Exodus 30:1-38
30 “Ou na okuninga oaltari yokuxwikila oitwimifo;+ ou na oku i ninga moiti yomwoonde.+
2 Oi na okukala i na eehuke nhee di fike pamwe, oule womukokomoko oludimbo limwe,* ounene oludimbo limwe, noule wopombada omaludimbo avali. Omaluvinga ayo oku na okukala oshitukulwa shayo.+
3 Ou na oku i vaeka noshingoli elela: kombada yayo, oitukulwa yayo aishe nomaluvinga ayo, nou na oku i ningila* omwooyo, we i dingilila.
4 Ou na yo oku i ningila oikongo ivali yoshingoli pedu lomwooyo wayo, keembinga mbali da taalelafana, noikongo oyo otai ka kwata eepala odo tadi longifwa oku i humbata.
5 Ninga eepala moiti yomwoonde, ndele to di vaeke noshingoli.
6 Ou na oku i tula komesho yetukulifolapi, olo li li popepi noshikefa shOipelende yOumbangi,+ popepi noshituviko shoshikefa shOipelende yOumbangi, opo handi ke ku lihololela.+
7 “Aron+ ota ka xwikila ko+ oitwimifo yedimba liwa,+ te ke i twiminifa koaltari, eshi ta longekida eelamba+ ongula keshe.
8 Natango, ngeenge Aron okwa tema eelamba, eshi taku wiwile,* ota ka xwika oitwimifo. Oitwimifo yedimba liwa oi na okuyandjwa pandjikilile koshipala shaJehova fiyo okomapupi eni aeshe.
9 Ku na okutwimina ko oitwimifo inai pitikwa,+ ile exwikiloyambo, ile eendjayambo, noku na okutila ko oshikunwayambo.
10 Aron oku na okukwatakanifa omaluvinga ayo lumwe momudo.+ Ote ke i kwatakanifa nohonde imwe yetimbayambo lekwatakanifo+ lumwe momudo fiyo okomapupi eni aeshe. Oaltari oiyapuki elela kuJehova.”
11 Opo nee Jehova okwa lombwela Moses a ti:
12 “Ngeenge to ningi omavalulo naashi to valula ovanamati vaIsrael,+ keshe umwe oku na okuyandja eyambo kuJehova pefimbo lomavalulo omolwomwenyo waye. Osho oshi na okuningwa, opo vaha hangwe kehandukilo, ngeenge ve lishangifa.
13 Eshi osho shi na okuyandjwa kwaaveshe ovo ve lishangifa: etata losekeli,* she likolelela koshiyelekifo shosekeli shomonhele iyapuki.*+ Eegera* omilongo mbali odi fike posekeli imwe. Etata losekeli oli na okuyandjwa omayambidido kuJehova.+
14 Keshe oo e lishangifa e na eedula 20 okuyuka pombada, oku na okuyandja omayambidido kuJehova.+
15 Oshipuna kashi na okuyandja shihapu, nohepele kai na okuyandja shinini shihe fike petata losekeli* shi li omayambidido kuJehova, opo mu kwatakanife eemwenyo deni.
16 Ou na okukufa kOvaisrael oimaliwa yoisilveri yekwatakanifo, ndele to i yandje omolwoilonga oyo tai longwa metwali lokwoongalela, opo i kale edimbulukifo koshipala shaJehova omolwOvaisrael, opo mu kwatakanife eemwenyo deni.”
17 Jehova okwa popya vali naMoses a ti:
18 “Ninga oshiyaxa shokulikoshela shongopolo;+ noshitenda shasho, oko tashi tenhekwa, noku shi tula pokati ketwali lokwoongalela noaltari, ndele to tula mo omeva.+
19 Aron novanamati vaye omo tave ke likoshela keenyala nokeemhadi.+
20 Ngeenge tava i metwali lokwoongalela, ile koaltari va ka yakule nokuyandja kuJehova omayambo omundilo nomwifi, ove na okulikosha nomeva, opo vaha fye.
