Genesis 21:1-34
21 Ket ni Jehova inturongna ti asikasona ken Sara kas iti nakunana, ket ni Jehova inaramidna ita ken Sara kas iti sinaona.+
2 Ket nagsikog ni Sara+ ket kalpasanna nangipasngay iti anak a lalaki ken Abraham iti kinalakayna iti naituding a tiempo a sinao kenkuana ti Dios.+
3 Iti kasta pinanaganan ni Abraham ti anakna a nayanak kenkuana, nga impasngay kenkuana ni Sara, iti Isaac.+
4 Ket ni Abraham kinugitna ni Isaac nga anakna idi walo nga aldawnan, kas iti imbilin kenkuana ti Dios.+
5 Ket ni Abraham sangagasut ti tawenna idi nayanak kenkuana ni Isaac nga anakna.
6 Idin kinuna ni Sara: “Ti Dios nangisagana iti panagkatawa kaniak: isuamin a makangngeg iti dayta katawaandakto.”+
7 Ket innayonna: “Siasino ti nakayebkas ken Abraham, ‘Ni Sara sigurado nga agpasusonto iti annak,’ yantangay nangipasngayak iti anak a lalaki iti kinalakayna?”
8 Ita nagtultuloy a dimmakkel ti ubing ket napusot;+ ket idin nangisagana ni Abraham iti dakkel a padaya iti aldaw a pannakapusot ni Isaac.
9 Ket ni Sara nagtultuloy a napaliiwna a mangsutsutil+ ti anak ni Agar nga Egipcio,+ nga impasngayna ken Abraham.
10 Gapuna rinugianna a kunaen ken Abraham: “Pagtalawem daytoy nga adipen a babai ken ti anakna, ta ti anak daytoy nga adipen a babai saanto a makipagtawid iti anakko, ken Isaac!”+
11 Ngem makaparurod unay dayta idi ken Abraham no maipapan iti anakna.+
12 Idin ti Dios kinunana ken Abraham: “Dika palubosan a makaparurod kenka ti aniaman a banag a sasawen kenka ni Sara maipapan iti ubing ken maipapan iti adipenmo a babai. Imdengam ti timekna, agsipud ta babaento ken Isaac ti maawaganto a bin-im.+
13 Ket no maipapan iti anak ti adipen a babai,+ aramidekto met a maysa a nasion, agsipud ta isu putotmo.”+
14 Gapuna bimmangon a nasapa ni Abraham iti bigat ket nangala iti tinapay ken maysa a lalat a botelia ti danum ket intedna ken Agar,+ nga inkabilna dayta iti abagana, ken ti ubing,+ ket kalpasanna pinapanawna. Ket pimmanaw ket nagallaalla iti let-ang ti Beer-seba.+
15 Kamaudiananna naibus ti danum+ iti lalat a botelia ket inkabilna+ ti ubing iti sirok ti maysa kadagiti bassit a kayo.
16 Kalpasanna napan ket nagtugaw nga is-isuna, iti agarup madanon ti maibiat a pana, agsipud ta kinunana: “Saanko koma a makita a matay ti ubing.”+ Gapuna nagtugaw iti adayo ket rinugianna nga ipigsa ti timekna ket nagsangit.+
17 Iti kasta ti Dios nangngegna ti timek ti ubing,+ ket ti anghel ti Dios inawaganna ni Agar manipud iti langlangit ket kinunana kenkuana:+ “Ania ti mapaspasamak kenka, Agar? Dika agbuteng, agsipud ta ti Dios inimdenganna ti timek ti ubing sadiay ayanna.
18 Tumakderka, bangonem ti ubing ket atibayem ita imam, agsipud ta aramidekto a maysa a dakkel a nasion.”+
19 Kalpasanna linuktan ti Dios dagiti matana tapno maimatanganna ti maysa a bubon ti danum;+ ket napan ket rinugianna a punnuen iti danum ti lalat a botelia ken painumen ti ubing.
20 Ket ti Dios nagtultuloy nga adda iti ubing,+ ket nagtultuloy a dimmakkel ken nagnaed idiay let-ang; ket nagbalin a pumapana.+
21 Ket isu nagnanaed idiay let-ang ti Paran,+ ket inyalaan ni inana iti asawa manipud daga ti Egipto.
22 Ket naaramid iti dayta a tiempo a ni Abimelec agraman ken ni Ficol a panguluen ti buyotna kinunada ken Abraham: “Ti Dios adda kenka iti isuamin nga ar-aramidem.+
23 Gapuna ita isapatam kaniak ditoy babaen ti Dios+ a saankanto nga agbalin nga ulbod kaniak ken iti putotko ken iti annakko;+ a, maitunos iti nasungdo nga ayat nga impakitak iti pannakilangenko kenka,+ makilangenkanto kaniak ken iti daga a pagtataengam kas ganggannaet.”+
24 Gapuna kinuna ni Abraham: “Isapatak.”+
25 Idi a ni Abraham dinillawna ni Abimelec iti napalalo maipapan iti bubon ti danum nga inagaw dagiti adipen ni Abimelec babaen ti kinaranggas,+
26 idin kinuna ni Abimelec: “Diak ammo no siasino ti nangaramid itoy a banag, uray sika saanmo nga imbaga dayta kaniak, ket siak saanko met a nangngeg dayta malaksid ita nga aldaw.”+
27 Gapu iti dayta nangala ni Abraham iti karkarnero ken bakbaka ket intedna ida ken Abimelec,+ ket isuda a dua namatalgedda iti tulag.+
28 Idi nangilasin ni Abraham iti pito a kabaian a kordero ti arban,
29 ni Abimelec kinunana ken Abraham: “Ania ti kaipapanan ditoy dagitoy pito a kabaian a kordero nga inlasinmo?”
30 Idin kinunana: “Awatem ti pito a kabaian a kordero iti imak, tapno agserbi koma kas pangsaksi+ kaniak a kinalik daytoy a bubon.”
31 Dayta ti makagapu nga inawaganna dayta a disso iti Beer-seba,+ agsipud ta sadiay isuda a dua nagsapatada.
32 Gapuna namatalgedda iti tulag+ idiay Beer-seba, kalpasan dayta timmakder ni Abimelec agraman ken ni Ficol a panguluen ti buyotna ket nagsublida iti daga dagiti Filisteo.+
33 Kalpasan dayta isu nagmula iti kayo a tamarisko idiay Beer-seba ket immawag sadiay iti nagan ni Jehova+ a di nakedngan ti kapautna a Dios.+
34 Ket inyat-atiddog ni Abraham ti panagtaengna kas ganggannaet iti daga dagiti Filisteo iti adu nga aldaw.+
