Ti Maikadua a Cronicas 3:1-17

  • Rugian ni Solomon nga ibangon ti templo (1-7)

  • Ti Kasasantuan (8-14)

  • Ti dua nga adigi a gambang (15-17)

3  Kalpasanna, rinugian ni Solomon nga ibangon ti balay ni Jehova+ idiay Jerusalem iti Bantay Moria,+ a nagparangan ni Jehova ken ni David+ nga amana, iti disso nga insagana ni David iti pagirikan ni Ornan+ a Jebuseo.  Inrugina ti nagibangon iti maikadua nga aldaw ti maikadua a bulan, iti maikapat a tawen ti panagturayna.  Ti insaad ni Solomon a pundasion ti balay ti pudno a Dios ket 60 a kasiko ti kaatiddogna ken 20 a kasiko ti kaakabana,+ sigun iti dati a rukod.*  Ti beranda iti sango ket 20 a kasiko ti kaatiddogna, a kapada ti kaakaba ti balay,* ken 120 ti kangatona;* kinalupkopanna ti uneg iti puro a balitok.+  Dinidinganna iti kayo a parwa ti nadayag a balay, sa kinalupkopanna iti nasayaat a balitok,+ ken dinekorasionanna kadagiti ladawan ti kayo a palma+ ken kawar.+  Kinalupkopanna pay ti balay kadagiti napintas ken napateg a bato;+ ken naggapu idiay Parvaim ti balitok+ nga inusarna.  Kinalupkopanna iti balitok ti balay, dagiti pasanggir, arsadanan, diding, ken ridawna;+ kinitikitanna dagiti diding kadagiti kerubin.+  Inaramidna ti Kasasantuan a siled;*+ ti kaatiddogna ket kas iti kaakaba ti balay, 20 a kasiko, ken ti kaakabana ket 20 a kasiko. Kinalupkopanna dayta iti nasayaat a balitok nga aggatad iti 600 a talento.*+  Ti kadagsen ti balitok a nausar kadagiti lansa ket 50 a siklo;* ken kinalupkopanna iti balitok dagiti siled iti atep. 10  Kalpasanna, nangaramid iti dua nga estatua a kerubin iti Kasasantuan a siled,* ken kinalupkopanna dagita iti balitok.+ 11  Ti intero a kaatiddog dagiti payak dagiti kerubin+ ket 20 a kasiko; ti maysa a payak ti umuna a kerubin ket lima a kasiko ti kaatiddogna ken dumanon iti diding ti balay. Ti maysa pay a payakna ket lima a kasiko ken dumanon iti payak ti sabali a kerubin. 12  Ti maysa a payak ti maikadua a kerubin ket lima a kasiko ti kaatiddogna ken dumanon iti diding ti balay. Ti maysa a payakna ket lima a kasiko ken dumanon iti maysa a payak ti umuna a kerubin. 13  Ti kaatiddog dagiti nakaukrad a payak dagitoy a kerubin ket 20 a kasiko; ken nakatakderda a nakasango ti rupada iti uneg.* 14  Nangaramid met iti kortina+ a ti materialesna ket asul a sinulid, purpura a delana, krimson, ken dekalidad a tela, ken binordaanna dayta iti kerubin.+ 15  Kalpasanna, nangaramid iti dua nga adigi+ iti sanguanan ti balay, 35 a kasiko ti kaatiddogda, ken lima a kasiko ti rukod ti pannakaulo ti tunggal adigi.+ 16  Nangaramid pay kadagiti kawar, a kas iti kuentas ket inkabilna dagita iti rabaw dagiti adigi. Nangaramid iti 100 a sinanprutas a granada sa inkabilna dagita kadagiti kawar. 17  Impatakderna dagiti adigi iti sango ti templo, maysa iti kannawan* ken maysa iti kannigid.* Pinanagananna ti makinkannawan iti Jakin* ken ti makinkannigid iti Boaz.*

Footnotes

Ti gagangay a kasiko ket 44.5 cm, ngem ipagarup ti dadduma a ti “dati a rukod” ket tumukoy iti atiddog a kasiko a 51.8 cm. Kitaem ti App. B14.
Saan a masigurado no ania a kita ti pagrukod.
Wenno “20 a kasiko no pasurotan ti kaakaba ti balay.”
Ti 1 talento ket 34.2 kg. Kitaem ti App. B14.
Lit., “balay.”
Ti 1 siklo ket 11.4 g. Kitaem ti App. B14.
Lit., “balay.”
Kayatna a sawen, sumango iti Nasantuan.
Wenno “abagatan.”
Wenno “amianan.”
Kaipapananna, “Ipasdekna [kayatna a sawen, ni Jehova] Koma a Sititibker.”
Mabalin a kaipapananna, “Buyogen ti Pigsa.”