Job 36:1-33
-
Elihu ta tange oinyengandunge inene yaKalunga (1-33)
36 Elihu okwa twikila ta ti:
2 “Lididimikile nge oule wokafimbo, ofimbo handi yelifa,Osheshi natango ondi na eendjovo, odo ndi na okupopya ponhele yaKalunga.
3 Ohandi ka popya filufilu kombinga yaasho ndi shii,Ohandi ka ulika kutya Omushiti wange omuyuki.+
4 Oshoshili eendjovo dange kadi fi doipupulu;Oo e na eshiivo la wanenena+ oku li apa koshipala shoye.
5 Oshoshili, Kalunga omunaenghono+ noiha efa nande oumwe;Oku na eshiivo* lihapu neenghono.
6 Ita ka xupifa eemwenyo dovakolokoshi,+Ashike ota ka ungaunga pauyuki novafininikwa.+
7 Omesho aye ohaa kala alushe a tala kovayuki;+Ohe va nangeke po pamwe neehamba,*+ nohava tumbalekwa fiyo alushe.
8 Ashike ngeenge ova mangwa nomalyengeNokukwatwa neengodi dovafininikwa,
9 Ohe va hololele osho va ninga,Omatauluko avo oo a etifwa kounhwa wavo.
10 Oha fitulula omatwi avo va pwilikine kepukululo,Noku va lombwela va efe po okulonga owii.+
11 Ngeenge ova dulika noku mu longela,Otava ka kala va hepuluka omafiku avo aeshe okukalamwenyo,Nomido davo otadi ka kala dihafifa.+
12 Ashike ngeenge itava dulika, otava ka fya keongamukonda,*+Notava ka fya vehe na ounongo.
13 Ovo vehe na Kalunga* komutima ohava kwata onghone.
Ihava pula ekwafo nokuli nongeenge e va manga.
14 Ohava fi,* ofimbo ovanyasha natango,+Ohava kala* mokati komashenge* omotembeli onghalamwenyo yavo.+
15 Ashike Kalunga* oha xupifa ovafininikwa pefimbo lokufininikwa kwavo;Oha fitulula omatwi avo, ngeenge tava fininikwa
16 Ote ku ehenifa kokule nomunghulo woudjuu,+Konhele ya andjuka ihe na omangabeko,+Noikulya iwa poshitaafula shoye i li ngaashi ehekeleko.+
17 Opo nee oto ka kala wa wanenwa ketokolo, olo tali ka ningilwa ovakolokoshi,+Eshi etokolo tali ka yandjwa, nouyuki tau ka kalekwa po.
18 Ashike lungama ehandu lihe ku longife owii,*+Noino efa ombubo ihapu i ku twalaatwale.
19 Mbela okukonga ekwafo,Ile okuninga eenghendabala da mana mo otaku ku amene koudjuu?+
20 Ino kala wa halelela oufiku u fike,Eshi ovanhu va hanauka po peenhele davo.
21 Lungama uha longe owii,To hoolola okuninga ngaho ponhele yomafininiko.+
22 Tala! Kalunga okwa tumbalekwa omolweenghono daye;Omuhongi elipi e li ngaashi ye?
23 Olyelye a wilika* ondjila yaye,+Ile a ti kuye, ‘Osho wa ninga osha puka’?+
24 Dimbuluka okutanga oilonga yaye,+Oyo ovanhu va kala tava imbi.+
25 Ovanhu aveshe ove i mona,Omunhu oo ehe kwete okufya ohe i tale okudja kokule.
26 Oshoshili, Kalunga omunene shi dulife pwaasho hatu dulu okushiiva;+Eedula daye itadi dulu okuvalulwa.*+
27 Oha ongele omata omeva;+Ohaa lundulukile modula okudja moshimuke;
28 Opo nee oilemo ohai a tileshi;+Omata odula ohaa loko ovanhu.
29 Mbela ope na ngoo oo ta dulu okuuda ko nghee oilemo hai kala ye lihana,*Omungungumo oo hau di metwali laye?+
30 Tala nghee ha andjakaneke okashelu* kaye+ kombada yayo,Noha uvike oule* wefuta.
31 Kungaho, oha palula* ovanhu;Ohe va pe oikulya ihapu.+
32 Oha uvike okashelu neke laye,Ohe ka yukifa koshishonekwa shako.+
33 Omungungumo waye otau holola kutya okwa tya ngahelipi,Nokuli noimuna otai holola oo* te uya.
Omashangelo opedu
^ Eln., “omutima.”
^ Ile tashi dulika, “Oha nangeke po eehamba.”
^ Ile “koshilwifo.”
^ Ile “Ovashunimonima.”
^ Ile “Eemwenyo davo ohadi fi.”
^ Ile tashi dulika, “xulile.”
^ Ile “kovalumenhu, ovo hava endwa konima.”
^ Eln., “Ye.”
^ Eln., “okupandula omake, shi li edidiliko lodino nolokusheka.”
^ Ile tashi dulika, “a yemba; e mu hokololifa.”
^ Ile “odinyenga.”
^ Ile “ya tandavela.”
^ Eln., “ouyelele.”
^ Eln., “omidi.”
^ Ile tashi dulika, “popile.”
^ Ile tashi dulika, “osho.”
