Exodus 3:1-22
3 Moses okwa li a ninga omufita woimuna yaxemweno Jetro,+ omupristeri womuMidian. Fimbo a li ta lifa oimuna a yuka kouninginino wombuwa, okwa li a ya puHoreb, pomhunda yaKalunga kashili.+
2 Opo nee omweengeli waJehova okwe mu lihololela momundilo wa tema mokati koshixwa sheno.+ Eshi a kala ta tale, okwa li a mona kutya eno ola yaka omundilo, ashike eno olo kala li tali lungwina po.
3 Onghee Moses okwa tya: “Ohandi ehene popepi noshinima osho shikumwifi ndi tale kutya omolwashike eno olo itali lungwina po.”
4 Eshi Jehova a mona kutya okwa ehena popepi a tale, okwe mu ifana okudja meno a ti: “Moses! Moses!” Moses okwa nyamukula a ti: “Aame ou!”
5 Opo nee Kalunga okwa tya: “Ino ehena popepi unene. Dula ko eenghaku keemhadi doye, molwaashi onhele apa wa fikama oiyapuki.”
6 Okwa tya vali: “Aame Kalunga kaxo, Kalunga kaAbraham,+ Kalunga kaIsak+ naKalunga kaJakob.”+ Opo nee Moses okwa uvika oshipala shaye, molwaashi okwa li a tila okutala Kalunga kashili.
7 Jehova okwa weda ko vali a ti: “Onda mona shili okuhepekwa kwoshiwana shange osho shi li muEgipiti, nonda uda ekemo lasho omolwaavo tave shi longifa kefininiko. Ondi shii nawa ouyehame oo shi li muo.+
8 Ohandi i ko ndi ke shi xupife meke lOvaegipiti+ noku shi kufa mo moshilongo osho, ndele handi shi twala kedu liwa nola andjuka, edu tali kunguluka omashini nomaadi eenyiki,+ oshitukulwa shOvakaanan, shOvaheti, shOvaamori, shOvaperesi, shOvahevi noshOvajebusi.+
9 Tala! Ekemo loshiwana shange shaIsrael ola fika kwaame, nonda mona yo nghee Ovaegipiti tave shi hepeke nonyanya.+
10 Paife ila, ohandi ku tumu kuFarao, noto ka mangulula oshiwana shange shaIsrael muEgipiti.”+
11 Ashike Moses okwa tya kuKalunga kashili: “Aame lyelye opo ndi ye kuFarao nokumangulula mo Ovaisrael muEgipiti?”
12 Opo nee Kalunga okwa tya: “Ohandi ka kala pamwe naave,+ naali olo edidiliko loye kutya aame nde ku tuma: Ngeenge owa mangulula mo ovanhu ovo muEgipiti, otamu ka longela* Kalunga kashili komhunda ei.”+
13 Ndele Moses okwa tya kuKalunga kashili: “Ngeenge onda i kOvaisrael noku va lombwela kutya ‘Kalunga kooxokulululwa okwa tuma nge kunye,’ ndele tava pula nge kutya, ‘Edina laye olyelye?’+ Ohandi ke va lombwela ngahelipi?”
14 Kalunga okwa tya kuMoses: “Ohandi ka kala osho nda hoolola* okukala.”*+ Okwa weda ko vali a ti: “Ou na okulombwela Ovaisrael kutya, ‘Ohandi ka kala oye a tuma nge kunye.’”+
15 Opo nee Kalunga okwa tya vali kuMoses:
“Eshi osho u na okulombwela Ovaisrael, ‘Jehova, Kalunga kooxokulululwa, Kalunga kaAbraham,+ Kalunga kaIsak+ naKalunga kaJakob,+ okwa tuma nge kunye.’ Olo olo edina lange fiyo alushe,+ nondi na okudimbulukiwa ngaho komapupi nomapupi.
16 Inda paife u ka ongele ovakulunhu vaIsrael, ndele to va lombwele kutya, ‘Jehova, Kalunga kooxokulululwa okwe lihololela nge, Kalunga kaAbraham, kaIsak nokaJakob, nokwa ti: “Onde mu tala shili+ nonda mona osho tamu ningilwa muEgipiti.
17 Onghee onda tya, ohandi mu kufa mo momake Ovaegipiti ovo tave mu hepeke,+ noku mu twala kedu lOvakaanan, lOvaheti, lOvaamori,+ lOvaperesi, lOvahevi nolOvajebusi,+ kedu tali kunguluka omashini nomaadi eenyiki.”’+
18 “Otava ka pwilikina shili kondaka yoye,+ noto ka ya, ove novakulunhu vaIsrael, kohamba yaEgipiti, nomu na oku i lombwela tamu ti: ‘Jehova, Kalunga kOvaheberi,+ okwa popya nafye. Alikana, tu pitika tu ye molweendo lomafiku atatu mombuwa, opo tu ka yambele Jehova, Kalunga ketu.’+
19 Ashike ondi shi shii nawa kutya ohamba yaEgipiti itai ke mu pitika mu ye, okuninga shapo ye linyengifwa keke li na eenghono.+
20 Onghee ohandi ka longifa eke lange, opo ndi handukile Egipiti noikumwifilonga yange aishe oyo handi ka longa mo. Konima yaasho, ohamba otai ke mu lekela mo.+
21 Ohandi ka ningifa Ovaegipiti va file onghenda oshiwana shange, naashi tamu ka ya, itamu ka ya eenyala dongaho.+
22 Omukainhu keshe oku na okweehela omushiinda shaye nosho yo omukainhu, oo ha di meumbo laye, oinima ya longwa moshisilveri, moshingoli nosho yo oikutu, nomu na oku i dika ovanamati novanakadona veni. Otamu ka kufa ko omaliko Ovaegipiti.”+
