Exodus 35:1-35
35 Lwanima, Moses okwa ongaleka ongudu aishe yOvaisrael, ndele ta ti kuyo: “Oinima ei oyo Jehova a popya i ningwe:+
2 Oilonga oi na okulongwa moule womafiku ahamano, ashike efiku etiheyali otali kala oshinima shiyapuki kunye, eshabata lokufuda po filufilu kuJehova.+ Keshe oo ta longo sha mefiku olo oku na okudipawa.+
3 Mefiku lEshabata kamu na okutema omundilo nande omuimwe yomeenhele deni.”
4 Opo nee Moses okwa lombwela ongudu aishe yOvaisrael a ti: “Eshi osho Jehova a popya,
5 ‘Eteleni Jehova omayambidido.+ Keshe umwe na etele Jehova omayambidido tashi di komutima:+ oshingoli, oshisilveri, ongopolo,
6 ongodi imbulau, olududi leedi lipeepela, oshiyata shitilyana, oliina iwa, olududi loikombo,+
7 oipa yeedi deendume ya fumikwa moluvala litilyana, oipa yeembwa domomeva, oiti yomwoonde,
8 omahooli omeelamba, omaadi o-balsam okuvaeka nosho yo oitwimifo yedimba liwa,+
9 oumanya voniks nosho yo oumanya vamwe vokutulwa kokatetahema+ nokokapapa koponhulo.+
10 “‘Aveshe ovo ve na ounghulungu*+ mokati keni nave uye, ndele tava ningi keshe osho Jehova a popya,
11 ngaashi etwalihangano nelapi lalo nosho yo ofaila yalo yoku li uvika, ouhakifo valo neelama dalo, eenghambo dalo, eengudi dalo, noikwatelwamhadi yalo;
12 Oshikefa+ neepala dasho,+ oshituviko+ netukulifolapi+ loshiidilifoyata;
13 oshitaafula+ neepala dasho, noilongifo yasho aishe nosho yo omingome dokutalika;+
14 oshikwatelwalamba+ shokuminikila nosho yo oilongifo yasho, eelamba dasho nomahooli okuminikila,+
15 oaltari yomatwimino+ neepala dayo, omaadi okuvaeka noitwimifo yedimba liwa;+ oshiidilifoyata* shoposhivelo shetwalihangano;
16 oaltari yomaxwikiloyambo+ nodalate yayo yokuyofela yongopolo, eepala dayo nosho yo oilongifo yayo aishe, oshiyaxa noshitenda shasho oko hashi tenhekwa;+
17 omalapi oo a endjelela momunghulo womukala,+ eengudi dao noikwatelwamhadi yao; oshiidilifoyata* shoposhivelo shomukala;
18 outenda vokukwata etwalihangano noutenda vokukwata omukala neengodi dayo;+
19 oikutu ya hondjwa nawa+ yokuyakula monhele iyapuki, oikutu iyapuki yomupristeri Aron,+ noikutu yovanamati vaye, opo va longe ve li ovapristeri.’”
20 Onghee ongudu aishe yOvaisrael oya dja po puMoses.
21 Opo nee keshe umwe oo e linyengifwa komutima waye+ nakeshe oo e linyengifwa komhepo okwe uya, ndele tava yandje omayambidido kuJehova, opo a longifwe metwali lokwoongalela, moilonga yamo aishe nomokuninga oikutu iyapuki.
22 Ova kala nokuuya, ovalumenhu pamwe novakainhu, keshe umwe oo e na omutima u na ehalo, okwa eta oinima yokufeweka, outenda vokomatwi, eelinga noikwaivela imwe nosho yo oinima aishe ya longwa moshingoli. Aveshe ova yandja omayambo* avo oshingoli kuJehova.+
23 Aveshe ovo va li ve na ongodi imbulau, olududi leedi lipeepela, oshiyata shitilyana, oliina iwa, olududi loikombo, oipa yeedi deendume ya fumikwa moluvala litilyana nosho yo oipa yeembwa domomeva, ove i eta.
24 Aveshe ovo va li tava yandje omayambidido oisilveri nosho yo ongopolo ova eta omayambidido kuJehova nosho yo aveshe ovo va li ve na oiti yomwoonde yokulongifa moilonga aishe ove i eta.
25 Ovakainhu aveshe ovo ve na ounghulungu+ ova hodila nomake avo, ndele tava eta osho va hodila: eengodi dimbulau, olududi leedi lipeepela, oshiyata shitilyana noliina iwa.
26 Ovakainhu aveshe ve na ounghulungu nove linyengifwa komitima davo ova hodila olududi loikombo.
27 Omalenga okwa eta oumanya voniks nosho yo oumanya vamwe vokutulwa kokatetahema nokokapapa koponhulo,+
28 o-balsam nomahooli okutemifa nomaadi okuvaeka+ nosho yo oitwimifo yedimba liwa.+
29 Ovalumenhu aveshe novakainhu ovo ve linyengifwa komitima davo ova eta sha omolwoilonga oyo Jehova a popya okupitila muMoses kutya nai longwe. Ovaisrael ova etela Jehova omayambo ehalo liwa.+
30 Opo nee Moses okwa tya kOvaisrael: “Taleni, Jehova okwa hoolola Besaleel, omonamati waUri, omonamati waHur, womepata laJuda.+
31 Okwe mu yadifa nomhepo yaKalunga, e mu pa ounongo, eendunge neshiivo lokulonga oilonga keshe yokomake
32 lokuduta oinima nounghulungu, lokulonga noshingoli, oshisilveri nongopolo,
33 lokuteta nokufeweka nomamanya nolokulonga oshinima keshe nounghulungu hashi longwa moiti.
34 Okwa tula momutima waye ounghulungu wokuhonga, ye naOholiab,+ omonamati waAhisama, womepata laDan.
35 Okwe va pa ounghulungu*+ va longe oilonga aishe yokomake, okuhondja nokutunga oiyata tava longifa eengodi dimbulau, olududi leedi lipeepela, oshiyata shitilyana, oliina iwa nokunduluka oiyata. Ovalumenhu ovo otava ka longa oilonga yoludi keshe nokulongekida omidutilo da yoolokafana.
