Ti Maikadua a Cronicas 30:1-27
-
Selebraran ni Ezekias ti Paskua (1-27)
30 Nangipatulod ni Ezekias iti mensahe iti intero nga Israel+ ken Juda, ken sinuratanna pay ti Efraim ken Manases,+ tapno mapanda iti balay ni Jehova idiay Jerusalem ket selebraranda ti Paskua para ken Jehova a Dios ti Israel.+
2 Ngem inkeddeng ti ari, dagiti prinsipena, ken ti amin nga umili ti Jerusalem a selebraranda ti Paskua iti maikadua a bulan,+
3 ta saanda a naselebraran dayta iti umiso a tiempo,+ gapu ta awan idi ti umdas a papadi a nangdalus iti bagida+ ken saan a naguummong dagiti umili idiay Jerusalem.
4 Agparang a nasayaat daytoy nga urnos iti ari ken kadagiti umili.
5 Gapuna, inkeddengda nga ipakaammo dayta iti intero nga Israel, manipud Beer-sheba agingga idiay Dan,+ a masapul a mapan dagiti tattao idiay Jerusalem tapno selebraranda ti Paskua para ken Jehova a Dios ti Israel, ta saanda a naselebraran dayta kas grupo maitunos iti naisurat.+
6 Napan ngarud dagiti mensahero* iti intero nga Israel ken Juda nga awitda dagiti surat ti ari ken dagiti prinsipena, kas iti imbilin ti ari, ket kinunada: “Dakayo nga umili ti Israel, agsublikayo ken Jehova a Dios da Abraham, Isaac, ken Israel, tapno agsubli met ti Dios kadagidiay nabati a nakalibas kadagiti ari ti Asiria.+
7 Diyo tultuladen dagidi ammayo ken dagiti kakabsatyo a saan a nagmatalek ken Jehova a Dios dagidi ammada, isu a dinadaelna ida, kas iti makitkitayo.+
8 Ita, saankayo nga agsukir a kas kadagidi ammayo.+ Agtulnogkayo ken Jehova ket mapankayo iti santuariona+ a pinagbalinna a nasantuan iti agnanayon ken agserbikayo ken Jehova a Diosyo, tapno bumaaw ti sumsumged a pungtotna kadakayo.+
9 Ta no agsublikayo ken Jehova, dagiti kakabsatyo ken annakyo ket kaasianto dagiti mangtiliw kadakuada+ ken mapalubosandanto nga agsubli iti daytoy a daga,+ ta mannakipagrikna* ken naasi+ ni Jehova a Diosyo, ken saannakayto a tallikudan no agsublikayo kenkuana.”+
10 Gapuna, napan dagiti mensahero* iti tunggal siudad iti intero nga Efraim ken Manases,+ uray idiay Zabulon, ngem kinatkatawaan ken inuy-uyaw ida dagiti tattao.+
11 Nupay kasta, nagpakumbaba ti dadduma nga umili ti Aser, Manases, ken Zabulon ket napanda idiay Jerusalem.+
12 Binendisionan met ti pudno a Dios ti Juda tapno agkaykaysada* a mangaramid iti imbilin ti ari ken dagiti prinsipena maitunos iti sao ni Jehova.
13 Nakaad-adu a tattao ti napan idiay Jerusalem tapno selebraranda ti Piesta ti Tinapay nga Awan Lebadurana+ iti maikadua a bulan;+ nagadu ti naguummong.
14 Timmakderda ket inikkatda dagiti altar idiay Jerusalem+ ken ti amin nga altar ti insienso+ sa imbellengda iti Tanap ti Kidron.
15 Kalpasanna, pinartida ti maidaton iti Paskua iti maika-14 nga aldaw ti maikadua a bulan. Mababain dagiti papadi ken Levita isu a dinalusanda ti bagbagida ken nangyegda kadagiti daton a mapuoran iti balay ni Jehova.
16 Nagtakderda iti nairanta a pagpuestuanda maitunos iti Linteg ni Moises, ti adipen ti pudno a Dios. Inwarsi dagiti papadi ti dara+ nga inted dagiti Levita.
17 Adu kadagiti naguummong ti saan a nangdalus iti bagida, ket dagiti Levita ti nangparti kadagiti maidaton iti Paskua para iti amin a saan a nadalus,+ tapno madalusanda iti sanguanan ni Jehova.
18 Ta adu a tattao ti saan pay a nangdalus iti bagbagida, nangnangruna dagidiay naggapu idiay Efraim, Manases,+ Isacar, ken Zabulon, ngem nanganda latta iti Paskua, a maikontra iti naisurat. Ngem inkararagan ida ni Ezekias, a kinunana: “Pakawanen koma ni Jehova, a naimbag a Dios,+
19 ti asinoman a nangisagana iti pusona a mangsapul iti pudno a Dios,+ ni Jehova, a Dios dagidi ammana, uray no saan pay a nadalusan maitunos iti pagalagadan ti kinanasantuan.”+
20 Dimngeg ni Jehova ken Ezekias ket pinakawanna* dagiti tattao.
21 Gapuna, pito nga aldaw a siraragsak+ a sinelebraran dagiti Israelita nga adda idiay Jerusalem ti Piesta ti Tinapay nga Awan Lebadurana,+ ket inaldaw nga indaydayaw dagiti Levita ken papadi ni Jehova, ken sipipigsa a tinokarda dagiti instrumentoda para ken Jehova.+
22 Kasta met, ni Ezekias ket nakisarita ken pinaregtana* ti amin a Levita a nainsiriban nga agserserbi ken Jehova. Nanganda bayat ti pito nga aldaw a piesta,+ nangipaayda kadagiti daton a pakikappia+ ken nagyamanda ken Jehova a Dios dagidi ammada.
23 Inkeddeng dagiti umili a selebraranda dayta iti pito pay nga aldaw, isu a siraragsak a sinelebraranda iti pito pay nga aldaw.+
24 Nangted ni Ari Ezekias ti Juda iti 1,000 a kalakian a baka ken 7,000 a karnero para kadagiti umili. Nangted met dagiti prinsipe iti 1,000 a kalakian a baka ken 10,000 a karnero para kadagiti umili.+ Nagadu a papadi ti nangdalus iti bagida.+
25 Nagragrag-o ti amin nga umili ti Juda, dagiti papadi, Levita, amin nga umili a naggapu idiay Israel,+ ken dagiti ganggannaet a residente+ a naggapu iti daga ti Israel ken dagiti agnanaed iti Juda.
26 Adda idi napalalo a panagrag-o idiay Jerusalem, ta awan pay ti napasamak a kastoy idiay Jerusalem+ manipud idi kaaldawan ni Solomon nga anak ni David nga ari ti Israel.
27 Kamaudiananna, nagtakder dagiti Levita a papadi sa binendisionanda dagiti tattao.+ Dimngeg ti Dios iti timekda, ket nakadanon ti kararagda idiay langit, ti nasantuan a pagnanaedanna.
