Job 30:1-31
30 “Paife otava yolo nge;+Ovalumenhu ovanyasha kwaame,Ovo ooxe nda anyaVa ehene peembwa, odo tadi pashukile oufita wange.
2 Eenghono domake avo oda li di na oshilonga shashike kwaame?
Eenghono davo oda xula po.
3 Ova lololwa kwaasho va hala nokondjala;Ohava kokota osho tava hange pedu likukutu,Olo la nyonaunwa nale, noli li ombuwa yongaho.
4 Ohava kongo omafo malula koixwa;Oikulya yavo omidi doixwa.
5 Ova tewatewa po pomudingonoko;+Ovanhu otave va ingida ngaashi tava ingida ombudi.
6 Ohava di momakololo omafilu,Momambulukwena e li medu nomomamanya.
7 Ohava ingida mokule ve li moixwaNohava ongala pamwe ve li mokati komakiya.
8 Ngaashi ovana vomalai novovanhu vongaho,Ova tewatewa* mo moshilongo.
9 Ashike paife otava sheke nge, nokuli nomomaimbilo avo;+Onda ninga omuyolwa* kuvo.+
10 Ova tonda nge, nohava kala nge kokule;+Ihava ongaonga okufiila nge omate moshipala.+
11 Molwaashi Kalunga okwa kufa nge eenghono,* nokwa ninipika nge,Ova ekelashi omalyenge aeshe* moipafi yange.
12 Ohava fikama ngaashi ongudu yovanyeki kolulyo lange;Ova taataa nge,Nova tula omandangalati mondjila yange va hanaune nge po.
13 Ova hanauna po eendjila dange,Nova naipika oupyakadi wange,+Nopehe na oo te va kelele.*
14 Ohave uya va fa tava pitile mombululu ya kula i li mekuma;Ohave uya tava endelele va etele nge omaupyakadi.
15 Oumbada owa wilila nge po;Efimano lange ola halakanifwa po ngaashi omhepo,Nexupifo lange otali kana po ngaashi oshilemo.
16 Paife onghalamwenyo* yange oi li pokuxula po;+Omafiku okumona oixuna+ okwa hanga nge.
17 Ouyehame otau tyuula omakipa ange* oufiku;+Oululume ihau polo.+
18 Omolweenghono dinene, oshikutu shange osha lunduluka;*Osha ponda nge, ngaashi ofingo yoshikutu shange.
19 Kalunga okwa ekela nge monhata;Onda ninga ngaashi ondwi nosho yo omute.
20 Ohandi pula ekwafo kwoove, ashike iho nyamukula nge;+Onda fikama, ndele owa tala nge ashike.
21 Owa pilukila nge po nonyanya;+Owa hepeka nge neenghono dinene deke loye.
22 Owa tumba nge po, ndele to humbata nge momhepo;Opo nee owa telaanifa nge moshikungulu.*
23 Osheshi ondi shi shii kutya oto twala nge mefyo,Keumbo oko aveshe ovo ve na omwenyo tava ka shakena.
24 Ashike kape na oo ta ka dula okudenga omunhu, oo e na omaupyakadi,*+Eshi ta pula ekwafo pefimbo loudjuu waye.
25 Mbela inandi lila omolwaavo ve li momafimbo madjuu?*
Mbela kanda li handi* nyikile oluhodi eehepele?+
26 Nonande onda li nda teelela osho shiwa, osho shii osho she uya;Onda li nda teelela ouyelele, ndele omulaulu ashike we uya.
27 Omutima wange owa nyika oluhodi;Omafiku oudjuu okwa hanga nge.
28 Ohandi ende momilaulu fokofoko;+ kape na ouyelele wetango.
Ohandi fikama nokupula ekwafo mongudu yovanhu.
29 Onda ninga omumwaina wookavandje,Nakaume kovanakadona vomho.+
30 Oshipa shange osha laula, notashi yuunuka;+Omakipa ange otaa pi koupyu.*
31 Okaxumbafeta kange ohaka longifwa ashike mokulila eenghali,Nonyalilo yange ewi lokulila.
Omashangelo opedu
^ Eln., “umbwa.”
^ Eln., “oshitevo; oshilukadina.”
^ Eln., “okwa yululula ofipa youta wange.”
^ Ile “Ova ekelashi oshitomo.”
^ Ile tashi dulika, “Nopehe na oo te va kwafele.”
^ Ile “omwenyo.”
^ Eln., “Omakipa ange ohaa tyuulwa.”
^ Ile tashi dulika, “Oudjuu womahepeko ange owa lundulula nge.”
^ Ile tashi dulika, “owa hengumuna nge nehanauno.”
^ Eln., “onduba yoikulukuma.”
^ Ile “ovo efiku lavo lidjuu?”
^ Ile “Mbela omwenyo wange inau.”
^ Ile tashi dulika, “koshidu.”
