Jonas 1:1-17
1 Kinuna ni Jehova ken Jonas*+ nga anak ni Amittai:
2 “Mapanka idiay Nineve+ a dakkel a siudad, ket iwaragawagmo ti pannakadadaelna ta nakitak ti kinadakesna.”
3 Ngem nagdardaras ni Jonas a napan idiay Tarsis ket dina tinungpal ni Jehova. Idi nakadanon idiay Joppe, nakakita iti barko nga agpa-Tarsis, binayadanna ti pletena, sa naglugan a kadua dagiti adda iti barko nga agpa-Tarsis tapno itarayanna ni Jehova.
4 Idi kuan, pinagangin ni Jehova iti napigsa ket timmaud ti nadawel a bagyo iti baybay nga uray la dandanin madadael ti barko.
5 Kasta unay ti buteng dagiti marinero ket agpapaarayat ti tunggal maysa iti diosna. Ket impuruakda iti baybay dagiti karga tapno lumag-an ti barko.+ Ngem immulog ni Jonas iti makimbaba a paset ti barko sa nagidda ket nakaturog iti nargaan.
6 Inasitgan ti kapitan ti barko ket kinunana: “Apay a matmaturogka? Bumangonka ken umawagka iti diosmo! Bareng kaasiannatayo ti pudno a Dios ket saantayo a matay.”+
7 Ket imbagada iti maysa ken maysa: “Umaykayo, agbibinnunottayo+ tapno maammuantayo no asino ti makimbasol iti daytoy a didigra.” Isu a nagbibinnunotda, ket ni Jonas ti nabunot.+
8 Insaludsodda: “Pangngaasim ta ibagam no asino ti makimbasol iti daytoy a didigra? Ania ti trabahom, ken naggapuam? Tagaanoka ken ania ti tribum?”
9 Insungbatna: “Maysaak a Hebreo, ken agbutengak* ken Jehova a Dios idiay langit, Daydiay nangaramid iti baybay ken daga.”
10 Ad-adda pay a nagbuteng dagitoy a lallaki ket insaludsodda: “Ania ti inaramidmo?” (Naammuanda nga itartarayanna ni Jehova gapu ta imbagana kadakuada.)
11 Dumawdawel ti baybay ken pumigpigsa ti bagyo isu a dinamagda: “Ania ti rumbeng nga aramidenmi kenka tapno agtalna ti baybay?”
12 Insungbatna: “Itapuakdak iti baybay tapno agtalna; ta ammok a siak ti makagapu a dimteng kadakayo daytoy nadawel a bagyo.”
13 Ngem inkarkarigatan dagitoy a lallaki nga isanglad ti barko ngem dida nabaelan, ta dumawdawel latta ti baybay gapu iti bagyo.
14 Ket impakpakaasida ken Jehova: “O Jehova, sapay koma ta saankami a matay gapu iti daytoy a lalaki!* Dinakami koma ibilang a mammapatay no itapuakmi iti baybay daytoy nga inosente a tao, ta pagayatam daytoy, O Jehova!”
15 Ket binagkatda ni Jonas sada intapuak iti baybay isu a timmalna ti baybay.
16 Napalalo ti buteng dagiti lallaki ken Jehova+ isu a nagidatonda ken Jehova ken nagkarida kenkuana.
17 Nangibaon ni Jehova iti dakkel nga ikan a mangalun-on ken Jonas, isu a nagyan ni Jonas iti tian ti ikan iti tallo nga aldaw ken tallo a rabii.+
