Exodus 40:1-38
40 Jehova okwa lombwela Moses a ti:
2 “Mefiku lotete lomwedi wotete, ou na okudika po etwalihangano, sha hala okutya, etwali lokwoongalela.+
3 Tula mo oshikefa shOipelende yOumbangi,+ ndele to tukula ko Oshikefa netukulifolapi.+
4 Ou na okutula mo oshitaafula+ nokuunganeka nawa oinima yasho, ndele to tula mo oshikwatelwalamba,+ nokutema eelamba dasho.+
5 Tula mo yo oaltari yomatwimino+ ya longwa moshingoli, ya ama kombinga oko ku na oshikefa shOipelende yOumbangi, ndele to tula oshiidilifoyata* shoposhivelo shetwalihangano ponhele yasho.+
6 “Ou na yo okutula oaltari yomaxwikiloyambo+ komesho yoshivelo shetwalihangano, sha hala okutya, etwali lokwoongalela,
7 nokutula oshiyaxa pokati ketwali lokwoongalela noaltari, ndele to tula mo omeva.+
8 Opo nee tula po omukala+ we lidingilila noshiidilifoyata*+ shoposhivelo shomukala.
9 Natango ou na okukufa omaadi okuvaeka,+ ndele to vaeke etwalihangano noinima aishe oyo i li mo,+ ndele to li yapula noilongifo yalo aishe, opo li kale oshinima shiyapuki.
10 Ou na yo okuvaeka oaltari yomaxwikiloyambo noilongifo yayo aishe, ndele to yapula oaltari, opo i kale oaltari iyapuki elela.+
11 Vaeka yo oshiyaxa noshitenda shasho oko tashi tenhekwa, ndele to i yapula.
12 “Opo nee twala Aron novanamati vaye popepi noshivelo shetwali lokwoongalela, ndele to va kosho nomeva.+
13 Ou na yo okudika Aron oikutu+ iyapuki noku mu vaeka,+ ndele to mu yapula, nota ka longela nge e li omupristeri.
14 Konima yaasho, eta ovanamati vaye popepi, ndele to va dike oikutu.+
15 Ou na oku va vaeka ngaashi wa vaeka xe,+ opo va longele nge ve li ovapristeri, nokuvaekwa kwavo otaku ke va ningifa va twikile okukala ovapristeri komapupi avo aeshe.”+
16 Moses okwa ninga ashishe osho Jehova e mu lombwela.+ Osho naanaa a ninga.
17 Mefiku lotete, lomwedi wotete, momudo omutivali, etwalihangano ola li la dikwa po.+
18 Eshi Moses a dika po etwalihangano, okwa tula ko oikwatelwamhadi yalo,+ eelama,+ eenghambo dalo+ neengudi dalo.
19 Okwa yala elapi kombada yetwalihangano,+ ndele ta tula ko ofaila yokuuvika+ etwali kombada yalo, ngaashi ashike Jehova a li a lombwela Moses.
20 Konima yaasho, okwa kufa Oipelende yOumbangi+ nokwe i tula mOshikefa+ nokwa tula eepala+ kOshikefa, ndele kOshikefa+ ta tuvike ko.+
21 Okwa twala Oshikefa metwalihangano nokwa tula etukulifolapi+ lokwiidila poshivelo ponhele yalo, ndele ta tukula ko onhele yoshikefa shOipelende yOumbangi,+ ngaashi ashike Jehova a li a lombwela Moses.
22 Natango, okwa tula oshitaafula+ metwali lokwoongalela kombinga yokolundume letwalihangano pondje yetukulifolapi,
23 nokwa longekida omingome+ poshitaafula koshipala shaJehova, ngaashi ashike Jehova a li a lombwela Moses.
24 Okwa tula oshikwatelwalamba+ metwali lokwoongalela, komesho yoshitaafula, kolukadi letwalihangano.
25 Okwa tema eelamba+ moipafi yaJehova, ngaashi ashike Jehova a li a lombwela Moses.
26 Natango, okwa tula oaltari+ yoshingoli metwali lokwoongalela komesho yetukulifolapi,
27 opo a xwikile ko+ oitwimifo yedimba liwa,+ ngaashi ashike Jehova a li a lombwela Moses.
28 Opo nee okwa tula ponhele oshiidilifoyata*+ shoposhivelo shetwalihangano.
29 Okwa tula oaltari yomaxwikiloyambo+ poshivelo shetwalihangano, sha hala okutya, shetwali lokwoongalela, opo a dule okuyandjela ko omaxwikiloyambo+ neendjayambo, ngaashi ashike Jehova a li a lombwela Moses.
30 Opo nee okwa tula oshiyaxa pokati ketwali lokwoongalela noaltari, ndele ta tula mo omeva okulikosha.+
31 Moses naAron novanamati vaye ova kosha mo eenyala neemhadi davo.
32 Efimbo keshe tava i metwali lokwoongalela, ile koaltari, ohave likosho,+ ngaashi ashike Jehova a li a lombwela Moses.
33 Xuuninwa, okwa dika omukala+ wa dingilila etwalihangano noaltari, ndele ta tula po oshiidilifoyata* shoposhivelo shomukala.+
Onghee Moses okwa li a manifa oilonga.
34 Oshilemo osha li sha hovela okuuvika etwali lokwoongalela, netwalihangano ola li la yada oshinge shaJehova.+
35 Moses ka li ta dulu okuya metwali lokwoongalela, molwaashi oshilemo osha kala she li uvika, netwalihangano ola kala li yadi oshinge shaJehova.+
36 Ngeenge oshilemo sha di po petwalihangano, Ovaisrael ova li hava dikulula po omatwali avo molweendo lavo alishe.+
37 Ashike oshilemo ngeenge inashi dja po, ihava dikulula po omatwali avo, fiyo efiku olo tashi di po.+
38 Osheshi oshilemo shaJehova osha kala kombada yetwalihangano omutenya, noufiku kombada yalo okwa kala omundilo moipafi yeumbo alishe laIsrael molweendo lavo alishe.+
