Genesis 49:1-33
49 Idi agangay inayaban ni Jacob ti annakna ket kinunana: “Aguurnongkayo a sangsangkamaysa tapno maibagak kadakayo no anianto ti mapasamak kadakayo iti kamaudianan a paset ti al-aldaw.
2 Aguummongkayo ket agimdengkayo, dakayo nga annak ni Jacob, wen, agimdengkayo ken Israel nga amayo.+
3 “Ruben, sika ti inaunak,+ ti kiredko ken ti punganay ti pannakabalinko nga agpaadu,+ ti kinatan-ok ti dayaw ken ti kinatan-ok ti pigsa.
4 Buyogen ti nadarasudos a kinagaramugam a kas iti dandanum, saanka a mangringbaw,+ agsipud ta immulika iti pagiddaan ni amam.+ Iti dayta a tiempo tinabbaawam ti iddak.+ Isu immuli iti dayta!
5 “Da Simeon ken Levi agkabsatda.+ Dagiti igamda a pangpapatay gamgamigam ti kinaranggas.+
6 Iti nasinged a bunggoyda dika umay,+ O kararuak. Iti kongregasionda dika makikaykaysa,+ O pagannayasak, agsipud ta iti ungetda pinapatayda dagiti lallaki,+ ket iti kinamanangipapilitda linugpida dagiti toro.
7 Mailunod koma ti ungetda,+ agsipud ta naulpit,+ ken ti rungsotda, agsipud ta agtignay a sigugubsang.+ Bingbingayek koma ida iti Jacob ket iwarawarak koma ida iti Israel.+
8 “No maipapan kenka, Juda,+ idayawdakanto dagiti kakabsatmo.+ Ti imam addanto iti teltel dagiti kabusormo.+ Ti annak ni amam iruknoydanto kenka ti bagbagida.+
9 Ni Juda maysa nga urbon a leon.+ Manipud iti inanupan, anakko, pudno unay a sumang-atkanto. Isu nagrukob, nagunnat a kas leon ket, kas maysa a leon, siasino ti makaitured a mangriing kenkuana?+
10 Ti setro saanto a sumina ken Juda,+ uray ti sarukod ti komandante iti baet dagiti sakana, agingga nga umay ti Silo;+ ket isunto ti pagpaayan ti panagtulnog dagiti ili.+
11 Iti panangigalutna ti nataenganen nga asnona iti maysa a puon ti ubas ken ti urbon ti bukodna nga asna iti maysa a napili a puon ti ubas, pudno unay a labaannanto ti pagan-anayna iti arak ken ti kawesna iti dara dagiti ubas.+
12 Natayengteng a nalabaga dagiti matana maigapu iti arak, ket ti kinapuraw dagiti ngipenna maigapu iti gatas.
13 “Ni Zabulon agtaengto iti aplaya,+ ket addanto iti igid ti baybay a nakayangklaan dagiti barko;+ ket ti adayo a deppaarna agturongto iti Sidon.+
14 “Ni Isacar+ maysa a natibker-tulangna nga asno, nga agid-idda iti baet ti dua a kados.
15 Ket makitananto a ti lugar a paginanaan nasayaat ken ti daga makaay-ayo; ket irukobnanto ti abagana tapno agbaklay kadagiti awit ket maipasakupto iti mangadipen a pinuersa a panagtrabaho.
16 “Ni Dan ukomennanto ti ilina kas maysa kadagiti tribu ti Israel.+
17 Ni Dan agbalin koma a serpiente iti igid ti dalan, maysa a nagsara nga uleg iti igid ti dana, a mangkagat kadagiti mukod ti kabalio tapno ti nakasakay kenkuana matnag a patallikud.+
18 Pudno nga urayekto ti pannakaisalakan manipud kenka, O Jehova.+
19 “No maipapan ken Gad, rubbuotento ti maysa a buyot dagiti tulisan, ngem rubbuotennanto ti adayo a likudan.+
20 “Manipud ken Aser natabanto ti tinapayna,+ ket itednanto dagiti agkakaimas a taraon ti maysa nga ari.+
21 “Ni Neftali+ maysa a narapis a kabaian nga ugsa. Isu mangipapaay iti sasao ti kinangayed.+
22 “Santak ti maysa a kayo a manangpataud-bunga,+ ni Jose isu ti santak ti maysa a kayo a manangpataud-bunga iti sibay ti ubbog,+ a mangipakalay-at kadagiti sangana iti rabaw ti maysa a pader.+
23 Ngem intultuloy a riniribuk dagiti pumapana ket pinanada ket intultuloyda nga ingpen ti gura maibusor kenkuana.+
24 Ket kaskasdi ti baina agnanaed idi iti permanente a lugar,+ ket naamnut ti pigsa dagiti imana.+ Manipud iti im-ima Daydiay Mannakabalin ni Jacob,+ agtaud sadiay ti Pastor, ti Bato ti Israel.+
25 Isu agtaud iti Dios ni amam,+ ket tulongannakanto;+ ket isu kadua ti Mannakabalin-amin,+ ket bendisionannakanto kadagiti bendision ti langlangit sadi ngato,+ kadagiti bendision ti nadanum a yuyeng nga aggigian iti baba,+ kadagiti bendision dagiti suso ken aanakan.+
26 Dagiti bendision ni amam pudno a natantan-okto ngem kadagiti bendision ti agnanayon a bambantay,+ iti arkos ti di nakedngan ti kapautna a turturod.+ Agtultuloydanto iti rabaw ti ulo ni Jose, iti mismo a kuppokuppo daydiay nailasin iti kakabsatna.+
27 “Ni Benjamin agtultuloyto a mangrangrangkay a kas maysa a lobo.+ Iti bigat kanennanto ti animal a nakemmeg ket iti rabii bingayennanto ti samsam.”+
28 Dagitoy amin ti sangapulo ket dua a tribu ti Israel, ket daytoy ti sinao kadakuada ni amada idi bembendisionanna ida. Binendisionanna ida tunggal maysa sigun iti bukodna a bendision.+
29 Kalpasan dayta binilinna ida ket kinunana kadakuada: “Maitiptiponakon kadagiti kailiak.+ Itabondak nga ikadua kadagiti ammak iti rukib nga adda idiay talon ni Efron a Heteo,+
30 iti rukib nga adda idiay talon ti Macpela nga adda iti sango ti Mamre idiay daga ti Canaan, ti talon a ginatang ni Abraham manipud ken Efron a Heteo maipaay iti panangtagikua iti lugar a pagitabonan.+
31 Sadiay nga intabonda ni Abraham ken ni Sara nga asawana.+ Sadiay nga intabonda ni Isaac ken ni Rebecca nga asawana,+ ket sadiay nga intabonko ni Lea.
32 Ti talon a nagatang ken ti rukib nga adda iti dayta naggapu iti annak ni Het.”+
33 Gapuna nalpas ni Jacob nga inted dagiti bilin kadagiti annakna. Kalpasanna inyurnosna dagiti sakana iti sopa ket nauyos ti biagna ket naitipon kadagiti kailianna.+
