Exodus 17:1-16
17 Eongalo alishe lOvaisrael ola dja mo mombuwa yaSin,+ la enda tali tula peenhele di lili noku lili she likolelela kelombwelo laJehova,+ nola onga onhanda muRefidim.+ Ashike ovanhu kava li ve na omeva okunwa.
2 Opo nee ovanhu ova hovela okutangunina Moses+ tava ti: “Tu pa omeva okunwa.” Ashike Moses okwa tya kuvo: “Omolwashike tamu tangunine nge? Omolwashike mu na okukala tamu yeleke Jehova?”+
3 Ashike ovanhu ova li va fya enota lomeva neenghono, nova kala tava ngongotele Moses+ tava ti: “Omolwashike we tu kufa mo muEgipiti u uye u tu dipaife kenota, fye novana vetu noimuna yetu?”
4 Xuuninwa, Moses okwa ingida Jehova ta ti: “Ovanhu ava nandi va ninge ngahelipi? Mafiku otava ka dipaa nge nomamanya.”
5 Jehova okwa tya kuMoses: “Kwatela ovanhu komesho, ndele to i novakulunhu vaIsrael nosho yo odibo yoye oyo wa li wa dengifa mOmulonga waNil.+ I kwata meke loye, ndele to i.
6 Tala! Ame ohandi ka kala ofika nde ku teelela kemanya olo li li muHoreb. Ou na okudenga emanya, nomemanya otamu ka dja omeva, ndele ovanhu tave a nu.”+ Moses osho a ninga moipafi yovakulunhu vaIsrael.
7 Onghee okwa luka onhele oyo Massa*+ nosho yo Meriba*+ omolwokungongota kwOvaisrael naashi va yeleka Jehova+ va ti: “Hano Jehova oku li ngoo shili mokati ketu, ile ke mo?”
8 Okudja opo Ovaamalek+ ove uya, ndele tava lwifa Ovaisrael muRefidim.+
9 Moses okwa tya kuJosua:+ “Tu hoololela ovalumenhu, ndele tamu i mu ka lwife Ovaamalek. Mongula ohandi ka kala ofika koxulo yomhunda ndi kwete odibo yaKalunga kashili meke lange.”
10 Josua okwa ninga naanaa ngaashi Moses e mu lombwela,+ nokwa lwifa Ovaamalek. Opo nee Moses, Aron naHur+ ova ya koxulo yomhunda.
11 Ngeenge Moses okwa kala a yelula omake aye mombada, Ovaisrael ohava findana, ashike ngeenge okwa kala ina yelula omake aye, Ovaamalek ohava findana.
12 Eshi omake aMoses a loloka, ova kufa emanya, ndele tave li tula puye, nokwa kala ko omutumba. Opo nee Aron naHur ova yambidida omake aye, keshe umwe e li kombinga yaye, opo omake aye a kale a yeluka, fiyo etango otali ningine.
13 Kungaho, Josua okwa finda Amalek novanhu vaye neongamukonda.+
14 Jehova okwa tya kuMoses: “Shanga oshinima eshi membo shi li edimbulukifo, ove u lombwele yo Josua to ti, ‘Ohandi ka dima po filufilu Ovaamalek koshi yeulu.’”*+
15 Opo nee Moses okwa tunga oaltari, ndele te i luku Jehova-nissi,*
16 a ti: “Molwaashi eke laAmalek oli li omhinge nolukalwapangelo laJah,+ Jehova ote ke mu lwifa okudja kepupi fiyo okepupi.”+