21 Ove na okukosha omake avo neemhadi davo, opo vaha fye, noi na okukala onghedimhango yaalushe kuvo, kuye nokoludalo laye, fiyo okomapupi avo aeshe.”+
22 Jehova okwa twikila okupopya naMoses ta ti:
23 “Natango, kufa oinima yomadimba mawa elela: eesekeli 500 domirha ya kukutikwa, netata lomuvalu oo, eesekeli 250 dosinamono iwa, eesekeli 250 dokalamus iwa,
24 neesekeli 500 dokassia da yelekwa noshiyelekifo she likolelela koshiyelekifo shosekeli shomonhele iyapuki,*+ pamwe no-hin* yomaadi eemono.
25 Moinima oyo ou na okuninga mo omaadi mayapuki okuvaeka; oinima oyo oi na okukala ya lumbakanifwa noukeka.*+ Oku na okukala omaadi mayapuki okuvaeka.
26 “Ou na okuvaeka etwali lokwoongalela,+ oshikefa shOipelende yOumbangi
27 nosho yo oshitaafula noilongifo yasho aishe, oshikwatelwalamba noilongifo yasho, oaltari yomatwimino,
28 oaltari yomaxwikiloyambo noilongifo yayo aishe nosho yo oshiyaxa noshitenda shasho oko tashi tenhekwa.
29 Ou na oku i yapula, opo i kale iyapuki elela.+ Keshe ou te i kumu oku na okukala a koshoka.+
30 Ou na yo okuvaeka Aron+ novanamati vaye+ noku va yapula, opo va longele nge ve li ovapristeri.+
31 “Ou na okulombwela Ovaisrael to ti, ‘Oo oku na okutwikila okukala omaadi ange mayapuki okuvaeka fiyo okomapupi eni aeshe.+
32 Kae na okuvaekwa kolutu lomunhu, nokamu na okuninga sha sha longifwa oinima oyo ya longifwa omaadi oo. Oku na okutwikila okukala mayapuki kunye.
33 Keshe oo ta ningi omaadi a fa oo noku a vaeka komunhu oo ina pitikwa* oku na okudimwa* mo moshiwana shavo.’”+
34 Jehova okwa tya vali kuMoses: “Kufa omuvalu wa faafana woinima yedimba liwa:+ omata ostakte, onika, o-galbanum yedimba liwa nosho yo eka ledimba liwa.
35 I ninga oitwimifo;+ oimbodi oyo oi na okulumbakanifwa noukeka,* ya ya omongwa,+ ya koshoka noiyapuki.
36 Ou na oku i kwanghula i ninge ombudu iwa nou na okutula imwe yomuyo komesho yOipelende yOumbangi metwali lokwoongalela, omo handi ke ku lihololela. Oi na okukala iyapuki elela kwoove.
37 Ku na okuliningila oitwimifo to longifa oinima oyo ya lumbakanifwa.+ Ou na oku i tala ko i li oshinima shiyapuki kuJehova.
38 Keshe ou ta ningi sha she a fa, opo a hafele edimba lao, oku na okudimwa* mo moshiwana shavo.”
Omashangelo opedu
^ Eesendimeta 44,5 lwaapo. Tala Oshiw. B14.
^ Ile “mela.”
^ Eln., “pokati komaufiku avali.”
^ Osekeli imwe oi fike peegrama 11,4. Tala Oshiw. B14.
^ Ile “kosekeli iyapuki.”
^ Ogera imwe oi fike peegrama 0,57. Tala Oshiw. B14.
^ Osekeli imwe oi fike peegrama 11,4. Tala Oshiw. B14.
^ Ile “kosekeli iyapuki.”
^ O-hin imwe oi fike peelita 3,67. Tala Oshiw. B14.
^ Ile “ya fa ya longekidwa konghulungu yokuninga omaadi.”
^ Eln., “omunailongo,” sha hala okutya, omunhu oo ina dja mepata laAron.
^ Ile “okudipawa.”
^ Ile “ya fa ya longekidwa konghulungu yokuninga omaadi.”
^ Ile “okudipawa.”
