Ti Maikadua a Cronicas 34:1-33
34 Agtawen ni Josias+ iti walo idi nagbalin nga ari, ket nagturay iti 31 a tawen idiay Jerusalem.+
2 Inaramidna ti umiso iti imatang ni Jehova ket nagna kadagiti dalan ni David nga apongna, ket saan a nagturong iti kannawan wenno kannigid.
3 Iti maika-8 a tawen ti panagturayna, bayat nga ubing pay laeng, inrugina a sapulen ti Dios ni David nga apongna.+ Iti maika-12 a tawen, rinugianna a dalusan ti Juda ken Jerusalem+ ket inikkatna dagiti nangato a disso+ ken dagiti sagrado a poste,* kinitikitan nga imahen,+ ken metal nga estatua.*
4 Dinadaelda pay iti sanguananna dagiti altar dagiti Baal, ken pinutedna dagiti altar ti insienso iti ngatuen dagita. Dinadaelna dagiti sagrado a poste,* kinitikitan nga imahen, ken metal nga estatua* ket rinumekna dagita ken inwarsina ti tapokda iti rabaw dagiti tanem dagidiay nagidatdaton idi kadagita.+
5 Pinuoranna ti tultulang dagiti papadi iti rabaw dagiti altarda.+ Iti kasta, dinalusanna ti Juda ken Jerusalem.
6 Kadagiti siudad ti Manases, Efraim,+ Simeon, agingga iti Neftali, ken iti amin a nadadael a lugar,
7 rinebbana dagiti altar, sagrado a poste,* ken kinitikitan nga imahen+ ket rinumekna dagita; pinutedna ti amin nga altar ti insienso iti intero nga Israel.+ Kalpasanna, nagsubli idiay Jerusalem.
8 Iti maika-18 a tawen ti panagturayna, idi nadalusannan ti daga ken ti templo,* imbaonna ni Safan+ nga anak ni Azalias, ni Maasias a panguluen ti siudad, ken ni Joa nga anak ni Joahaz a paralista tapno tarimaanenda ti balay ni Jehova a Diosna.+
9 Napanda ken Hilkias a nangato a padi ket intedda kenkuana ti kuarta a naipan iti balay ti Dios, a kinolekta dagiti Levita a parabantay iti ruangan manipud iti Manases, Efraim, ken iti amin a dadduma pay a paset ti Israel,+ kasta met iti Juda, Benjamin, ken kadagiti agnanaed iti Jerusalem.
10 Inyawatda dayta kadagidiay nadutokan a mangidaulo iti trabaho iti balay ni Jehova. Inusar dayta dagiti trabahador iti balay ni Jehova a mangtarimaan iti balay.
11 Inyawatda dayta kadagiti eksperto a trabahador ken agibangbangon tapno igatangda kadagiti natikap a batbato ken tarikayo a mausar kas pangpalagda ken hamba dagiti balay a binay-an a madadael dagiti ari ti Juda.+
12 Simamatalek a nagtrabaho dagiti lallaki.+ Dagiti Levita a nadutokan a mangidaulo kadakuada ket da Jahat ken Abdias manipud kadagiti Merarita,+ ken da Zacarias ken Mesulam manipud kadagiti Cohatita.+ Ti dadduma a Levita, a nalaing amin a musikero,+
13 ti nangidaulo kadagiti trabahador* ken iti amin a mangar-aramid iti nagduduma a kita ti trabaho. Dadduma a Levita ti nagserbi a sekretario, opisial, ken parabantay iti ruangan.+
14 Bayat nga al-alaenda ti kuarta a naipan iti balay ni Jehova,+ nasarakan ni Hilkias a padi ti libro ti Linteg+ ni Jehova a naited babaen ken* Moises.+
15 Gapuna, kinuna ni Hilkias ken ni Safan a sekretario: “Nasarakak ti libro ti Linteg iti balay ni Jehova.” Inted ni Hilkias ti libro ken Safan.
