Ti Maikadua a Cronicas 4:1-22
4 Kalpasanna, nangaramid iti altar a gambang,+ a 20 a kasiko ti kaatiddogna, 20 a kasiko ti kaakabana, ken 10 a kasiko ti kangatona.
2 Nangaramid iti nagtimbukel a metal a palanggana a maawagan iti Baybay,*+ a 10 a kasiko ti diametro ti ngarabna, 5 a kasiko ti kaunegna, ket kasapulan ti pagrukod a 30 a kasiko ti kaatiddogna tapno mapalawlawan dayta.+
3 Adda dagiti sinantabungaw+ a dekorasion iti baba ti ngarabna, a naipalawlaw iti palanggana, 10 iti kada kasiko iti aglikmut ti Baybay. Dua nga intar dagiti sinantabungaw a naigiddan a naaramid idi napanday ti palanggana.
4 Naiparabaw ti Baybay iti 12 a sinanbaka,+ 3 ti nakasango iti amianan, 3 ti nakasango iti laud, 3 ti nakasango iti abagatan, ken 3 ti nakasango iti daya. Nagtitinnallikudda amin iti sirok ti Baybay.
5 Sangadakulap* ti kapuskol ti palanggana. Kasla ngarab ti kopa ti itsura ti ngarabna a kasla sabong a lirio. Makalaon dayta iti 3,000 a bat.*
6 Nangaramid met iti 10 a palanggana a pagbugguan ket inkabilna ti lima iti kannawan ken lima iti kannigid.+ Bugguanda kadagita dagiti daton a mapuoran.+ Ngem agbuggo dagiti papadi iti Baybay.+
7 Kalpasanna, nangaramid iti 10 a kandelero a balitok,+ sigun iti naited a disenio,+ ket inkabilna dagita iti templo, lima iti kannawan ken lima iti kannigid.+
8 Nangaramid pay iti 10 a lamisaan ket inkabilna dagita iti templo, lima iti kannawan ken lima iti kannigid;+ sa nangaramid iti 100 a malukong a balitok.
9 Kalpasanna, inaramidna ti paraangan+ dagiti papadi+ ken ti dakkel a paraangan*+ ken dagiti ridawna, ket kinalupkopanna iti gambang dagiti ridawda.
10 Impuestona ti Baybay iti kannawan a sikigan, iti abagatan a daya.+
11 Inaramid met ni Hiram dagiti timba, pala, ken malukong.+
Iti kasta, nalpas ni Hiram ti impatrabaho ni Ari Solomon iti balay ti pudno a Dios:+
12 ti dua nga adigi+ ken dagiti sinanmalukong a pannakaulo dagita; ti dua a nalaga a dekorasion+ ti dua a sinanmalukong a pannakaulo dagiti adigi;
13 ti 400 a sinanprutas a granada+ para iti dua a nalaga a dekorasion, dua nga intar a sinanprutas a granada para iti tunggal nalaga a dekorasion, a nangabbong iti dua a sinanmalukong a pannakaulo dagiti adigi;+
14 ti 10 a kareton* ken ti 10 a palanggana iti rabaw dagiti kareton;+
15 ti Baybay ken ti 12 a sinanbaka iti sirokna;+
16 ken dagiti napasileng a gambang a timba, pala, tinidor,+ ken amin nga alikamen nga inaramid ni Hiram-abiv+ para ken Ari Solomon para iti balay ni Jehova.
17 Sinukog dagita ti ari iti pagmoldean a napuskol a pila idiay Jordan, iti nagbaetan ti Succot+ ken Zereda.
18 Nakaad-adu unay ti inaramid ni Solomon a kastoy nga alikamen; saandan nga inammo ti timbang ti gambang.+
19 Inaramid ni Solomon ti amin nga alikamen+ para iti balay ti pudno a Dios: ti balitok nga altar;+ dagiti lamisaan+ a pakaiparabawan ti pamarang a tinapay;+
20 dagiti puro a balitok a kandelero ken dagiti lamparada,+ a masindian iti asideg ti pagserkan iti kaunegan a siled sigun iti naibilin;
21 ken dagiti nakapurpuro a balitok a sabong, lampara, ken sipit;
22 dagiti puro a balitok a pagiddep iti apuy, malukong, kopa, pagikkan iti insienso; ken kinalupkopanna iti balitok+ dagiti makin-uneg a ridaw ti Kasasantuan+ ken dagiti ridaw ti balay ti templo.
