Ñimbo ya Mitōto 62:1-12
Kudi mukulu wa bañomba; lwa Yedutuna.* Lwimbo lwa Davida.
62 Bine, ami ntengele* Leza talala nyā.
Lupandilo lwami lutambanga kwadi.+
2 Bine, aye i dibwe dyami ne lupandilo lwami, kinyemeno kyami kya mutyima-ntenke;*+Nkikatenkanapo bininge nansha dimo.+
3 Lelo banwe mukatamba muntu kufika ne kitatyi’ka mwanda wa kumwipaya?+
Banwe bonso muleta kyaka pamo bwa lubumbu lusendalale, lubumbu lwa mabwe lukimba kupona.*
4 Ke-pantu bakalanga ñeni mwanda wa kumuponeja pa kifuko kyandi kya peulu;*Baloelelwe kubepa bubela.
Besela na kyakanwa kyabo, ino munda mwabo bafinga.+ (Sela)
5 Bine, ami ntengele Leza talala nyā*+Mwanda lukulupilo lwami lutambanga kwadi.+
6 Bine, aye i dibwe dyami ne lupandilo lwami, kinyemeno kyami kya mutyima-ntenke;Nkikatenkanapo nansha dimo.+
7 Lupandilo lwami ne ntumbo yami bitambanga kudi Leza.
Dibwe dyami dikomo, ne kinyemeno kyami, i Leza.+
8 Mukulupilei kitatyi kyonso, banwe bantu.
Pungulwilai mityima yenu ku meso andi.+
Leza i kinyemeno kyetu.+ (Sela)
9 Bana ba bantu i umpuya’tu bitupu,Bana ba bantu i ba bubelabubela.+
Shi batūlwe pamo mu kipimo kya bulēmi, bapēlanga kutabuka ne umpuya mwine.+
10 Kemwakakulupilai mu manyengenyengeKadi kemwakakulupilai bya bubela mu kunyoñomona bintu.
Shi bupeta bwenu bubavula, kemwakatūlai’mo mityima yenu.+
11 Leza wesambe dimo, ami naivwana misunsa ibidi amba:
Bukomo i bwa Leza.+
12 Kadi buswe bwa ndamatyidile i bobe, abe Yehova,+Mwanda ulubwilanga muntu ne muntu mwendele bilongwa byandi.+
Kunshi kwa Dyani
^ Tala Nshintulwilo ya Bishima.
^ Nansha’mba “muya wami utengele.”
^ Nansha’mba “mutenta wa mutyima-ntenke.”
^ Bibwanika padi i, “Banwe bonso, ulanga’mba aye wadi pamo bwa lubumbu lusendalale, lubumbu lwa mabwe lukimba kupona.”
^ Nansha’mba “bulēme bwandi.”
^ Nansha’mba “tengela talala nyā, a muya wami.”
