Nkindi 29:1-27
29 Muntu ūmija nshingo yandi* pa kupwa kudingilwa misunsa mivule+Ukatyumunwa mu kitulumukila byakondapibwapo.+
2 Shi boloke i bangi, bantu basangalanga,Ino shi mubi wabikala, bantu babinzanga.+
3 Muntu usenswe tunangu usangajanga shandi,+Ino yewa upwana na bandumba usupakanyanga bupeta bwandi.+
4 Na boloke mulopwe ushimatyijanga ntanda senene,+Ino muntu ukimba kutyibwa milomo wiiletelanga musala.
5 Muntu ushiñanya mukwaboUtanga maulu andi bukonde.+
6 Kujilula kwa muntu mubi kumupijanga mu dikinga,+Ino moloke aye welanga nsadi ya tusepo ne kusangala.+
7 Moloke utanga mutyima ku byepelo bya balanda,+Ino mubi aye katanga’kopo mutyima uno muswelo.+
8 Bantu ba mitatulo basōkanga kibundi,+Ino boba ba tunangu batalajanga bulobo.+
9 Shi muntu wa tunangu wipotomeja na mulembakane,Kukekala kavulubi ne kafutululo, ino kekukekalapo talala.+
10 Bantu bamwanga mashi bashikilwe yewa ense wampikwa mambo,*+Kadi bakimbanga kuyata būmi bwa* bantu boloke swā.*
11 Kivila kinenanga patōka milangwe* yakyo yonso,+Ino wa tunangu aye ubandaulanga’yo talala nyā.+
12 Shi mulopwe uta mutyima ku bubela,Bengidi bandi bonso bakekala babi.+
13 Mulanda ne yewa umwesha bantu malwa i beifwane* pa kino kintu:
Yehova upanga meso a abo bonso babidi kitōkeji.*
14 Shi mulopwe utyibila balanda mambo na boloke,+Lupona lwandi lukashimatyija nyeke.+
15 Lusonde* ne madingi biletanga tunangu,+Ino mwana mulekwe bitupu ufwijanga inandi bumvu.
16 Shi babi abavula, kujilula nako kuvulanga,Ino boloke bakamona kupona kwabo.+
17 Lemununa obe mwana nandi ukakwikadija talala;Kadi ukakuletela* nsangaji mikatampe.+
18 Kokwa kekudipo kimonwa,* bantu balekwanga bitupu,+Ino ba nsangaji i boba balama bijila.+
19 Mwingidi kaketabijapo kōlolwa na binenwa,Mwanda nansha shi waivwana, kakōkelangapo.+
20 Le kodi mumone muntu upēlakana kunena?+
Kudi lukulupilo ku mulembakane kupita’ko kudi aye.+
21 Shi mwingidi ulelemunwa tamba pa bwanuke,Mwenda mafuku ukekala muntu wampikwa kufwija’ko.
22 Muntu ulobaloba ukolomonanga lupotopoto;+Ino yewa udi na mutyima wa bukalabale bya mwiko ujilulanga bininge.+
23 Kwizunzula kwa muntu kukamutūkija panshi.+Ino yewa ense mwityepeje mu mushipiditu ukamona ntumbo.+
24 Mukwabo na ngivi wishikilwe aye mwine.*
Ubwanya kwivwana lubila lwa kukimba bukamoni,* ino kunena kintu mpika.+
25 Kuzakala* bantu i* dikinga,+Ino yewa ukulupile mudi Yehova ukakingwa.+
26 Bantu bavule bakimbanga kwimona na* mulopwe,Ino kubingijibwa kwa muntu kutambanga kudi Yehova.+
27 Muntu mukondame i wa munyanji kudi moloke,+Ino yewa wa dishinda dyoloke swā i wa munyanji kudi yewa mubi.+
Kunshi kwa Dyani
^ Nansha’mba “wa kibengo nyeke.”
^ Nansha’mba “wampikwa kutopekwa.”
^ Nansha’mba “muya wa.”
^ Bibwanika padi i, “Ino muntu moloke swā ukimbanga kukinga būmi bwandi.”
^ Kishima pa kishima i, “mushipiditu.”
^ Kishima pa kishima i, “betananga.”
^ Ko kunena’mba, Wibapanga būmi.
^ Nansha’mba “Bulemununi; Mfuto.”
^ Nansha’mba “ukaletela obe muya.”
^ Nansha’mba “kimonwa kya bupolofeto; kusokwelwa.”
^ Nansha’mba “ushikilwe muya wandi.”
^ Kishima pa kishima i, “mutyipo wa mafingo.”
^ Nansha’mba “Kutyina.”
^ Nansha’mba “kutanga.”
^ Bibwanika padi i, “bakimbanga kwitabijibwa na.” Kishima pa kishima i, “bakimbanga mpala ya.”
