Yoshua 23:1-16
23 Mafuku mavule kupwa kwa Yehova kupa Isalela kukōkolokwa+ ku balwana nandi bonso badi bamujokolokele, padi Yoshua ke mununu wa myaka mingi,+
2 Yoshua waityija Isalela yense,+ bakulumpe bandi, mitwe yandi, batyibi bandi, ne bemaniji bandi,+ webanena’mba: “Nanunupa; kendi na myaka mingi.
3 Mwemwenine banwe bene byonso byalongele Yehova Leza wenu ku ino mizo yonso pangala penu mwanda Yehova Leza wenu ye wadi wimulwila.+
4 Talai, nemwabile na bubale*+ ntanda ya mizo ikishele’ko ke bupyani bwa bisaka byenu,+ pamo ne yoya ya mizo yonso yonaonakenye,+ tamba ku Yodano kufika ne ku Dijiba Dikatampe* kushika.*
5 Kadi Yehova Leza wenu ye aye wadi wibapityija lubilo ku meso enu,+ ne kwimupangila’bo,* nenu mwayata ntanda yabo ke yenu, monka mwalaile’kyo Yehova Leza wenu.+
6 “Shi ke pano mufwaninwe kukankamana bininge mulame ne kulonda byonso bilembelwe mu mukanda wa Bijila+ wa Mosesa na kuleka kwiusāsuka nansha dimo kemwenda ku lundyo nansha ku lunkuso,+
7 na kuleka kwityanga nansha dimo na ino mizo+ yomushele nayo. Kemufwaninwepo nansha kutela majina a baleza+ babo nansha kutyipa mu dijina dyabo kwine, kadi kemufwaninwepo nansha dimo kwibengidila nansha kwivukwila kobadi.+
8 Ino mufwaninwe kulamata Yehova Leza wenu,+ monka momulongela kufika ne dyalelo.
9 Yehova ukapanga mizo mikatampe kadi mikomokomo ku meso enu,+ mwanda i kutupu muntu nansha umo ubwenye kwimana ku meso enu kufika ne dyalelo.+
10 Muntu’tu umo mu bukata mwenu ukapanga bantu kanunu,+ mwanda Yehova Leza wenu ye wimulwila,+ monka mwawemulaile’kyo.+
11 Nanshi mwilamei kyaba kyonso*+ na kusanswa Yehova Leza wenu.+
12 “Ino shi mumuvundamine kadi mulamate ku bintu bishele bya ino mizo yomushele nayo+ ne shi musambe nabo kipwano kya kwisonga*+ ne kupwana nabo, abo nabo bapwane nenu,
13 nabya yukai’tu amba Yehova Leza wenu kakendelelapo kwimupangila* ino mizo.+ Ino ikekala ke kidiba ne dikinga ne nsonde mu mbavu yenu+ ne miba mu meso enu kufika’nka ne byomukuba mu ino ntanda miyampe yemupele Yehova Leza wenu.
14 “Shi ke pano talai! Kensa kufwa,* kadi muyukile biyampe na mutyima wenu onso ne na muya* wenu onso amba kekudipo kinenwa nansha kimo kya mu milao yonso miyampe yemulaile Yehova Leza wenu kyakankelwe kufikidila. Byonso byafikidile pa mwanda wenu. Kekwakankelwepo kinenwa nansha kimo mu abyo.+
15 Ino monka mwafikidile pomudi milao yonso miyampe yemulaile Yehova Leza wenu,+ mo monka mukaletela Yehova pomudi byamalwa byonso byawemulaile* kadi ukemutukija fututu mu ino ntanda miyampe yemupele Yehova Leza wenu.+
16 Shi mujilule kipwano kya Yehova Leza wenu kyaemusoñenye kulama kadi shi mwende kukengidila baleza bakwabo ne kwivukwila kobadi, nankyo bulobo bwa Yehova bukemwakila,+ nenu mukakuba bukidibukidi mu ntanda miyampe yaemupele.”+
Kunshi kwa Dyani
^ Nansha’mba “nemupele.”
^ Ko kunena’mba, Meditelanea.
^ Nansha’mba “dya kupona dyuba.”
^ Nansha’mba “kwimutalwila’bo.”
^ Nansha’mba “Nanshi tadijai senene myuya yenu.”
^ Nansha’mba “kwisongejana.”
^ Nansha’mba “kwimutalwila.”
^ Kishima pa kishima i, “Ñendanga dyalelo mu dishinda dya ntanda yonso.”
^ Tala Nshintulwilo ya Bishima.
^ Nansha’mba “binenwa byonso bibi.”
