Exodus 8:1-32
8 Jehova okwa tya kuMoses: “Inda kuFarao, ndele to mu lombwele kutya, ‘Jehova okwa ti: “Lekela oshiwana shange, opo shi ka longele nge.+
2 Ngeenge natango oto anye oku shi lekela, ohandi ka handukila oshilongo shoye ashishe moku shi tumina omafuma.+
3 Omulonga waNil otau ka yada omafuma, notaa ka ya meumbo loye, monduda yoye yokunangala, kombete yoye, momaumbo ovapiya voye, kovanhu voye, momafiya oye nomomatemba* oye okulungila olumbololo.+
4 Omafuma otae ke uya kwoove, kovanhu voye nokovapiya voye aveshe.”’”
5 Lwanima, Jehova okwa lombwela Moses a ti: “Lombwela Aron to ti, ‘Yelula odibo yoye meke loye u denge kombada yomilonga, kombada yaapo hapa kunguluka omeva taa di muNil nokombada yomadiva, opo omafuma e uye medu alishe laEgipiti.’”
6 Onghee Aron okwa denga neke laye kombada yomeva omuEgipiti, nomafuma okwa hovela okuuya, ndele tae lihanene medu alishe laEgipiti.
7 Ashike ovapristeri veemhule navo ova li va ninga oshinima sha faafana tava longifa oupule wavo, ndele tava etifa omafuma medu alishe laEgipiti.+
8 Opo nee Farao okwa ifana Moses naAron, ndele ta ti: “Indileni Jehova a kufe po omafuma pwaame nopovanhu vange,+ molwaashi onda hala okulekela ovanhu va ka yambele Jehova.”
9 Moses okwa tya kuFarao: “Oove mwene u na okutokola kutya onaini ndi na okwiindila, opo omafuma a kufwe po pwoove, povapiya voye, povanhu voye nomomaumbo eni. Otaa ka fyaala ashike mOmulonga waNil.”
10 Farao okwa tya: “Omongula.” Onghee Moses okwa ti: “Ohandi ningi ngaashi wa popya, opo u shiive kutya kaku na vali umwe a fa Jehova, Kalunga ketu.+
11 Omafuma otaa ka dja po pwoove, momaumbo eni, povapiya voye nopovanhu voye. Otaa ka fyaala ashike momulonga waNil.”+
12 Moses naAron ova dja po puFarao, na Moses okwa indila Jehova shi na sha nomafuma oo a etela Farao.+
13 Opo nee Jehova okwa ninga ngaashi Moses e mu pula, nomafuma okwa li a hovela okufila momaumbo, momaluumbo nomomudingonoko.
14 Ovanhu ova li ve a ongela meenduba dihapu unene, noshilongo osha li sha hovela okunyika.
15 Eshi Farao a mona kutya ova li va pepelelwa, okwa kukutika omutima waye+ nokwa anya okupwilikina kuvo, ngaashi ashike Jehova a li a popya.
16 Jehova okwa lombwela Moses a ti: “Lombwela Aron to ti, ‘Yelula odibo yoye, ndele to denge ondwi yedu, notai ka shituka eemwe* medu alishe laEgipiti.’”
17 Onghee ova ninga ngaha: Aron okwa yelula odibo oyo ya li meke laye, ndele ta denge ondwi yedu, nomwa dja eemwe, ndele tadi i kovanhu nokoinamwenyo. Ondwi yedu aishe oya li ya ninga eemwe medu alishe laEgipiti.+
18 Ovapristeri veemhule ova li va kendabala okuninga sha faafana mokweetifa po eemwe noupule wavo,+ ndele kava li va dula oku shi ninga. Eemwe odo oda li da ya kovanhu nokoinamwenyo.
19 Onghee ovapristeri veemhule ova tya kuFarao: “Eshi osha ningwa komunwe* waKalunga.”+ Ashike Farao okwa twikila okukukutika omutima waye, noina pwilikina kuvo, ngaashi ashike Jehova a li a popya.
20 Jehova okwa lombwela Moses a ti: “Pita ongula inene, ndele to ka teelela Farao u li ofika. Tala! Ote uya komulonga waNil. Ou na oku mu lombwela kutya, ‘Jehova okwa ti: “Lekela oshiwana shange shi ka longele nge.
21 Ashike ngeenge ito lekele ovanhu vange, ohandi ke ku tumina omawashe,* ove, ovapiya voye, ovanhu voye nomomaumbo eni. Momaumbo Ovaegipiti otamu ka kala mu yadi omawashe notaa ka kala a uvika edu alishe opo ve* li.
22 Mefiku olo, ame ohandi ka tongola ko Gosen, omo mu na ovanhu vange. MuGosen itamu ka kala nande omawashe,+ nokungaho, oto ka shiiva kutya ame, Jehova, omo ndi li moshilongo.+
23 Ohandi ka tongola pokati koshiwana shange noshiwana shoye. Edidiliko eli otali ka ningwa mongula.”’”
24 Jehova osho naanaa a ninga, noihomo yomawashe oya li ya hovela okuya meumbo laFarao, momaumbo ovapiya vaye nomedu alishe laEgipiti.+ Oshilongo osha li sha hepekwa neenghono komawashe.+
25 Xuuninwa, Farao okwa ifana Moses naAron, ndele ta ti: “Indeni mu ka yambele Kalunga keni muEgipiti.”
26 Ashike Moses okwa ti: “Inashi yuka okuninga ngaho, molwaashi osho hatu ka yambela Jehova, Kalunga ketu, otashi ka kala shitondifa kOvaegipiti.+ Ngeenge otwa yandje omayambo oo matondifa kOvaegipiti moipafi yavo, mbela itave ke tu denga nomamanya?
27 Ohatu i molweendo lomafiku atatu mombuwa, omo tu ka yambele Jehova, Kalunga ketu, ngaashi ashike e tu lombwela.”+
28 Farao okwa tya: “Ohandi mu lekele mu ka yambele Jehova, Kalunga keni, mombuwa. Ashike kamu na okuya kokule. Ka ilikanenei nge.”+
29 Moses okwa ti: “Paife ohandi di po pwoove, nohandi ka indila Jehova a kufe po omawashe mongula puFarao, povapiya vaye nopovanhu vaye. Ashike Farao oku na okweefa po oku tu kengelela* mokwaanya okulekela oshiwana shi ka yambele Jehova.”+
30 Moses okwa dja po puFarao, ndele ta ka indila Jehova.+
31 Jehova okwa ninga ngaashi Moses a indila, nomawashe okwa dja po puFarao, povapiya vaye nopovanhu vaye. Inapa fyaala nande olimwe.
32 Ashike natango Farao okwa li a kukutika omutima waye, noka li a lekela ovanhu.
