Exodus 27:1-21
27 “Ou na okuninga oaltari moiti yomwoonde;+ oule wayo womukokomoko omaludimbo* atano, nounene wayo omaludimbo atano. Oaltari oi na okukala i na eehuke nhee di fike pamwe noule wayo wopombada omaludimbo atatu.+
2 Oaltari ou na oku i ningila omaluvinga+ meehuke dayo nhee; omaluvinga oo oku na okukala oshitukulwa shoaltari, nou na okuvaeka oaltari nongopolo.+
3 Ou na okuninga omavela okuyuka mo omute,* nosho yo oixupulo, ouyaxa, omafoloko noikwatelwa yomundilo. Oilongifo aishe yomoaltari ou na oku i ninga mongopolo.+
4 Oaltari ou na oku i ningila odalate yokuyofela yongopolo, nomeehuke nhee dodalate ou na okutula mo oikongo ine yongopolo.
5 Odalate oyo ou na oku i tula moaltari pedu lomungenge, noi na okukala pokati koaltari.
6 Ou na okuninga eepala doaltari moiti yomwoonde noku di vaeka nongopolo.
7 Eepala odo odi na okutulwa moikongo, opo di kale keembinga mbali doaltari eshi ya humbatwa.+
8 Oaltari ou na oku i ninga momutungilo woshipakete sha patuluka kombada nokoshitako. Ou na oku i ninga naanaa ngaashi nde ku ulikila komhunda.+
9 “Ou na yo okuninga omukala+ wetwalihangano. Kombinga yokolukadi lomukala oo, oku na okukala omalapi a longwa meengodi diwa doliina da hodilwa, a endjelela a taalela kolukadi, e na oule womukokomoko womaludimbo 100 kombinga imwe.+
10 Ou na okukala u na eengudi 20 noikwatelwamhadi 20 yongopolo. Ouhakifo veengudi noupatifo* vado ove na okukala voshisilveri.
11 Omalapi oo a endjelela kombinga yokolundume nao oku na okukala e na oule womukokomoko womaludimbo 100, pamwe neengudi 20 noikwatelwamhadi yado yongopolo 20, nouhakifo voshisilveri nosho yo oupatifo* veengudi.
12 Momunghulo womukala oo kombinga yokouninginino, omu na okukala omalapi a endjelela oshinano shomaludimbo 50, neengudi omulongo nosho yo oikwatelwamhadi omulongo.
13 Omutamo womukala kombinga yokoushilo, oko haku piti etango, ou na okukala u na omaludimbo 50.
14 Kombinga imwe oku na okukala omalapi a endjelela, oshinano shomaludimbo 15, neengudi nhatu nosho yo oikwatelwamhadi itatu.+
15 Nokombinga ikwao, oku na okukala omalapi, a endjelela oshinano shomaludimbo 15, neengudi nhatu nosho yo oikwatelwamhadi itatu.
16 “Poshivelo shomukala ope na okukala oshiidilifoyata* shoule womukokomoko womaludimbo 20 sha longwa meengodi dimbulau, molududi leedi lipeepela, moshiyata shitilyana, meengodi diwa doliina da hodilwa, ya hondjelwa kumwe,+ neengudi nhee nosho yo oikwatelwamhadi yayo ine.+
17 Eengudi adishe domukala odi na okukala di na oupatifo nosho yo ouhakifo voshisilveri, ashike oikwatelwamhadi yado oi na okukala yongopolo.+
18 Oule womukokomoko womukala oo ou na okukala u na omaludimbo 100,+ ounene omaludimbo 50, noule wopombada womalapi, oo a endjelela, a longwa meengodi diwa doliina da hodilwa, omaludimbo 5, nou na okukala u na oikwatelwamhadi yongopolo.
19 Oilongifo aishe noinima aishe oyo ya longifwa etwalihangano nosho yo outenda vokukwata etwalihangano noutenda aveshe vokukwata omukala oi na okukala yongopolo.+
20 “Ou na okulombwela Ovaisrael ve ku etele omaadi mawa eemono okutemifa, opo eelamba di kale da tema efimbo alishe.+
21 Aron novanamati vaye ove na okulongekidila eelamba metwali lokwoongalela olo li li kondje yetukulifolapi, olo li li popepi nOipelende yOumbangi,+ opo di kale da tema alushe okudja onguloshi fiyo ongula koshipala shaJehova.+ Oyo onghedimhango yaalushe komapupi avo aeshe oyo i na okushikulwa kOvaisrael.+
