Genesis 50:1-26
50 Idin nagpasag ni Jose iti rupa ni amana+ ket sinangitanna ken inagkanna.+
2 Kalpasan dayta binilin ni Jose dagiti adipenna, dagiti mangngagas, nga embalsamarenda+ ni amana. Gapuna dagiti mangngagas inembalsamarda ni Israel,
3 ket binusbosda a naan-anay ti uppat a pulo nga aldaw maipaay kenkuana, ta kastoy a kaadu ti al-aldaw ti kadawyan a busbosenda iti panangembalsamar, ket dagiti Egipcio nagtultuloyda a mangyarubos iti lulua maipaay kenkuana iti pitopulo nga aldaw.+
4 Kamaudiananna ti al-aldaw ti panangsangit kenkuana napalabasen, ket nagsao ni Jose iti sangakabbalayan ni Faraon, a kunkunana: “No, ita, nakasarakak iti pabor kadagiti matayo,+ sawenyo, pangngaasiyo, iti pagdengngeg ni Faraon, a kunkunayo,
5 ‘Pinagsapatanak ni amak,+ a kunkunana: “Adtoy! Matayakon.+ Idiay lugar a pagitabonak a kinalik maipaay kaniak idiay daga ti Canaan+ isu ti pangitabonam kaniak.”+ Ket ita, pangngaasim, bay-annak a sumang-at ket itabonko ni amak, a kalpasan dayta situtulokak nga agsubli.’”
6 Iti kasta kinuna ni Faraon: “Sumang-atka ket itabonmo ni amam kas iti impaisapatana kenka.”+
7 Gapuna simmang-at ni Jose tapno itabonna ni amana, ket nakipagsang-at kenkuana dagiti amin nga adipen ni Faraon, dagiti lallakay+ iti sangakabbalayanna ken amin dagiti lallakay iti daga ti Egipto,
8 ken isuamin a sangakabbalayan ni Jose ken ti kakabsatna ken ti sangakabbalayan ni amana.+ Dagiti laeng babassit nga annakda ken dagiti arbanda ken dagiti pangenda ti imbatida idiay daga ti Gosen.
9 Nakipagsang-at met kenkuana agpadpada dagiti karuahe+ ken dagiti kumakabalio, ket ti pakarso nagbalin a nakaad-adu unay.
10 Idin nakagtengda iti pagirikan+ ti Atad, nga adda iti rehion ti Jordan,+ ket sadiay inaramidda ti dakkel unay ken nakaro a panagdung-aw ket intultuloyna dagiti seremonia ti panagleddaang maipaay ken amana iti pito nga aldaw.+
11 Ket dagiti agnanaed iti daga, dagiti Canaanita, nakitada dagiti seremonia ti panagleddaang idiay pagirikan ti Atad, ket inyebkasda: “Nakaro daytoy a panagleddaang kadagiti Egipcio!” Dayta ti makagapu a napanaganan iti Abel-mizraim, nga adda iti rehion ti Jordan.+
12 Ket inaramid kenkuana ti annakna ti apagpag-isu kas iti imbilinna kadakuada.+
13 Gapuna isu impan ti annakna idiay daga ti Canaan ket intabonda iti rukib ti talon ti Macpela, ti talon a ginatang ni Abraham maipaay iti panangtagikua iti lugar a pagitabonan manipud ken Efron a Heteo iti sango ti Mamre.+
14 Kalpasanna nagsubli ni Jose idiay Egipto, isu ken ti kakabsatna ken isuamin dagidiay nakipagsang-at kenkuana a mangitabon ken amana, kalpasan a naitabonna ni amana.
15 Idi nakita dagiti kakabsat ni Jose a natayen ni amada, rinugianda a kunaen: “Mabalin nga ing-ingpen ni Jose ti gura kadatayo+ ket sigurado a supapakannatayto iti isuamin a dakes nga inaramidtayo kenkuana.”+
16 Gapuna inyebkasda ken Jose ti maysa a bilin kadagitoy a sasao: “Ni amam intedna ti bilin sakbay ti ipapatayna, a kunkunana,
17 ‘Daytoy ti sawenyonto ken Jose: “Agdawatak kenka, pakawanem,+ pangngaasim, ti iyaalsa ti kakabsatmo ken ti basolda ta inaramidda ti dakes kenka.”’+ Ket ita pakawanem, pangngaasim, ti iyaalsa dagiti adipen ti Dios ni amam.”+ Ket nagsangit ni Jose idi nagsaoda kenkuana.
18 Kalpasan dayta immay met ti kakabsatna ket nagruknoyda iti sanguananna ket kinunada: “Adtoy kaslakami ad-adipen kenka!”+
19 Idin kinuna kadakuada ni Jose: “Dikay agbuteng, ta addaak aya iti saad ti Dios?+
20 No maipapan kadakayo, dakes ti pinanunotyo maibusor kaniak. Ti Dios pinanunotna dayta a maipaay a pagimbagan iti panggep a panagtignay a kas iti daytoy nga aldaw tapno taginayonenna a sibibiag ti adu a tattao.+
21 Gapuna ita dikay agbuteng. Siak itultuloykonto ti panangabasto kadakayo ken ti babassit nga annakyo iti taraon.”+ Ngarud liniwliwana ida ken nagsao kadakuada buyogen ti panangipanamnama.
22 Ket ni Jose nagtultuloy nga agnaed idiay Egipto, isu ken ti balay ni amana; ket ni Jose nagbiag iti sangagasut ket sangapulo a tawen.
23 Ket ni Jose nakitana ti annak ni Efraim iti maikatlo a kaputotan,+ kasta met dagiti annak ni Maquir,+ anak ni Manases. Nayanakda iti tumtumeng ni Jose.+
24 Iti kamaudiananna kinuna ni Jose iti kakabsatna: “Matayakon; ngem di bumurong nga iturongto ti Dios ti asikasona kadakayo,+ ket sigurado nga aonennakayto iti daytoy a daga nga ipan iti daga a maipapan iti dayta isu nagsapata ken ni Abraham, ni Isaac ken ni Jacob.”+
25 Ngarud pinagsapata ni Jose ti annak ti Israel, a kunkunana: “Di bumurong nga iturongto ti Dios ti asikasona kadakayo. Gapuna masapul nga alaenyo nga isang-at dagiti tulangko manipud ditoy.”+
26 Kalpasan dayta natay ni Jose iti edad a sangagasut ket sangapulo a tawen; ket inembalsamarda,+ ket naikabil iti maysa a lungon idiay Egipto.