16 Impan ni Safan ti libro iti ari sa kinunana: “Ar-aramiden dagiti adipenmo ti amin a naipaaramid kadakuada.
17 Innalada* ti kuarta nga adda iti balay ni Jehova ket inyawatda kadagiti nadutokan a lallaki ken kadagiti trabahador.”
18 Imbaga pay ni Safan a sekretario iti ari: “Adda libro nga inted kaniak ni Hilkias a padi.”+ Iti kasta, rinugian ni Safan a basaen dayta iti sanguanan ti ari.+
19 Apaman a nangngeg ti ari ti sasao a linaon ti Linteg, pinisangna ti badona.+
20 Kastoy ti imbilin ti ari kada Hilkias, Ahikam+ nga anak ni Safan, Abdon nga anak ni Mikias, Safan a sekretario, ken Asaias a katulongan ti ari:
21 “Inkay agsaludsod ken Jehova maipaay kaniak ken kadagiti nagtalinaed iti Israel ken iti Juda maipapan iti sasao a linaon ti libro a nasarakan; ta naibukbok kadatayo ti pungtot ni Jehova, gapu ta saan a nagtulnog dagidi ammatayo iti sao ni Jehova ken saanda a tinungpal ti amin a naisurat iti daytoy a libro.”+
22 Iti kasta, ni Hilkias agraman dagiti imbaon ti ari napanda ken Hulda a propeta.+ Isu ti asawa ni Salum nga anak ni Tikva nga anak ni Harhas, ti paraaywan kadagiti bado, ken agnanaed iti Maikadua a Purok ti Jerusalem; ket nakisaritada kenkuana sadiay.+
23 Imbagana kadakuada: “Daytoy ti kinuna ni Jehova a Dios ti Israel, ‘Ibagayo iti lalaki a nangibaon kadakayo:
24 “Daytoy ti kinuna ni Jehova, ‘Iyegko ti didigra iti daytoy a lugar ken kadagiti umilina,+ ti amin a lunod a naisurat iti libro+ a binasada iti sango ti ari ti Juda.
25 Gapu ta pinanawandak+ ken nangipapaayda kadagiti daton a mangpataud iti asuk kadagiti sabali a dios tapno pagpungtotendak+ babaen ti amin nga ar-aramidenda, ibukbokkonto ti pungtotko iti daytoy a lugar ket saanto a maiddep.’”+
26 Ngem kastoy ti ibagayo iti ari ti Juda a nangibaon kadakayo nga agsaludsod ken Jehova, “Daytoy ti kinuna ni Jehova a Dios ti Israel: ‘No maipapan iti sasao a nangngegmo,+
27 gapu ta nangipangag* ti pusom ken nagpakumbabaka iti sanguanan ti Dios ta dinengngegmo ti imbagana mainaig iti daytoy a lugar ken kadagiti umilina ket nagpakumbabaka iti sanguanak ken pinisangmo ti badom ken nagsangitka iti sanguanak, impangagka met,+ kuna ni Jehova.
28 Dayta ti makagapu nga itiponkanto kadagidi ammam,* ket maitabonkanto a sitatalna iti tanemmo, ken saanmonto a makita ti amin a didigra nga iyegko iti daytoy a lugar ken kadagiti umilina.’”’”+
Indanonda ti sungbat iti ari.
29 Iti kasta, nagbaon ti ari, ket pinaayabanna ti amin a panglakayen iti Juda ken Jerusalem.+
30 Kalpasanna, napan ti ari iti balay ni Jehova, agraman ti amin a lallaki ti Juda, dagiti agnanaed iti Jerusalem, dagiti papadi, dagiti Levita—amin nga umili, dagiti natan-ok ken nanumo. Imbasana kadakuada ti amin a sasao a linaon ti libro ti tulag a nasarakan iti balay ni Jehova.+
31 Nagtakder ti ari iti ayanna ket nakitulag*+ iti sanguanan ni Jehova, nga agtulnog ken Jehova ken tungpalenna dagiti bilin, pammalagip, ken regulasionna iti amin a puso ken amin a kararuana*+ babaen ti panangsurotna iti sasao a linaon ti tulag a naisurat iti dayta a libro.+
32 Pinaregtana met a suroten dayta ti amin nga adda iti Jerusalem ken Benjamin. Tinungpal dagiti agnanaed iti Jerusalem ti adda iti tulag ti Dios, ti Dios dagidi ammada.+
33 Kalpasanna, inikkat ni Josias ti amin a makarimon a banag* iti amin a daga a kukua dagiti Israelita,+ ken tinulonganna ti amin nga umili ti Israel nga agserbi ken Jehova a Diosda. Iti intero a panagbiagna,* intultuloyda ti nagtulnog ken Jehova a Dios dagidi ammada.
Footnotes
^ Wenno “sinukog nga estatua.”
^ Wenno “sinukog nga estatua.”
^ Lit., “balay.”
^ Wenno “parabunag.”
^ Lit., “babaen ti ima ni.”
^ Lit., “Imbukbokda.”
^ Lit., “nalukneng.”
^ Naindaniwan a sasao para iti ipapatay.
^ Wenno “inulitna ti tulag.”
^ Wenno “nga idolo.”
^ Lit., “Iti amin nga aldawna.”
