Genesis 11:1-32
11 Ita ti intero a daga nagtultuloy nga addaan maymaysa a pagsasao ken addaan maymaysa a pakabuklan ti sasao.
2 Ket naaramid nga iti panagbambaniagada nga agpadaya natakuatanda iti kamaudiananna ti maysa a ginget a tanap iti daga ti Sinar,+ ket nagnaedda sadiay.
3 Ket rinugianda a kunaen, tunggal maysa iti sabali: “Umaykayo! Agaramidtayo kadagiti ladrilio ket gebbaentayo ida babaen iti panangpuor.” Gapuna ti ladrilio nagserbi a bato maipaay kadakuada, ngem ti bitumen nagserbi nga argamasa maipaay kadakuada.+
4 Kinunada ita: “Umaykayo! Ibangonantayo ti bagbagitayo ti maysa a siudad ken kasta met ti maysa a torre a ti tuktokna dumanon iti langlangit,+ ket mangaramidtayo iti agdindinamag a nagan maipaay iti bagbagitayo,+ ta amangan no maiwarawaratayo iti isuamin a rabaw ti daga.”+
5 Ket ni Jehova bimmaba tapno kitaenna ti siudad ken ti torre nga imbangon ti annak ti tattao.+
6 Kalpasan dayta kinuna ni Jehova: “Adtoy! Maymaysada nga ili ket adda maymaysa a pagsasao maipaay kadakuada amin,+ ket daytoy ti rugianda nga aramiden. Ay ket, ita awan ti banag a mabalinda a panunoten nga aramiden a didanto kabaelan a ragpaten.+
7 Umayka ita! Bumabata+ ket sadiay riribukenta+ ti pagsasaoda tapno saanda a mabalin nga imdengan ti pagsasao ti maysa ken maysa.”+
8 Iti kasta inwarawara ida ni Jehova manipud sadiay iti isuamin a rabaw ti daga,+ ket nagin-inut a simmardengda a mangbangon iti siudad.+
9 Dayta ti makagapu a napanaganan iti Babel,+ agsipud ta sadiay riniribuk ni Jehova ti pagsasao ti intero a daga, ket inwarawara+ ida ni Jehova manipud sadiay iti isuamin a rabaw ti daga.
10 Daytoy ti pakasaritaan ni Sem.+
Ni Sem sangagasut ti tawenna idi nagbalin nga ama ni Arpaksad+ dua a tawen kalpasan ti layus.
11 Ket kalpasan ti panangputotna ken Arpaksad nagtultuloy nga agbiag ni Sem iti lima gasut a tawen. Kabayatanna nagbalin nga ama ti annak a lallaki ken babbai.+
12 Ket ni Arpaksad nagbiag iti tallopulo ket lima a tawen. Kalpasanna isu ti ama ni Sela.+
13 Ket kalpasan ti panangputotna ken Sela nagtultuloy nga agbiag ni Arpaksad iti uppat a gasut ket tallo a tawen. Kabayatanna nagbalin nga ama ti annak a lallaki ken babbai.
14 Ket ni Sela nagbiag iti tallopulo a tawen. Kalpasanna isu ti ama ni Eber.+
15 Ket kalpasan ti panangputotna ken Eber nagtultuloy nga agbiag ni Sela iti uppat a gasut ket tallo a tawen. Kabayatanna nagbalin nga ama ti annak a lallaki ken babbai.
16 Ket ni Eber nagtultuloy a nagbiag iti tallopulo ket uppat a tawen. Kalpasanna isu ti ama ni Peleg.+
17 Ket kalpasan ti panangputotna ken Peleg nagtultuloy nga agbiag ni Eber iti uppat a gasut ket tallopulo a tawen. Kabayatanna nagbalin nga ama ti annak a lallaki ken babbai.
18 Ket ni Peleg nagtultuloy a nagbiag iti tallopulo a tawen. Kalpasanna isu ti ama ni Reu.+
19 Ket kalpasan ti panangputotna ken Reu nagtultuloy nga agbiag ni Peleg iti dua gasut ket siam a tawen. Kabayatanna nagbalin nga ama ti annak a lallaki ken babbai.
20 Ket ni Reu nagtultuloy a nagbiag iti tallopulo ket dua a tawen. Kalpasanna isu ti ama ni Serug.+
21 Ket kalpasan ti panangputotna ken Serug nagtultuloy nga agbiag ni Reu iti dua gasut ket pito a tawen. Kabayatanna nagbalin nga ama ti annak a lallaki ken babbai.
22 Ket ni Serug nagtultuloy a nagbiag iti tallopulo a tawen. Kalpasanna isu ti ama ni Nacor.+
23 Ket kalpasan ti panangputotna ken Nacor nagtultuloy nga agbiag ni Serug iti dua gasut a tawen. Kabayatanna nagbalin nga ama ti annak a lallaki ken babbai.
24 Ket ni Nacor nagtultuloy a nagbiag iti duapulo ket siam a tawen. Kalpasanna isu ti ama ni Tare.+
25 Ket kalpasan ti panangputotna ken Tare nagtultuloy nga agbiag ni Nacor iti sangagasut sangapulo ket siam a tawen. Kabayatanna nagbalin nga ama ti annak a lallaki ken babbai.
26 Ket ni Tare nagtultuloy a nagbiag iti pitopulo a tawen, kalpasan dayta isu ti ama da Abram,+ Nacor+ ken Haran.
27 Ket daytoy ti pakasaritaan ni Tare.
Ni Tare isu ti ama da Abram, Nacor ken Haran; ket ni Haran isu ti ama ni Lot.+
28 Idi agangay natay ni Haran bayat ti pannakikaduana ken Tare nga amana iti daga a nakayanakanna, idiay Ur+ dagiti Caldeo.+
29 Ket da Abram ken Nacor nangalada iti assawa a maipaay iti bagbagida. Ti nagan ti asawa ni Abram ket Sarai,+ idinto ta ti nagan ti asawa ni Nacor ket Milca,+ ti anak a babai ni Haran, ti ama ni Milca ken ama ni Isca.
30 Ngem ni Sarai nagtultuloy a lupes;+ awan anakna.
31 Kalpasan dayta ni Tare innalana ni Abram nga anakna, ken ni Lot, ti anak ni Haran, apokona,+ ken ni Sarai+ a manugangna-a-babai, ti asawa ni Abram nga anakna, ket kimmuyogda kenkuana manipud Ur dagiti Caldeo a mapan iti daga ti Canaan.+ Idi agangay dimtengda idiay Haran+ ket nagnaedda sadiay.
32 Ket ti al-aldaw ni Tare nagdagup iti dua gasut ket lima a tawen. Kalpasanna natay ni Tare idiay Haran.
