Exodus 6:1-30
6 Jehova okwa tya kuMoses: “Paife oto ka mona osho handi ka ningila Farao.+ Ota ka fininikwa keke li na eenghono e va lekele mo, nota ka fininikwa keke li na eenghono e va taatae mo moshilongo shaye.”+
2 Opo nee Kalunga okwa lombwela Moses a ti: “Aame Jehova.
3 Onda kala handi lihololele Abraham, Isak naJakob ndi li Kalunga Omunaenghono adishe,+ ashike shi na sha nedina lange Jehova,+ inandi li va shiivifila pauyadi.+
4 Onda ninga yo ehangano navo ndi va pe edu laKaanan, medu omo va li ovanailongo.+
5 Paife onda uda ame mwene okukema kwoshiwana shaIsrael, osho shi li moupika wOvaegipiti, nonda dimbuluka ehangano lange.+
6 “Onghee hano lombwela Ovaisrael kutya: ‘Aame Jehova, nohandi ke mu kufa mo moudjuu wOvaegipiti noku mu xupifa mo moupika wavo,+ nohandi ke mu amena nokwooko kwange kwa yeluka* nosho yo nomahandukilo madjuu.+
7 Ohandi ke mu tambula ko mu li ovanhu vange, nohandi ka kala Kalunga keni,+ notamu ka shiiva filufilu kutya aame Jehova, Kalunga keni, oo te mu xupifa moudjuu wOvaegipiti.
8 Ohandi ke mu twala medu olo nda udanekela nonda ana* oku li pa Abraham, Isak naJakob, nohandi ke li mu pa li li efyuululo.+ Aame Jehova.’”+
9 Lwanima, Moses okwa lombwela Ovaisrael etumwalaka olo, ashike kava li va pwilikina kuMoses, molwaashi ova li va teka omukumo nova li tava hepekwa nonyanya.+
10 Opo nee Jehova okwa popya naMoses ta ti:
11 “Inda u ka lombwele Farao, ohamba yaEgipiti, kutya na lekele Ovaisrael va dje mo moshilongo shaye.”
12 Ashike Moses okwa nyamukula Jehova a ti: “Tala! Ovaisrael inava pwilikina kwaame;+ ongahelipi Farao ta ka pwilikina kwaame, ngeenge ohandi popi noudjuu?”*+
13 Ndele Jehova okwa pa vali Moses naAron omalombwelo, oo tava ka pa Ovaisrael nosho yo Farao, ohamba yaEgipiti, opo i lekele mo Ovaisrael medu laEgipiti.
14 Aa omadina omitwe domaukwaneumbo ooxe: Ovanamati vaRuben, oshiveli shaIsrael,+ ovo Hanok, Pallu, Hesron naKarmi.+ Olo epata laRuben.
15 Ovanamati vaSimeon ovo Jemuel, Jamin, Ohad, Jakin, Sohar naShaul, omonamati womukainhu Omukaanan.+ Olo epata laSimeon.
16 Aa omadina ovanamati vaLevi,+ she likolelela komapata avo: Gerson, Kohat naMerari.+ Levi okwa kala nomwenyo oule weedula 137.
17 Ovanamati vaGerson ovo Libni naSimei, she likolelela pamaludi avo.+
18 Ovanamati vaKohat ovo Amram, Ishar, Hebron naUsiel.+ Kohat okwa kala nomwenyo oule weedula 133.
19 Ovanamati vaMerari ovo Mahli naMushi.
Oo omapata Ovalevi, she likolelela kutya okwa dja mepata lilipi.+
20 Opo nee Amram okwa kufa Johobed, omumwaina waxe, a ninge omukulukadi waye.+ Johobed okwe mu dalela Aron naMoses.+ Amram okwa kala nomwenyo oule weedula 137.
21 Ovanamati vaIshar ovo Kora,+ Nefek naSikri.
22 Ovanamati vaUsiel ovo Mishael, Elisafan+ naSitri.
23 Opo nee Aron okwa kufa Eliseba, omonakadona waAminadab, omumwaina waNashon,+ a ninge omukulukadi waye. Eliseba okwe mu dalela Nadab, Abihu, Eliaser naItamar.+
24 Ovanamati vaKora ovo Assir, Elkana naAbiasaf.+ Olo epata lOvakora.+
25 Eliaser,+ omonamati waAron, okwa kufa omonakadona waPutiel a ninge omukulukadi waye, ndele te mu dalele Pinehas.+
Ava ovo omitwe domaukweneumbo Ovalevi, she likolelela kooxe pamaludi avo.+
26 Aron naMoses ova li va lombwelwa kuJehova kutya: “Pitifei mo oshiwana shaIsrael medu laEgipiti, paengudu.”*+
27 Moses naAron ovo va li va popya naFarao, ohamba yaEgipiti, opo a lekele mo oshiwana shaIsrael muEgipiti.+
28 Mefiku olo, eshi Jehova a popya naMoses medu laEgipiti,
29 Jehova okwa lombwela Moses a ti: “Aame Jehova. Lombwela Farao, ohamba yaEgipiti, ashishe osho handi ku lombwele.”
30 Opo nee Moses okwa tya kuJehova: “Tala! Ame ohandi popi noudjuu,* ongahelipi Farao ta ka pwilikina kwaame?”+
