne muzoze kudi yewa umutuma.*
27 Kutyina Yehova kulepejanga būmi,+Ino myaka ya babi ikepipijibwa.+
28 Kukungila kwa* moloke kuletanga nsangaji,+Ino lukulupilo lwa babi lukoneka.+
29 Dishinda dya Yehova i kifuko kikomejibwe kudi wampikwa kutopekwa,+Ino i musala ku banonga-bibi.+
30 Moloke kakaponejibwapo nansha dimo,+Ino babi kebakekalapo monka pano pa ntanda.+
31 Kyakanwa kya moloke kilupulanga* tunangu,Ino ludimi lupupakane lukatalulwa’ko.
32 Milomo ya moloke iyukile byobya bisangaja,Ino kyakanwa kya babi i kipupakane.
Kunshi kwa Dyani
^ Nansha’mba “muya wa moloke.”
^ Nansha’mba “Ntumbo.”
^ Kishima pa kishima i, “mbila.”
^ Kishima pa kishima i, “wampikwa mutyima.”
^ Nansha’mba “Kintu kya bulēme kya.”
^ Bibwanika padi i, “udi mu kashinda ka būmi.”
^ Nansha’mba “myanda ya kupupula.”
^ Nansha’mba “iludikanga.”
^ Nansha’mba “bulanda; masusu.”
^ Nansha’mba “mwine waingidila.”
^ Nansha’mba “Lukulupilo lwa.”
^ Nansha’mba “kipanga bipa bya.”
