Exodus 25:1-40
25 Opo nee Jehova okwa lombwela Moses a ti:
2 “Lombwela ovanhu vomuIsrael va etele nge omayambidido; ou na okutambula ko omayambidido ange kukeshe omunhu oo e a yandja tashi di komutima.+
3 Ou na okutambula ko kuvo omayambidido aa: oshingoli,+ oshisilveri,+ ongopolo,+
4 ongodi imbulau, olududi leedi lipeepela,* oshiyata shitilyana, oliina iwa, olududi loikombo,
5 oipa yeedi deendume ya fumikwa moluvala litilyana, oipa yeembwa domomeva, oiti yomwoonde,+
6 omahooli omeelamba,+ omaadi o-balsam okuvaeka+ nosho yo oitwimifo yedimba liwa,+
7 oumanya voniks nosho yo oumanya vamwe vokutulwa kokatetahema+ nokokapapa koponhulo.+
8 Ove na okuningila nge onhele iyapuki, nohandi ka kala* mokati kavo.+
9 Omu na oku i tunga, etwalihangano noitukulwa yalo aishe, tamu shikula filufilu osho* handi ku ulikile.+
10 “Ove na okuninga oshikefa moiti yomwoonde, oule washo womukokomoko omaludimbo* avali netata, ounene washo oludimbo limwe netata, noule washo wopombada oludimbo limwe netata.+
11 Ou na oku shi vaeka noshingoli elela.+ Ou na oku shi vaeka meni nokombada, naashishe ou na oku shi ningila* omwooyo woshingoli we shi dingilila.+
12 Ou na oku shi ningila oikongo ine yoshingoli noku i patela pombada yomaulu asho ane, oikongo ivali okombinga imwe, noikongo ikwao ivali okombinga ikwao.
13 Nou na okuninga eepala moiti yomwoonde noku di vaeka noshingoli.+
14 Ou na okutula eepala odo moikongo oyo i li momunghulo wOshikefa, opo u dule oku di humbatifa Oshikefa.
15 Eepala odo odi na okukala moikongo yOshikefa; kadi na okukufwa mo.+
16 MOshikefa osho oto tula mo Oipelende yOumbangi oyo handi ke ku pa.+
17 “Ou na okuninga oshituviko moshingoli elela, oule washo womukokomoko omaludimbo avali netata, nounene washo oludimbo limwe netata.+
18 Ou na okuninga ovakerubi vavali moshingoli; ou na oku va hambulila keembinga mbali doshituviko.+
19 Ou na okutula ovakerubi ovo keembinga mbali, omukerubi umwe okombinga imwe, nomukerubi mukwao okombinga ikwao yoshituviko.
20 Ovakerubi ovo ove na okuxwaananeka omavava avo avali mombada, va tuvikila oshituviko nomavava avo+ nova taalelafana. Ovakerubi ovo ove na okutaalelifa oipala yavo moshituviko.
21 Ou na okutula oshituviko+ kOshikefa, nomOshikefa ou na okutula mo Oipelende yOumbangi oyo handi ke ku pa.
22 Ohandi ke ku lihololela ofimbo u li oko, nohandi ka popya naave okudja kombada yoshituviko.+ Ohandi ka kala pokati kovakerubi vavali, ovo ve li koshikefa shOipelende yOumbangi, nohandi ke ku shiivifila ashishe osho to ka lombwela Ovaisrael.
23 “Ou na yo okuninga oshitaafula+ moiti yomwoonde, oule washo womukokomoko omaludimbo avali, nounene washo oludimbo limwe, noule washo wopombada oludimbo limwe netata.+
24 Ou na oku shi vaeka noshingoli elela noku shi ningila* omwooyo woshingoli we shi dingilila.
25 Ou na oku shi ningila omungenge we shi dingilila wounene u fike pomutamo weke* noku shi tula* omwooyo woshingoli wa dingilila omungenge.
26 Ou na oku shi ningila oikongo ine yoshingoli noku i tula meehuke nhee omo mwa patelwa omaulu ane.
27 Oikongo oyo oi na okukala popepi nomungenge i li oikwatifo yeepala dokuhumbatifa oshitaafula.
28 Ou na okuninga eepala moiti yomwoonde noku di vaeka noshingoli, ndele to di humbatifa oshitaafula.
29 “Ou na yo okuninga oiyaxa yasho, oukopi vasho nomakopi asho nosho yo ouyaxa vasho omo tava kala tava tile oikunwayambo. Ou na oku i ninga moshingoli elela.+
30 Ou na yo alushe okukala ho tula omingome dokutalika poshitaafula moipafi yange.+
31 “Ou na okuninga oshikwatelwalamba+ moshingoli elela. Oshikwatelwalamba oshi na okuhambulwa. Oshitako shasho, efina lasho, oitai yasho, omakopi asho, oikwatelo yasho neenhemo dasho oi na okukala oshitukulwa shimwe.+
32 Nomoshikwatelwalamba omu na okudja oitai ihamano, oitai itatu okombinga imwe, noitai itatu okombinga ikwao.
33 Koshitai keshe shomoitai itatu oku na okukala omakopi atatu e li molupe leengala do-almond, pamwe noikwatelo nosho yo eenhemo, ya shikulafana. Koshitai keshe shomoitai ikwao itatu oku na okukala omakopi atatu e li molupe leengala do-almond, pamwe noikwatelo nosho yo eenhemo, ya shikulafana. Oitai oyo ihamano osho i na okudja mo ngaho mefina loshikwatelwalamba.
34 Mefina loshikwatelwalamba omu na okukala omakopi ane e li molupe leengala do-almond, pamwe noikwatelo yasho nosho yo eenhemo dasho, ya shikulafana.
35 Oshikwatelo nashi kale koshi yoitai ivali yotete, oyo ya dja mefina, noshikwatelo shikwao okoshi yoitai ivali ya shikula ko, noshikwatelo shikwao okoshi yoitai ivali ya shikula ko, osheshi mefina omwa dja oitai ihamano.
36 Oikwatelo noitai nosho yo oshikwatelwalamba ashishe oi na okukala oshitukulwa shimwe shoshingoli elela, sha hambulwa.+
37 Ou na oku shi ningila eelamba heyali, nongeenge eelamba odo oda temwa, otadi ka minikila oshitukulwa osho shi li komesho yasho.+
38 Oidimifo* yasho nosho yo oikwatelwa yasho yomundilo oi na okukala yoshingoli elela.+
39 Oshi na okuningwa pamwe noilongifo oyo, moshitalenti* shoshingoli elela.
40 Shilipaleka kutya owe i ninga monghedi* oyo wa li wa ulikilwa, eshi wa li komhunda.+
Omashangelo opedu
^ Ile “olududi leedi la fumikwa moluvala lipeepela.”
^ Ile “netwalihangano otali ka kala.”
^ Ile “omutungilo oo.”
^ Oludimbo limwe oli fike peesendimeta 44,5. Tala Oshiw. B14.
^ Ile “mela.”
^ Ile “mela.”
^ Eesendimeta 7,4 lwaapo. Tala Oshiw. B14.
^ Ile “mela.”
^ Ile “Oikwatifo.”
^ Oshitalenti shimwe oshi fike peekilograma 34,2. Tala Oshiw. B14.
^ Ile “momutungilo.”
